頭啖湯

营业中

休息中

天氣凍最好打邊爐😋見咁多人比好評，就第一次嚟呢間離天后站10分鐘腳程嘅餐廳。餐廳位置闊落，有卡位、亦有長枱照顧唔同客人，店內嘅通風系統都做得唔錯，唔會令我哋太大浸味、或者太焗。湯底選擇咗有名嘅滋潤椰子雞煲（$138半隻雞），非常香椰子味、仲有杞子、竹苼、黑木耳、蟲草花，非常足料，雞肉亦嫩滑！上菜速度好快，好快就為我哋準備好晒煲同配料，肉類叫咗手切牛肩胛、西班牙黑豚肉、脆鯇片同雙拼手打墨魚丸，牛同豬都好出色，好滑好香，夠晒鮮味！其他蔬菜配料份量好多，白蘿蔔加上椰子雞湯超好味😭兩個人都食到好飽🤘🏼不得不讚呢度嘅服務，老闆一見到我哋冇咗啲湯都好主動加，亦不時檢查我哋個煲會唔會太大火或痴底，服務貼心，絕對有下次👍🏻

一直以來都想嘗嘗椰子雞煲，聽聞天后的頭啖湯有得食，今日收工就嚟邊一邊～我地一行二人都叫左幾多野食😅包括三個肉類（食肉獸😛），兩個蔬菜同一個主食～椰子雞煲（半隻）：因為我地得兩個人，問左侍應兩個人半隻夠食就淨係要左半隻。雞煲好快就送左嚟，用砂煲裝住，所以熱得比較慢，但都好快有得食。雞係半熟，送上嚟煮多下就食得，唔會煲到老曬，好嫩滑👍🏻美國安格斯雪花牛肉（小）：安格斯牛嘅雪花紋好均勻，唔會太多油脂，食落帶小小椰子雞湯底嘅甜味，正！牛肩胛（小）：打邊爐點可以冇牛呢，所以我地又叫多個牛🤣牛肩胛較安格斯牛厚實彈牙，但兩隻牛都好好食😋西班牙黑豚肉片：唔知點解出面打邊爐食到嘅豚肉片總係咁大片😂可能係部位嘅問題？但食落都幾重肉味，就係太大片唔可以一口食曬😅娃娃菜：有切細到，唔係原塊上，比較易入口👍🏻經椰子雞湯煮過好清甜！金菇：次次打邊爐都必食！吸左湯底嘅味道後帶點甜味，不錯～芝士竹輪：好耐冇食芝士竹輪！一見到即刻order左，好好味但可惜有啲少，唔夠喉😂餐廳上菜好快，而且食材新鮮，下次可以再嚟。

知道呢度係中學同學老公開嘅餐廳我哋都未有機會試吓。今晚我哋就去試吓我哋都想食啲至寶嘅嘢所以就嗌左椰子雞煲。不過唯獨湯底太多油，可能係用雞煮，但係都略為多油。腸胃不好的朋友要小心。如果湯底可以在再濃香啲椰子味味道就更加突出。因為要留返個肚食其他野所以只係叫咗半隻雞。佢都有啲海鮮揀嘅真係好，我哋就叫咗桂花蚌，好快熟同埋好爽口。另外點可以唔叫我最鍾意食嘅紅薯粉呢，呢度嘅紅薯粉都係用咗個種闊扁身嘅，呢種薯粉同原形粗身嘅口感係一樣，都係會好煙韌好有咬口咖！我最鍾意！仲有響鈴卷啦，不過響鈴卷就唔係好夠脆身及食落感覺略為多油，好快一落湯底1秒就好快成個淋晒。而午餐肉切得好好一口一啖。另外仲有娃娃菜同牛肩肉，牛肩肉係比較有韌勁比起普通牛肉要有咬口鍾意有咬口嘅朋友一定要試吓呢個肉。而飲品呢就叫咗開胃醒神嘅檸檬柚子梳打，新鮮開胃檸檬🍋配上清新柚子梳打，打邊爐嘅油膩即刻一掃而空，精神都為之一振！不過如果餐廳嘅火力可以大啲就更好，打邊爐嘅話就比較要耐啲，因為而家略嫌有點太慢加上雞煲都有一定嘅有油份所以比較難滾起。但整體而言湯味鮮甜新鮮，同鋪頭名符合。