潮州城酒樓

营业中

休息中

好好味嘅反沙芋頭同芋泥🤍🥰話說我成家都係潮洲人，所以久唔久都會去食潮州嘢。有一日我爹哋懶醒咁話帶我哋去食潮州翅 (佢明知我都唔食翅既🤷🏻‍♀️), 去咗尖東一個比較舊式嘅商場，原來潮州城開業超過20年，上到去好有舊式酒樓嘅味道。其他嘢唔好講住，一定一定一定要嗌呢度嘅甜品！！！反沙芋頭同芋泥呢d心機野唔係度度都有整，呢度兩樣都有好開心！其他餐廳嘅反沙芋個糖皮好多時比較厚身搞到食落會好甜，最尾都會拎走晒啲好厚既糖就咁食舊芋頭。呢度個反沙芋頭真係一定要食☝🏻🤤 糖皮又薄又脆，成舊擺落口都唔會好甜，舊芋頭仲要超級軟糯，好開心🥰 然後講吓個芋泥，好香好滑😋 唔好理佢落咗幾多豬油，芋泥唔鞋口係好緊要架！精粹係啲白果度，預先烹調過既白果唔會太甜，可以中和返芋泥嘅甜味，d白果仲要粒粒都好煙韌，好味🥰 食完甜品仲有功夫茶飲，可以清一清d甜味同肥膩。返返去主菜潮州翅佢地個個都話好味，尤其是加咗芫荽同埋醋調味之後更加出色！然後水瓜烙同蠔仔粥都唔錯，蠔仔粥超足料粒粒都脹卜卜好鮮甜!

呢一間潮州酒樓好似已經開咗好多年，佢D潮州野都正宗好食嘅，鹵水鵝片、鹵水拼盤、蠔烙、水瓜洛等都唔錯，不過最有驚喜嘅竟然係佢嘅甜品，因為喺香港真係好難食得到好味嘅潮州甜品。先講個反沙芋，真係要好花心機時間慢慢整，火力太大又會燶，另外外面層糖又唔可以厚，因為太厚就太甜，會好難食。當然，芋頭本身都要夠靚，所以要食到好食嘅反沙芋真係一D都唔容易。芋泥真係令人又愛又恨，因為好食嘅芋泥一定要有一定份量嘅豬油去撈，咁樣先至夠香。另外好欣賞呢個芋泥有好多白果，中和返令食落去唔會咁滯。兩個甜品都有驚喜。