嚟喇嚟喇！上年宣佈話今年會喺香港開分店嘅日本人氣連鎖鰻魚專門店終於都開到嚟喇！唔使再飛東京去上野食咯，以後去尖沙咀食就得。即刻同各位心急子睇下香港店有咩食先。

呢間人氣鰻魚專門店，以備長炭燒鰻魚飯馳名，無論係鰻魚、飯、醬油定係炭都相當講究，但價錢就唔算太貴，香港店最平$68都可以食到個鰻魚飯啦~

如果去過日本店食嘅，應該都會對呢個「雙層鰻魚丼」念念不忘。嚟到香港，同樣都係喺舖頭以備長炭現烤鰻魚，客人仲可以隔住個玻璃窗睇住佢燒添~ 兩層鰻魚相當肥美，燒到有微微炭香，鰻魚、飯同醬汁嘅比例都係剛剛好der，油脂香且鮮甜。

呢個鰻魚飯三食，即係原味、加配料、加茶漬咁食，每款食法都各有特色。不過要提一提，配料係wasabi，落少少都已經好嗆鼻啦科科，加茶漬變成泡飯咁呢，就幾清香嘅，邊款食法最好食就見仁見智喇。

至於超級fans或者大胃王，就要揀「鰻魚重特上」或者「鰻魚重特大」喇，份量特別多，大滿足呢~

另外，餐廳亦有幾款鰻魚小食，想試下唔同風味嘅鰻魚，可以叫呢個串燒盛合，5款串燒包括鰻魚、鰻魚肝、金菇豚肉、茄子、青椒仔。當然想單點都得啦，特別推介鰻魚肝，軟滑甘甜，似鵝肝但又多多重魚鮮味。

平時比較少食到嘅鰻魚天婦羅亦值得一試，外脆內軟。

鰻魚玉子燒充滿鰻魚香同蛋香。

 鰻魚冷豆腐

 鰻魚肝湯

食之前再同大家做多少少功課先。餐廳嘅鰻魚產地嚟自品牌指定嘅養殖場，營養價值豐富。米飯就選用日本埼玉縣超過700年歷史嘅稻米供應商，至於醬油就係佢哋自家配方混合砂糖同醋而製。今次香港店係佢哋首間海外分店嚟啊！12月11號開始試業，17號就正式營業。喺17-19/12呢三日，$68嘅鰻魚飯仲會有買一送一優惠添，每日名額68個，想食嘅朋友仔要mark低日期約定friend子啦。
講多樣嘢畀港島區朋友仔知，聖誕前後，喺銅鑼灣都會有多間分店開業呀，但menu就冇尖沙咀呢間咁多嘢食咯……

名代宇奈備長炭燒鰻魚飯專門店
試業日期 : 12月11日
正式開業日期 : 12月17日
地址 ：iSQUARE國際廣場3樓4號舖

文：Kar
相、片：Tom Li