漫花燈火 OMG (已結業)

適逢我家先生大壽之日，放咗喺我收藏夾好耐既靚靚打卡餐廳終於可以大派用場加上我哋兩公婆都鍾意食西餐。打去訂位兼預訂甜品時，職員好耐心咁樣解答我嘅查詢，每一個甜品都同我介紹一下，呢個服務態度係現時繁忙香港來講應該好少見。我覺得職員既態度對於餐廳係有一個好大嘅加分正值酒店外牆嘅裝修，導致食客要行後門，餐廳專誠打電話來向我地解釋，我覺得好好啊。裝修各方面都好好成為我不停自拍嘅理節。食物方面西蘭花薯仔沙律法包好好食，咖啡仲好好飲，先生大讚不過食物份量有啲小價錢略嫌有啲貴。

個個都黎打卡，我地又黎下，講真影相出黎係幾靚既，但係間餐廳其實好細，仲要個位勁唔就腳，係一間好噏耷嘅酒店一樓。餐廳一眼望晒，每張枱都會擺啲好靚嘅杯同碟，似係土耳其個啲ceramics ，係靚的，但仔細睇好多崩花，最美中不足係間餐廳咁靚但係個廁所好似公廁咁，佢係乾淨企理的，之不過真係同出邊好大反差。食物方面，只能話係合格。黑松露意粉都係幾香既，但係唔知點解係甜味的，好古怪，帶子係新鮮彈牙的，但有少少唔夠熟。牛肝菌意大利飯不錯， risotto 有咬口得黎唔會太硬。森林和原野個擺盤好靚，隻 lady bug 好醜樣，整走左先影相會好啲。綠茶蛋糕唔係太好食，冇咩綠茶香味但係有嗰陣苦味，tiramisu 裡面係雪糕，咁雪糕冇理由唔好食嘅。潘多拉的盒子其實似水母，係敲碎左之後可以食嘅糖，不太甜，但好硬，驚咬崩牙。個 tart 都幾好食，好重士多啤梨味。依杯士多啤梨三重奏又係個樣好靚，但說穿了只是一杯士多啤梨奶昔，索價 88，為左影下靚相。總括來講，影相影一次就夠啦。