生昌潮州海鮮酒家

营业中

休息中

Sun Cheong

3.5

251 食记

味道

环境

服务

卫生

抵食

12222

大围

$101-200

潮州菜海鲜酒家

156

冰鎮大菠蘿

5 已推介

奧志雷

等级4

2.1K

直接的士駛到大門口，落車即開飯，嘆到不得了。食客不太多，大量座位任君選擇，都係坐係室內較為乾淨企理，不用吸二手煙呢。

熱鹽焗烏頭，阿嬸話烏頭仲蒸緊未出爐，所以無得自己出去揀烏頭呢。有人鍾意凍食，都有人鍾意熱食。我即時滴汗，唔係掛？雖然都有食檸檬蒸、泰式明爐、潮州半煎煮、等等。食左十幾年潮州鹽焗烏頭梗係凍魚飯最好味，您唔好呃我啦。

新鮮熱辣剛出爐，味道怪怪的，朋友仔同我都覺有陣強勁泥味！魚肉勁濕滴水，溝稀黃油甘香味道。熱熱烏頭既黃油仍是液態，剪開魚皮已經令部份黃油即時流走，極度難食！專登荃灣飛的士過黎食烏頭，平時鹽焗烏頭已經完全放涼，魚肉乾爽嫩滑，結實多汁，黃油澎湃一滴滴，甘甜非常！無需要任何調味料，點天然黃油已經美味登天。

潮州醉香蝦，蝦殼蝦頭炸得透徹完全脆卜卜，連殼都唔晒剝，成隻食持別冶味！炒得鑊氣十足，蝦肉保持爽甜嫩滑，仍然帶點肉汁。蝦身沒有酒香，而蝦頭酒味芬芳飄送，好香口惹味好味道！

辣汁田螺，味道豐富濃郁，微辣醒神，依個汁用黎浸豬紅必定好味超合襯！美妙辣汁好味至極，調配神秘出色，其實因為個汁，所以才田螺食，對唔住喇田螺。田螺肉嚥韌，已被美味辣汁完全滲透，惹味刺激一粒接一粒食唔停口。我最喜歡食螺類尾部，甘香軟綿，最衰田螺尾全部都係蛋，想食都食唔到！

白灼鮮墨魚，經常未到晚市就沽清，機會黎喇飛雲！竟然仲有最後一碟，免強無幸福，食得到也未必好。師傅們發生咩事？兩款人氣招牌菜都先後失手。朋友仔都嬲嬲豬投訴，依碟野十足隔夜餸，乾爭爭硬掘掘，無鮮味無甜味，我都好有同感。口感死實，不香不嫩，半點肉汁也沒有，連墨汁都乾晒。肚裡面既墨魚卵變得硬實一舊舊，極度地獄劣質料理！

鹽焗烏頭，強調她來至元朗，仲有出世紙扣住添喎。一定要凍食，讓多餘水份蒸發，原汁原味連黃油通通一滴不漏鎖在魚皮之內。招牌菜穩陣無得頂，可能係全港最爆油最好食既烏頭。爆黃油閃令令，魚味特濃甜美，鮮嫩無敵失控搶住食！黃油斑斑肉汁發晒光，質地結實啖啖肉嬌嫩多汁。成條都係寶，頭下面的魚肝程圓錐形，爽爽的索索聲，超強鮮魚味道。魚春卵巢藏係魚肚內，黏黏肥美油潤滑滑，極鮮甘甜。每吋肌膚都被我啜得乾乾淨淨，最後只剩低光禿禿的一條骨及塊魚皮。

生昌花枝蝦棗，新鮮出爐金黃香脆乾爽彈牙，不濕不腍，陣陣鮮蝦味濃烈，脆脆花枝粒在內增加情趣，原味不點汁好味道。金不換炒蜆，老闆極力推薦，最敝完全唔掂！蜆出過水沒半點鮮味，跟蜆甜味海水咸味一齊全部流失，變得縮水細細粒。求其撈個汁兜兩兜就上碟出貨，無鑊氣可言，仲要過熟勁韌似橡膠！醬汁沒有金不換味道，激似花生醬，非常難食，中伏！

金湯華腿雞煲翅，鯊魚骨湯？有翅邊肉、雞件、豬腳、紹菜，味道似菜膽雲吞雞。無特別感覺，賣相靚仔討好，大量食材足料，翅針爽爽翅肉滑滑，雞皮滑雞肉鞋，紹菜爽甜吸湯，湯汁清甜平庸簡單。

豉油皇炒肥鵝腸，極度肥美，甘甜鵝油半溶滲透鵝腸中格外可口。咬掉肥膏品嚐，爽脆的態度使我不能自拔，熱騰騰不停吸啜，濃郁香醇豉油味，停不了的節奏。成抽大注突入，勁脆勁爽，豉油清新芬芳，味道滿意無投訴。搭上芽菜齊吃，爆水不腥嗅，味道口感都更豐富。

