Greenhouse

营业中

休息中

炒芥蘭苗拌西班牙火腿 $88 芥蘭苗夠嫩，食落竟然甜甜地，好似落左蜜糖炒。雲霧芒果 $52 類似芒果沙冰，有落楓糖漿但飲落唔係好覺，面層有少少奶泡令賣相更好。菠蘿火腿豬肉腸薄餅 $128 餅底夠薄，邊夠脆，大力少少都掐碎，芝士香濃，菠蘿有汁，豬肉腸鹹鹹地，加埋火腿洋蔥等，口感味道都幾豐富。芝士焗脆脆肉醬意粉 $138 面頭鋪滿芝士碎但唔係好覺「脆脆」，但肉醬意粉係好食既。餐廳除左煮食區及水吧，仲有一個角落專做甜品，選擇又多又吸引，今次試左朱古力脆脆梳乎厘 $128，好大個！面層少少酥脆，內裡軟棉棉，加埋朱古力醬有啲似食緊心太軟。食物質素唔錯，但服務態度有待改進，例如問都唔問或者唔講聲就收碟，我其實仲未食甜品你就收走隻新碟係咩玩法？叫左侍應加水又無左件事同埋見到個侍應收蠟燭收到歪晒，倒瀉水都完全唔知！另外溫馨提示，餐廳雖然算是中檔次，但我覺得自己身處Food Court，非常應聲所以十分嘈吵。

Greenhouse就有如一間溫室，裝潢採用田園風格，內裡擺放了綠色植物，多了一點大自然的清新，為餐廳帶來一個悠閒、舒暢的用餐環境，讓人感覺自在放鬆。南瓜湯南瓜味道非常濃郁，口感幼滑，香甜美味。菠蘿火腿豬肉腸薄餅 ($118)薄餅批底非常薄，脆身少油，也不會過乾而失去煙韌感。一口咬下去時不會散碎。芝士、番茄醬的互相配合，再加上甜甜的菠蘿，不會出現過膩的情況。香辣龍蝦龍粉 ($166)芳香四溢，意粉軟硬度得宜，加上脆香蒜令香辣味更加突出更惹味，刺激味蕾，挑起食慾！黑松露意粉 ($138)黑松露香味濃郁撲鼻，意粉彈牙掛滿黑松露汁，每一口都香味縈繞口腔。奶油醬汁帶有濃厚忌廉及黑松露香味，滑溜又濃厚，讓人胃口大開！醬燒排骨 ($166)肉質緊實卻不乾柴，醬汁的味道滲透肉裡面，味道不錯。

朋友去完旅行買咗手信畀我，約喺銅鑼灣飲下午茶。之前嚟過呢間greenhouse飲下午茶，印象唔錯，於是帶朋友再來試下。訂咗下午三點半兩位，嚟到餐廳只有幾枱客人，即刻可以入座。通常去飲下午茶都唔會食午餐，所以覺得好肚餓，兩個人叫咗兩個tea set，再嗌多兩個小食 ，今晚又可以唔使食晚飯喇。😅下午茶好抵食，有十一款$58+五款$68嘅tea set，包基本飲品。我哋叫咗菠蘿豬肉腸薄餅同一個芒果班戟，跟住再單叫咗小食：可樂牛肉，同埋串燒牛脷。雖然都係茶餐或者小食，但係份量都唔細， 賣相同味道都好唔錯。尤其 覺得薄餅同牛脷特別好味。個人比較鍾意食厚切嘅牛脷，因為覺得口感好好多， 雖然呢度嘅串燒牛脷係薄切，但因為通常都係一串幾塊一齊食，所以都ok。總括嚟講，都幾滿意嘅；唯一要改進嘅地方就係服務方面；兩個茶餐好快就上咗，但係小食就十五分鐘都未有，叫侍應幫我哋查下，點知再等多十分鐘都仍然未上，再問先認真去查，原來係漏咗單。其實我哋只係叫咗兩個set同兩個小食，唔明點解咁少嘢都可以漏單囉。