葵涌廣場三樓又有新食店就唔係咩特別新聞，不過舖頭大大隻字寫住「Chok」，到底Chok咩先？答案係炸雞小食樣樣齊，仲有六款自家調味粉任加，加一款得、兩款混搭得、加哂六款都得，得咗。不過咩配搭最好味？咁就要睇開飯仔介紹喇。
 

小食店叫得Chok雞，招牌菜就當然同雞有關啦，套餐有四款選擇，想啖啖肉嘅話就可以揀D餐有六件雞件，即係雞扒切件全部無骨。如果多心想咩都試下嘅話，可以同開飯仔一樣揀A餐，有齊四件雞翼、兩件雞鎚、兩件雞翼尖同兩件雞件，兩個人Share食都夠哂飽肚！
 

雞就有啦，咁點解要Chok？因為要加調味粉吖嘛。六款自家調味粉有辣有唔辣任君選擇，包括特級香辣、避風塘蒜香、英式芥末、印度咖喱、奶油洋蔥同香濃芝士。可以由店員幫你落適當分量，或者想自己話事亦得。
 

最爽嘅係可以由你自己Mix & Match屬於自己嘅口味，最貪心嘅落哂六款都得！不過落哂嘅話辣味比較突出，試唔到其他口味。所以開飯仔建議落一至兩款就得喇。首先嚟試個印度咖喱加奶油洋蔥嘅配搭先。
 

衾實個蓋Chok勻哂啲調味粉先，打開蓋聞到好香咖喱香料味，食落有啲辣有啲鹹，加埋炸過兩次嘅炸雞，係香口惹味嘅。炸皮唔算特別薄，但香脆得嚟唔油膩。腌過嘅雞肉都帶啲香料味道，當中以雞翼嘅肉最嫩滑，雞翼尖就最香口。
 

除咗炸雞之外仲有其他小食，當中最受歡迎嘅就係招牌Chok爆燒賣同香脆雞軟骨。燒賣炸過後外脆內軟，而雞軟骨就粒粒香脆又有咬口。
 

小食同樣可以揀調味粉，今次開飯仔就試咗避風塘蒜香同香濃芝士，避風塘蒜香果然香味十足，加埋芝士鹹香真係無得輸。
 

開飯仔眼見Lunch Time都有唔少學生嚟食炸雞，有得Chok有得食係幾開心嘅。老闆仲同開飯仔透露，嚟緊想出以孜然為主嘅調味粉！希望老闆快啲推出，咁大家就多個藉口、唔係、係理由去試啦！
 

Chok 雞
葵芳葵富路7號葵涌廣場3樓3069-T18號舖

文、相、片：Cathy