英記美點小食 (已結業)

每個星期六夜晚會都係新蒲崗呢頭，通常經過英記都見多人食，有時仲見到老闆娘親自包雲吞👍🏻英記都食過幾次，老闆娘亦都認得我哋🧡，佢同啲街坊都好熟成日見佢同人傾計打招呼。有時幫襯佢仲會送吓唔同嘅野食🤣👍🏻今次就同幾個朋友share嚟食，叫咗🔸淨雲吞 🥟🔸牛腩撈粗🍜🔸腐乳通菜x2🥬🔸京都炸醬x2（粗幼都叫咗）🍜🔸牛腩河🍜🔸炸魚皮🔹枱面嘅自家制醃蘿蔔都要試啊！酸酸甜甜有少少辣！夾返錢每人大約50幾到，多啲人share食會試多啲同開心啲！其實每一份嘅份量都好足！真材實料😋👍🏻亦都係大連鎖店食唔到嘅味道，一嚟夠哂人情味🧡二嚟真係老闆員工落手落腳💪🏻會再繼續支持🥳

新蒲崗搵食記，今次要試試傳統嘅街坊美食。英記應該算係街坊老店，簡簡單單嘅裝修加餐牌，所有野都冇過多修飾。店員（定老闆？）極力推薦嘅懷舊豬油撈麵，認真試豬油真係第一次。入口冇想像中嘅油膩感，而且好香口，會唔經唔覺愈食愈多，不過最正係麵底，極爽口又冇鹼水味（個人口味唔愛鹼水味）雲吞唔係大大隻個種，入面有豬肉有蝦，就似細個樓下麵檔嘅味道，好食但同豬油撈麵比就較普通。要特別講下店家嘅酸蘿蔔，腌得好好味，加上蘿蔔爽脆，好清爽最岩解滯，配合麵食好正，一定要試！特別一講店員好nice好熱情，難得感受到香港嘅街坊味，呢餐唔貴但食得好滿足！