好多明星藝人都鍾意跨過界開餐廳食肆，進軍飲食界。明星效應固然係有吸引力，但都要有實力先得嘅！呢排有好幾間新餐廳有明星老闆坐鎮，各位fans，準備好去追星未？
陳柏宇麻辣火鍋 雲長小龍坎老火鍋
陳柏宇早前喺青衣戲棚賣薯條，仲親自落場幫手，今次又同朋友喺銅鑼灣開麻辣火鍋，係國內有300多間分店嘅人龍名店嘅香港分店，好多明星捧場！招牌麻辣湯底由成都直送，富牛油香帶甜味，配內臟配料如鵝腸、毛肚最夾！ 要唱返首你麻辣鍋，我亦麻辣鍋太合襯～
圖：傅佩嘉台式料理 三星台菜食堂
其實係傅佩嘉同台籍老公一齊開設，多年前喺天后開過台式火鍋反應唔錯，可惜最後結業收場。今次捲土重來開餐廳，主打地道台灣菜，有牛肉麵、滷肉飯等，連Wyman食過都讚好！難怪一開業已經超爆場，一位難求呀！
圖：馬德鐘生蠔吧 Oyster Nest
上年馬神馬德鐘曾同家人合資，喺尖沙咀開設日本料理，今次再於黃埔九號水產內開蠔吧及酒窖。他稱鍾意食生蠔而開店，每日有十款新鮮生蠔空運到港，現時多產自法國及愛爾蘭，亦有西菜供應，位於餐廳隔離的酒窩則主力賣酒。
唐詩詠賣蛋糕 Petite Merveille
芝士蛋糕店其實已開咗一排，但最近先發現原來老闆娘係唐詩詠，仲親自落Sogo巡舖。雖然蛋糕唔係唐詩詠親手整，但係北海道名牌，由北海道函館直送，更連續7年獲得「國際品質評鑑大賞金獎」。香港店不時有新口味，北海道、嘅蛋糕、味道都幾好！
蕭潤邦生煎包 正宗上海生煎皇
睇中文名唔知邊個？即係前組合Bliss成員Oscar，江若琳男友呀。旺角上海生煎皇總店其實開咗一段時間，不過今年大展拳腳，分店不停開，仲衝出九龍於港島插旗，喺銅鑼灣分店剛剛開業，生煎包係唔錯又抵食嘅。
圖：司徒瑞祈外賣飯堂 阿水廚房
今年4月離開TVB嘅阿水哥哥司徒瑞祈，喺慈雲山開咗間特色早午餐小食外帶店。店子用阿水喜愛嘅多啦A夢藍色去佈置，加埋裝滿多啦A夢收藏品嘅格仔櫃，好吸引。更吸引嘅係，售賣嘅小食名字好盞鬼，如救命茶、原隻多啦A夢蛋多士、天天不同芝士焗意粉、一口西多士、低調台式滷肉飯等，成為區內街坊嘅新食店。
圖：阿水廚房 Facebook
圖：阿水廚房 Facebook即將開業：
鼎爺私房菜
李家鼎（鼎爺）因為烹調節目大show精湛廚藝，打低Chef Le Mon成為近期最紅明星廚師！原來即將於銅鑼灣開設私房菜館，主打佢最擅長嘅古法粵菜，暫定於8月或9月開業，鼎爺稱3個月的訂位已爆滿，似乎大家都好期待喎！
文：Perrins