讲起韩国菜，净系谂起炸鸡同邪恶拉丝？其实韩国人平时食嘢好健康，特别系韩国人一日三餐包括主食或配菜都会饮碗热汤，好养生㗎！因为每款热汤都有唔同功效，甚至连解酒汤都有。全店大厨丶员工都系韩国人嘅「韩屋」，就将咁地道嘅韩国饮食文化带嚟香港，日日嚟饮碗热汤丶食个拌饭，直头好似多咗个韩国屋企咁呀！仲要全部热汤都无味精丶无防腐剂，咁住家Feel 唔怪得叫「韩屋」啦！
韩国人一日三餐饮呢啲 十几款韩式热汤
店主话好想香港人可以食到韩国家常味道，为此真系落咗唔少工夫。全店有过十款热汤，全部都系用独家秘方煮制，仲专登由韩国厂家直送大厨自定自家传统配方汤包嚟香港，就算唔得闲日日嚟「韩屋」饮，迟啲仲可以买汤包返屋企自己煲。
釜山人最爱！釜山猪肉汤
大厨作为釜山人，就话当地最常饮嘅系猪肉汤，自然成为呢度招牌菜。热汤系先用猪骨熬成浓汤再放入猪肉同蔬菜，最後会加少少辣调味料同虾酱，辣辣地又惹味。
因为猪肉汤系招牌菜，店家仲有可爱小猪灯牌，绝对系打卡位。
香港人最爱！薯仔猪排骨汤
店主话香港人特别锺意呢款薯仔猪排骨汤，而呢款汤嘅猪骨味好浓郁。唔讲唔知，原来呢款汤喺韩国系解酒汤嚟㗎，喺度饮完酒再饮碗热汤都几正。
韩国人喺夏天饮！蔘鸡汤
我哋都知蔘鸡汤系韩国传统养生汤，但你可能唔知原来韩国人系喺夏天，特别系三伏天时饮蔘鸡汤㗎！对韩国人嚟讲，呢种系「以热治热」嘅方法，利用蔘鸡汤嘅热量逼出身体风寒湿邪同降暑。
韩国招牌食材！泡菜汤
主要系用熟成辣白菜，再加入猪肉丶豆腐丶葱等熬煮，酸酸辣辣，锺意食泡菜嘅人一定锺意，食晒成碗饭都得呀！
肉味十足！牛排骨汤
将浸泡嘅牛排骨去血水後剁件，加入萝卜一齐煮成，热汤有香浓牛肉味之馀，仲带萝卜清甜。饮汤时记着要食埋牛肉，全部都煲得入味软腍。
石锅拌饭
除咗热汤拌饭，呢度拌饭丶饺子同炸物都好正。先睇热辣辣上枱嘅石锅饭，大厨特别一层米丶一层芝士层层叠上，最後铺上蔬菜而成，令芝士平均沾上每粒米饭，完全系终极邪恶版拉丝呀！虽然多芝士，但「韩屋」依然贯彻食得健康，所以专诚用最少油分嘅芝士，食多啲都唔怕肥啦！
韩国拌饭
拌饭一定系韩国家常菜代表之一，主要用各种蔬菜丶炒肉丶炸海带等食材，拌匀饭粒入口。多种脆腍口感非常丰富，同时野菜又为肉片解腻，所有食材相辅相成啱啱好。
十几款饺子口味 韩国直送
其实「韩屋」可以话系热汤同饺子专门店，因为韩国人平时太锺意食呢两种菜式，所以「韩屋」除咗有热汤外，仲特别引入十几款口味嘅饺子，例如龙虾丶人蔘鸡丶芝士或者传统口味都有，有煎又有蒸。
蒸饺子好精致。
饺子由韩国直送，味道正宗，仲可以煎到外脆内软。
一个人嚟食又想过饺子口瘾，仲可以单点一只𠻹！三五知己就可以每款口味叫一只，咩都试下最开心。
炸物汤面
偶然想放纵一下，呢度仲有炸虾同炸猪扒，可配各种面类－素面丶荞麦面丶拉面同乌冬，为炸物解解腻。
汤面汤底都系无味精。
炸物香脆又唔油腻。
炸猪扒锁到肉汁，绝对系加分位。
韩屋
地址: 尖沙咀金巴利道69-71A号美园大厦地铺
电话: 26382832