潮州凍蟹，提供不少蟹種選擇，麵包蟹、加菲蟹、泥蟹、花蟹、等等，就食最大隻既紅蟹啦。室溫紅蟹肉鮮甜無比，淨食可口，沾上浙醋酸咪咪更添風味。沙田紅燒乳鴿，剛剛炸起熱騰騰，雖然有點油光，幸運地皮脆肉嫩，香口啖啖肉不乾不鞋滴出肉汁，食得津津有味損手指。

生昌滷水鵝例牌，多年前食過完全低於水平，我向來好相與，比多次機會。我隻髀呢？消失的鵝髀，去那裡啊？例牌就沒有髀的嗎？非常肥美滑溜溜，比當年更高質更好味。生昌長進很多，大躍住的演繹。濃郁芳香，滷水味滲入每吋肌膚，鵝皮黏滑，鵝肉彈嫩。有一點點肥膏可以接受，咬掉算數。每趙都充滿鵝汁與滷水，味道撞得精采出色。試試酸醋，甜味太強不喜歡，多點酸多點蒜就更醒神啊。

滷水併盤，鵝翼巨形一開四，厚厚鵝皮超級黏嘴，包著結實美味嫩肉，特級好食。生腸還以為橙色生腸，竟然係白色似牛柏葉，爽脆無比有著淺淺滷水味道。墨魚半嚥韌半爽彈的質地，十分得意，天然墨魚甜味突出，沾上辣椒油更加滿足。大豆芽當然不會續條續條地嘆啦，大大注大大注地塞入口才夠豪氣，掛上大量滷水汁一咬爆水，不腥不嗅甜甜的啊。一心想食鵝肝，賣晒使我情緒低落。

椒絲腐乳炒通菜，我至愛的水通無可替代，無懈可擊。翠綠明亮的顏色，大大碌爽脆鮮甜，腐乳醬抱得通菜緊緊必要共赴五贜廟，來吧﹗乳香微辣不停地吸啜，暢快無比天堂的味道。

白灼螄蚶，跟金不煥同烚，其實完全無色無味喎，裝飾一下可以。打開螄蚶，發現蚶肉已不再血紅燦爛，血紅素遇熱微啡，都照樣狠狠地啜啦﹗在過熟邊緣，幸好並無大外，依然爽彈肥美帶鮮甜，真係有點安慰。試試那個醬汁什麼料子，太甜喇麻，完全都唔夾，比跟鵝旳酸醋更差，都係淨食原味可口得多。

滷水鵝肝併鵝腎鴨掌，價錢非比尋常的高昂。鵝肝滷味清香，不過熟仍保有嫩滑質感及甘甜味道，處理得宜。鵝腎完全被鵝肝比了下去，平平凡凡，偏硬不爽，一般唔難食。鵝掌沽清只剩鴨掌，照食可也。鴨掌瘦猛猛無肉食，無奈地齋損腳指，陰功。

椒鹽蒜香蝦，我要潮州醉香蝦喎，淨係睇外表已經知道錯啦﹗蒜香出眾惹味著辣椒微辣，醒神醒腦使得渾身是勁﹗炸到全身脆卜卜，連肉連殼一齊食，蝦味更鮮更濃更多汁。砵酒焗蠔仔，阿嬸仲讚我地識食，好野黎架！但食到我滿口粉滿口油呢。蠔仔細細粒，厚厚麵粉包著，粉比肉還要多，油淋淋受不了﹗配碟青椒紅椒更好味。

潮式辣酒煮螄蚶花螺，唔夠螄蚶用花螺搭夠，無所謂。潮式辣酒白色的嗎？第一次見喎。辣就不太食到，有少少酒味，味道太淡。反而食到花螺及螄蚶的純天然鮮味海水味，肥美飽滿爆汁水潤，非常難得。

翅湯蠔仔粥全走，翅湯感受不到有咩唔同，都係差不多乍喎。蠔仔偏瘦，湯汁味淡，粥底清爽，加胡椒粉及豉油更可口。將所有螄蚶去殼備用，要二次創作。極淡口的蠔仔粥混入螄蚶肉及螄蚶汁，鮮味即時爆燈﹗每啖有蠔仔有螄蚶有湯有粥，百花齊放，無敵大滿貫。

冰鎮大菠蘿，冰凍甜甜不酸透心涼。最初時阿嬸力推，我地都話唔要架啦，阿嬸又話得兩舊，黎到係四舊。仲話我地浪費唔食晒又唔帶走，係咪有病呀﹗

生昌潮州海鮮酒家 营业中 休息中

生昌潮州海鮮酒家

营业中

休息中