仲有3個月就要同2017年說goodbye喇，第三季完結，又有咩餐廳上榜先？今個月似乎有唔少日本菜上榜，始終香港人都係鍾意食日本料理，放題拉麵居酒屋都係我哋杯茶！其他小店都不乏捧場客，第一位更加係本土美食！立即同你睇睇今個月嘅十強先：
第10位 雲南啊老表黑羊湯鍋米綫 (*新上榜)
呢間米線雖然開咗一段時間，但長期多人幫襯，選擇好簡單，主要就係羊肉同牛腩，黑山羊肉可以揀有皮或淨瘦，湯底睇落好清，但係食落羊肉味濃微羶，係略嫌羊肉切得太碎，加埋辣油好惹味。唔食牛羊可以揀豬手、雞肉或者小食，份量十足，係觀塘返工人士嘅午餐飯堂。
圖：第9位 金田家
元朗雖然有唔少拉麵店，但呢一間由銅鑼灣開入新商場，仍然吸引到唔少拉麵迷朝聖，梗有原因嘅！豬骨湯底濃郁又唔油膩，食完拉麵唔會太滯，溏心蛋更加係十個讚。食完拉麵唔夠飽，小食選擇多，好似有男爵薯餅、芝士年糕、北寄貝海鮮沙律同埋芝士蛋糕等，抵佢多回頭客嘅。
圖：第8位 極尚大喜屋日本料理 (*新上榜)
放題一直都係好受歡迎嘅菜系，不過似乎間間差唔多，呢一間就有啲特色。新開冇耐就打入十強，因為有好多放題甚少出現嘅新菜式，好似磯燒海鮮、鮑魚花膠、原隻葡式乳豬、海膽拖羅壽司，雪糕就係movenpick任食，好豪啫！不過有食評指人太多兼要排好耐隊，咁要改善吓先得喎。
圖：第7位 雲長小龍坎老火鍋 (*新上榜)
今個冬天麻辣火鍋肯定繼續hit，天氣未凍已經陸續有新店上榜！呢間由情歌王陳柏宇開設，麻辣湯底面層一層紅油，辣度十足，而且愈滾愈濃，每人有一樽麻油俾你加料，重口味人士一定鍾意！配料就有牛舌花、鵝腸、鴨血等招牌菜，仲有一個摩天輪有齊手打丸同餃子，打卡一流。
圖：第6位 正宗上海生煎皇 (*新上榜)
最近連開幾間分店嘅生煎包專門店，唯一港島分店上榜！生煎包新鮮熱辣出爐，皮薄兼一咬爆汁，千祈唔好成粒啪入口呀！底部有脆皮，餡料份量亦十足。其他點心好似小籠包、雞絲粉皮同埋拉麵都有唔少好評，環境舒服而且服務唔錯，絕對有機會打低曾獲米芝蓮嗰間呀。
圖：第5位 青花 (*新上榜)
又係新餐廳！旺角最新商場The Forest開咗唔少新食肆，以呢間人氣最旺！班底係做甜品起家嘅ATUM，貫徹商場嘅綠化感覺，裝修都係小清新花園feel，似足城市綠洲。食物就係新派東南亞菜為主，招牌菜有泰式生蝦、牛油果辣青檸薯花、檸檬柚子魷魚水冷麵等，賣相夠靚，最啱MK潮人打卡。
圖：第4位 鮨一日本料理 (*新上榜)
海鮮丼人氣雖然稍為回落，不過呢一款食物就長期有人like，就係紅爆fb、IG嘅千層海膽飯！海膽埋到成座山咁高，配上吞拿魚蓉、加入赤醋嘅秋田小町米同即磨山葵，好犯規呀。難得其他菜式好似刺身、燒物等都唔錯，即使唔係海膽控都可以幫襯！不過人太多，難book之餘亦坐得唔係太舒服。
圖：第3位 蝦棧 (*新上榜)
全部都係蝦！呢一間台式餐廳主打蝦煲，大頭蝦全部都係游水貨色，即叫即撈，肯定新鮮啦！有多款煮法，有台灣地道胡椒、奶油及三杯等口味，仲有港式避風塘，惹味香濃，蝦膏多而且蝦肉彈牙。老闆太太係台灣人，所以其他台式小菜好似魯肉飯、醉雞卷等質素都相當唔錯，小店值得支持！
圖：第2位 北海道爐端燒
又平又正嘅日本餐廳，喺香港真係唔多，偏偏香港人最鍾意就係日本菜。呢一間來自日本大阪嘅居酒屋，走大眾化路線，菜式選擇好豐富，車輪芝士意粉、稻草烤魚或牛、燒物都係必點，難得每一款質素都唔錯，最重要係性價比高，抵食！餐廳座位唔多，都幾有深夜食堂feel，成日爆滿，唔book一定食唔到。
圖：第1位 永年士多 (*新上榜)
長年人氣高企嘅車仔麵，衝出元朗喺尖沙咀開店，連條人龍都移師埋九龍！雖然評價兩極，有街坊話不復當年勇，但仍然無損霸氣，想食就要排隊！招牌菜有豬腸、豬紅、魷魚、蘿蔔等等，橙紅色嘅辣汁有啲似辣版嘅沙嗲，濃郁惹味，食得辣不妨挑戰大辣。地方好企理乾淨，不過座位唔多，乖乖哋等位啦。
圖：文：Perrins
