影片
更多
2014-12-29
1984 浏览
一班同學仔去一日遊旅行，大班人玩完要食晚飯都幾頭痛！（12大8小）同學仔媽咪提議呢間食堂，我們大家都無所謂，最緊要好坐同唔會介意我們多小朋友！佢話一定無問題！呢間食堂有規定，首先要有房署職員訂位，要事先寫定菜！唔係即興上去食！菜式名稱都幾特別！好多都未試過！食堂仲好好話可以比我哋坐埋一枱！（好高難度）一日遊之後去到門口！大樓下係好普通嘅房署辦事處，只有一個牌寫住康樂會，要在樓下按鐘！上面先按掣開門！食堂在三樓，電梯只能上到二樓，所以要行上一層（行動不便就去唔到）上到去就見到個格局係中菜館大廳！（我唔知有無房）好金壁輝煌，店員指示大廳中間一張大枱比我哋（為了坐埋一齊，要坐圓櫈）最令人開心係食堂出口就有一間遊戲室！班馬騮即刻衝入去玩（有電視遊戲、積木、煮飯仔）佢仲比埋隔離張中枱我們放手袋雜物！好窩心！（外套手袋真係放滿成張枱）因為已經一早寫定餸！就即刻叫起！椒鹽陳皮中蝦：炸得鬆脆，椒鹽味惹味，唔覺陳皮味，但已經好味到「選」手指，中蝦大隻，蝦肉爽口彈牙！好好味油炸鬼咕嚕肉：咕嚕肉汁酸甜，玻璃色透明，油炸鬼中間夾蝦膠，再有醬汁包住，真係比個樣呃到，以為係咕嚕肉，咬落蝦膠彈牙，油炸鬼索汁！而中間
椒鹽陳皮中蝦：炸得鬆脆，椒鹽味惹味，唔覺陳皮味，但已經好味到「選」手指，中蝦大隻，蝦肉爽口彈牙！好好味
油炸鬼咕嚕肉：咕嚕肉汁酸甜，玻璃色透明，油炸鬼中間夾蝦膠，再有醬汁包住，真係比個樣呃到，以為係咕嚕肉，咬落蝦膠彈牙，油炸鬼索汁！而中間仲有真嘅咕嚕肉，一樣外脆內軟！今次唔用菠蘿，用蜜桃，雖然都係罐頭蜜桃，但食落口感厚肉啲，又juicy!其他三色椒爽脆！我哋連三色椒都清埋！
枇杷葉響螺燉竹絲雞：呢款湯未飲過，店員一大煲攞出來！煲蓋用紙包住！飲用時先開封！打開覺得湯水深色但好清澈！飲一啖好甜，初時都怕會好重藥材味，飲落味道又唔會！味道濃而清！飲完成身暖晒！
西蘭花炒班球：班片好厚肉，肉質好滑，唔腥，不過有少許骨！西蘭花爽口，有點硬，配雲耳淋身！唔會有玻璃獻！
雲耳蒸班頭腩：其實我唔係好識食頭腩，因為實在太多骨，只可以揀啲肉多嘅食到一兩件，味道蒸出精華！可惜魚鱗未打清！浪費了啲魚皮！雲耳索晒汁好好味！
紅酒燴豬軟骨：一大鍋，唔知以為係蕃茄湯，好濃好紅，中間有好多紅蘿蔔，炆得淋身入味，豬軟骨好大塊（成塊扒咁）中間軟骨有咬口，但唔會好硬，配蕃茄濃湯好味！
蒜茸包：原來有蒜茸法包配埋豬軟骨食，焗得香脆，麵包鬆脆，香草蒜茸好香，偏咸！好味！
魚湯什菌浸菜苗：奶白色魚湯清甜唔腥，好似牛奶咁滑，什菌煙韌，索晒湯汁，加菜心苗爽口！正！
紫薑炸子雞：以為係普通炸子雞，原來寶物沉歸底，下面薑汁紫薑先係精華！炆得入味嘅子薑塊，配炸得香脆嘅炸子雞！味道好夾！好驚喜！
生炒糯米飯：碟上！賣相普通（如果用瓦鍋上會更風味）以為味道普通就錯了，糯米乾身粒粒分明，有咬口但煙韌，真正嘅生炒（好多為了省功夫，蒸完再炒，已經唔同一回事）味道濃郁！唔使臘味襯托已經好好味！
薑汁榚：初時見竹籠上！以為係壽桃包，原來又係一個驚喜，薑味重嘅榚點，榚身熱辣辣糕軟熟煙韌！薑味好重！我就好鍾意！有朋友就受唔到！
腰果露湯圓：其實食到呢度，已經好飽！但又見個糖水好特別！忍唔到又食，比較少用腰果，通常係用合桃，鮮露打得夠滑，有腰果味但唔係好濃！中間有湯圓，湯圓唔係好大粒，外皮煙韌，中間芝麻餡香濃！好好味！
水果：蜜柑！
味道真係無得頂，份量又大碟！食唔晒嘅都要打包走！（我都未試過大家咁踴躍打包，真係太好味，唔捨得浪費）服務又窩心，店員都好好禮貌，收碟上菜換碟都好勤快！地方夠大舒服！廁所仲好乾淨！大家都食得好盡興，可惜只招呼會員！唔係真係要帶屋企人食多次！
张贴
