懷舊風興起，唔少餐廳都鍾意用舊香港為主題。灣仔呢間樓上大排檔，裝潢呈現出80年代嘅舊灣仔，舊式酒樓裝修、遊戲機中心、麻雀娛樂公司，一定可以牽起大家嘅回憶！食物方面除咗傳統鑊氣小炒，亦加入唔少創新元素㗎～

餐廳將VIP房打造成一個舊式遊戲機中心，好有香港味道。

所有海鮮都於水缸內養殖，保證新鮮。

豉椒肉鬆炒蟶子皇($80/隻)

豉椒炒蟶子平時就食得多，但包生菜食又食過未？呢味小菜係老闆嘅一個創意，將炒蟶子同肉碎生菜包結合，蘇格蘭蟶子肥美，加入肉鬆大火翻炒後，夠鑊氣之餘仲好惹味，包生菜同送飯食都好夾。

花蛤蒸水蛋($138)

就咁見到啲花蛤，視覺效果已經夠澎湃！選用菲律賓花蛤，花蛤鮮味會滲晒入蛋漿中，所以落少少調味料已經足夠。而且用咗兩種唔同嘅雞蛋，滑身之餘蛋味香濃。

金巢咕嚕黑豚肉($118)

咕嚕肉係唔少香港人食小炒必叫嘅餸。呢度就用黑豚肉代替普通豬肉，肉質軟腍而且肉味更濃。拔絲醬汁啱啱好包裹住咕嚕肉，甜酸味平衡。

香脆一口蝦丸($168)

所有蝦丸都由師傅親自手打，香脆彈牙，熱辣辣嗰陣食就最好味。

菠蘿皮焗西米布甸($138/大)

西米布甸係港式傳統甜品。師傅就將西米布甸加上菠蘿包皮去焗，菠蘿包皮焗到脆卜卜，口感豐富！

炸鮮奶($98)

炸鮮奶外皮同樣做得香脆鬆化，炸漿係餐廳自己調較，奶味重而且好香滑。

杜老誌大飯店

地址: 灣仔杜老誌道6號群策大廈7樓

文: Yanica

相、片: Tom Li