K迷Attention！銅鑼灣CEO旗艦店終於重新開返喇，港島嘅朋友又可以有返個蒲點。唱開K嘅朋友，相信都大概知道每個場嘅嘢食種類同質素有咩分別，而今次呢間嘅K Buffet都嚟咗個大翻新，多咗好多新嘢食，連原個芝士車胎拌炒扁意粉都有呀，吸引到一個點！細細聲話你聽，係得呢間先有咋！
去到個buffet區都幾surprise，空間感大，又夠光猛，巡下有咩嘢食先：
由門口開始掃過去，會有自助韓式部隊鍋、沙律、素食專區、甜品區等。甜品選擇都幾多，除咗cake之外，要推介下炸Oreo配雪糕同流心心太軟！炸Oreo雪糕真係成塊oreo咁加埋炸粉咁去炸，但食落唔太油，亦冇想像中咁甜膩，外層脆脆地，包住嘅oreo餅有啲似蛋糕質感，中間層cream趁熱食嘅話仲會流漿添，幾有驚喜，不過拎咗就好快啲食喇，雪糕溶得好快。
流心心太軟有人人大愛嘅抹茶、紫薯同朱古力味揀，唔好睇佢細細個咁，一刀切落去嘅流心效果勁澎湃下！抹茶味相對較甜，而紫薯嘅流漿食得到少少紫薯蓉，作為K buffet嘅甜品嚟講係幾唔錯。
流心芝士撻
更多【飲食潮流】： |
刺身區食到嘅刺身，同平時放題嘅有得揮呀！超大粒帶子、爽甜牡丹蝦、加拿大海膽等等都有。
另一個要mark實嘅係主廚專區，龍蝦酥皮撻，細細件但都有幾多粒龍蝦肉下，同區仲有即開生蠔添！生蠔嚟自日本兵庫縣，幾大隻同幾新鮮，肉質豐厚。
但數到最觸目，最多人想食嘅應該就係原個芝士車胎拌炒扁意粉喇！大大個巴馬臣芝士輪棟咗喺度，睇住師傅將意粉倒落去，用熱力溶化，再一下一下咁挖啲芝士出嚟，芝士控真係會忍唔住叫師傅挖多啲再挖多啲㗎！最後加埋parma ham同黑松露菌醬，令到碟意粉再香口啲。
CEO Neway
地點：香港銅鑼灣怡和街19-31號2樓至3樓CEO卡拉OK
備註：現時K buffet優惠為$209起，另部分菜式為星期五、六限定
文、相、片：Kar