又有餐廳聯乘卡通喇，今次係Little Twin Stars同銅鑼灣一間甜品舖合作呀，係咪你飛佛先？成間舖都係彩色星星、雲海，當然唔少得Kiki 同Lala啦，粉絲去到有排打卡！

無論甜品定飲品，都會見到佢兩個嘅蹤影，有時孖住出現，有時就單飛。最吸睛最靚仔嘅，毫無懸念，一定係椰皇燉蛋白配紫米露或者杏仁茶！喺清甜嘅椰皇上面，再放咗團輕飄飄嘅棉花糖，Kiki 同Lala就坐咗喺上面，好夢幻。

另一道都係雲上世界嘅甜品，就係馬豆糕喇。椰汁做雲海，蛋白脆餅做雲，而Kiki 同Lala就坐喺震騰騰嘅馬豆糕上面，好治癒。

另外，Kiki藍莓豆腐花 同Lala士多啤梨西米露，直情就係完美融合。成杯粉藍同粉紅色，仲有造型曲奇，又係呃like之作。

咖啡拉花、畫圖就見得多，中式糖水都有？紅豆沙同紫米露面頭加上帶有淡淡芝士味嘅奶蓋，再撒粉整出Kiki 同Lala嘅嘜頭，鍾意嘅仲可以自己隨心落埋星星脆糖，製造星空效果。

芒果脆脆窩夫同星形層層蛋糕，都係二者合體，一層粉紅一層粉藍咁，視覺效果唔錯。

飲品方面，就有星空梳打、綿綿奶蓋芒果冰、同鮮奶咖啡等，前者有漸層效果，後者就有造可馬卡龍添~ CUTE CUTE~

Honeymoon Dessert De Avenue
地址：銅鑼灣軒尼詩道500號希慎廣場3樓317-319號舖

文、相：Kar