竹家莊

营业中

休息中

位於左敦嘅竹家莊，第一次去食，餐廳都幾逼夾下，我地八個人要坐中間長枱，都幾逼下，啲嘢食都好貴下，68蚊一隻扇貝，30蚊一兩蝦，48蚊兩瀨尿蝦，50蚊兩蟹，我地叫咗椒鹽泥鯭，白灼花螺， 白灼魷魚，炒飯和芥蘭，一隻大蟹，四隻瀨尿蝦；椒鹽泥鯭，食落都唔錯都仲好脆下，連骨都可以食埋；花螺都新鮮，搽甜醬食都幾鮮甜； 白灼鮮魷 ，中規中矩 炒飯和芥蘭就真係一般，同埋都幾細碟吓；避風塘炒大蟹都算可以，風味都唔錯；椒鹽瀨尿蝦，就炒得幾惹味，都算大大隻，一隻開三舊，埋單三千幾，都無乜嘢食咗噤！坐得唔舒服，嘢都算好食，但比較貴，只係服務員都幾好招呼，都算食得開開心心！

同一大班朋友睇完戲肚餓搵宵嘢食，朋友介紹佐敦一間食中菜的，我未食過一於試吓，門口有不少泊車錶位，自己揸車嚟都幾方便，店舖尚算大，除咗正常三四人枱之外，有一兩張大枱可以容納一group人黎食。一坐低直接嗌左六小福前菜，分別係白灼豬脷、白灼海蜇、白灼大魷魚、白灼豬肚、白灼韭菜花、白灼粉腸。全部都好好食，本人尤其喜歡白灼海蜇，非常爽口，因為白灼嘅關係保留晒佢原有嘅鮮味，沾上佢附帶嘅海鮮醬同辣椒醬，十級推薦。之後再叫咗白灼花螺，啲螺非常甜有鮮味，唔算細隻。進入主菜部份，分別叫咗清蒸泥鯭同避風塘炒蟹，先講泥鯭先，相信唔係太多餐廳有得食，我都係第一次食，原來條魚咁細但係都好多肉，不過比較多骨食嘅時候要小心，但係啲果皮未入晒魚肉裏面，非常唔錯。個避風塘炒蟹都係好出色，佢雖然味道好濃烈，但係仍然可以保留蟹既鮮甜味，肉質非常鮮嫩，配埋避風塘又香又辣嘅味道，無懈可擊。當然價錢唔算平，但係一分錢一分貨，鍾意食海鮮嘅朋友唔可以放過。