呢間甜品店同Little Twin Stars合作，喺銅鑼灣開咗間期間限定嘅主題甜品屋，第一彈夢幻甜品登場後，最近再推出第二彈「星之新品」！包括層次分明加上棉花糖雲朵夠哂呃Like嘅雲朵芭菲，賣相夢幻嘅流星糯米糍及椰汁糕，同襯哂Kiki同Lala粉紅粉藍配色嘅星星冰粒梳打，Fans又要再嚟打卡啦。
 

銅鑼灣店限定新品

（左）Lala雲朵芭菲（$78），（右）Kiki雲朵芭菲（$78）

位於銅鑼灣嘅滿記甜品 x Little Twin Stars手造甜品屋即日起推出四款主題新品，當中最吸引嘅就係呢兩款各自以Kiki同Lala做主題，加上棉花糖雲朵同星星糖粒點綴嘅芭菲啦！上面仲有Kiki或者Lala造型馬卡龍同星星曲奇，貼合返成個夢幻主題。
 

而芭菲由一層層椰果、忌廉、脆脆、蜜糖星星、雪糕等材料組成，粉紅色嘅Lala雲朵芭菲有香甜鮮士多啤梨片，而粉藍色嘅Kiki雲朵芭菲就有味道清爽嘅原粒藍莓，甜而不膩。
 

流星糯米糍及椰汁糕（$88）

呢碟流星糯米糍及椰汁糕亦夠哂搶眼，大大粒流星其實係星型窩夫脆餅，裝住粉紅、粉藍同白色嘅椰汁糕。而流星旁邊仲有三粒糯米糍，分別包住特製嘅士多啤梨啫喱、藍莓果肉啫喱同芒果。再加埋星星糖粒裝飾，可愛度滿分！椰汁糕配埋椰汁一齊食更添香味，糯米糍亦相當軟糯香甜。
 

星星冰粒梳打（$48）

而飲品都有心思，特別揀咗Little Twin Stars專屬嘅粉紅、粉藍配黃色冰粒，分別係士多啤梨、藍莓同芒果口味，仲要粒粒都係星型！倒入梳打水後，就好似一杯星海咁。Sparkling口感加上水果冰粒感覺清新。
 

而且飲品附送圓形杯墊，一共四款唔同設計，集齊四款仲可以換到特別版杯墊㗎！仲未夠喉嘅話，銅鑼灣店仲有唔少得意精品等住各位Fans帶佢地返屋企呀。
 

加推至荃灣屯門

Little Twin Stars 糖不甩（$42）

好消息！為咗方便各位Little Twin Stars Fans，荃灣同屯門兩間分店即日起至5月6日，同步推出當中六款熱賣Little Twin Stars主題甜品同飲品呀！甜品有Little Twin Stars 糖不甩（$42）、Kiki藍莓豆腐花（$48）同Lala草莓西米露（$48）三款。
 

（左）Kiki粉藍雲朵沙冰（$48），（右）Lala粉紅雲朵沙冰（$48）

而飲品同樣有三款：綿綿奶蓋芒果冰（$48）、Lala粉紅雲朵沙冰（$48）同Kiki粉藍雲朵沙冰（$48）。特別推介兩款雲朵沙冰，粉紅色嘅Lala係士多啤梨沙冰，粉藍色嘅Kiki係雲呢嗱沙冰， 加埋一朵朵白雲嘅賣相，記得要相機飲先！
 

滿記甜品 x Little Twin Stars 手造甜品屋
銅鑼灣軒尼詩道500號希慎廣場3樓318-319號舖
活動日期：即日起至2018年5月6日

文、相、片：Cathy