又嚟到一年一度嘅哈囉喂啦！除咗有機會出嚟扮鬼扮馬玩餐飽，仲可以出嚟食大餐，食餐好之餘又感受到萬聖節氣氛～今期有唔少餐廳同埋主題公園都推出萬聖節大餐，例如啱晒大胃王嘅萬聖嘩鬼自助餐、頂層酒吧餐廳舉行嘅恐怖深淵派對同埋詭祕化裝舞會等緊你，淨係聽到都已經好期待喇～

萬聖嘩鬼自助餐 薈景  

呢間位於會展嘅餐廳推出「萬聖嘩鬼小聯盟」期間限定自助晚餐～除咗回本必食嘅海鮮，仲有一系列萬聖節造型嘅美食，包括似足巫婆鬼爪手嘅花生雞腳「巫婆湯」、小朋友最鍾意嘅迷你「手指」熱狗等。將墨汁意大利麵混入巴馬臣芝士輪嘅「魔髮天使」同鮮味十足嘅「鬼塚海鮮墨魚飯」都值得一試！甜品都好盞鬼，如女巫鍋朱古力蛋糕、妖怪曲奇同猛鬼街爆谷等，又靚又好食！

供應日期: 即日起至10月31日

供應時間: 星期三至星期日及公衆假期，晚上6時30分至9時30分

價錢: 成人每位$688；65歲或以上長者每位$598；7至11歲小童每位$408以及6歲或以下的小童免收費。(所有顧客可享85折；凡穿著萬聖節服飾打扮惠顧「萬聖嘩鬼小聯盟」的客人，更可獲8折優惠價。格需另加一服務費（以原價計算）。)

恐怖深淵派對 aqua spirit 

想感受氣氛之餘睇埋靚景，尖沙咀呢間頂層酒吧除咗可以飽覽維港靚景，今年萬聖節將會舉辦全年最盛大、最恐怖、最熱鬧嘅Party。餐廳於10月30日(六)將會搖身一變成為神秘嘅恐怖深淵世界，有駐場DJ Abel Rogers令大家可以於音樂中熱舞，最正係當日可以三小時無限暢飲Veuve Clicquot香檳($488)，啱晒咁多位酒鬼！無咁飲得嘅，萬聖節特飲都幾有特色，Dark Tide($138)由Tanqueray氈酒、活性炭、自家製蜜桃利口酒及檸檬製成，味道清新。Pirate’s Blood($158)加入Captain Morgan冧酒、Triple Sec橙味甜酒、珠茶糖漿、白可可、檸檬同澄清菠蘿汁，針筒中裝滿鮮紅色嘅覆盆子蓉，係幾有效果，最適合相機飲先～

詭祕化裝舞會 The Dispensary

想扮靚靚參加舞會？呢間酒吧將於10月29日（五）同10月30日（六）晚上8時至深夜舉行詭祕化裝舞會，現場同樣有駐場DJ，參加者屆時將可免費入場，著到最靚咁參加化裝舞會！除咗各款中西fusion嘅特色雞尾酒，仲有期間限定嘅Bloody Vanitas($148)，加入Jose Cuervo Blanco辣椒龍舌蘭酒、Alipús Mezcal酒、玫瑰糖漿、西柚汁同青檸調製而成，並以冷凍西柚頭顱造型呈現出生命嘅短暫，別具心思。

萬聖節美食之旅 迪士尼樂園 

迪士尼樂園今年一樣有萬聖節美食之旅！大胃王們可以去食萬聖節自助餐，期間限定嘅自助餐有唔少阿Jack嘅蹤跡同妖怪梅菜扣肉包等。如果想掃下街，市集上一樣有好多Jack嘅產品，如萬聖節木糠布甸、阿Jack曲奇同阿Jack爆谷桶等。其他迪士尼角色方面，一定要去翠絲小食車到買三眼仔蒸包，打卡之選！鍾意廣東菜嘅，都可以去廣場飯店享用萬聖節特備菜單，共6道菜，啱晒一家大細去慢慢嘆。 

活動時間: 即日起至10月31日

文: Yanica