旺角墨西哥天台酒吧餐厅 Reflect 推出新Menu！想喺旺角揾个空旷唞气位，呢间隐世墨西哥菜“REFLECT”就系区内激罕有大天台嘅餐厅，大到可以包场开Party或举办轻婚礼。日头可以望吓蓝天白云；夜晚同朋友饮酒慢食都好好Feel。
“REFLECT”位于12楼，一出𨋢就有个靓靓镜面墙呼应店名REFLECT(反射)。呢度由10年经验墨西哥大厨主理，创作多款Party Vibe墨西哥菜。想食个精致晚餐；又或坐户外边饮边食都得。
沙律 | Burrata
白雪雪嘅Burrata有明星乾酪之称，切开瞬间流出奶香乾酪真系好疗癒。将绵密乾酪捞匀沙律菜、车厘茄、鲜罗勒，口感清爽柔软好吸引!!
沙律 | Rocket Tomato Salad
另外一款沙律主角就系番茄!! 烧原个番茄加上火箭菜、松子、巴马臣乾酪，酸甜清新仲好有营养。
薄饼 | Seafood Pizza
自家制墨西哥辣椒酱就系呢个薄饼嘅灵魂，辛辣浓郁。而且新鲜海鲜唔少㗎，真系食到啖啖八爪鱼、蚬肉等，嗰种弹牙口感同一般雪藏海鲜完全唔同。
分享 | Beef Tartare
“REFLECT”有好多啱饮酒嘅小食，好似呢道牛肉他他就系Cocktail Party见到都会想食，就算女生直接用手拎起食都好优雅。脆脆法包多士加埋精制牛肉他他、巴马臣乾酪，口感又脆又绵㗎。
意粉 | Scallop Linguine
好钟意“REFLECT”咩都有得食，就算一班人饭局都唔使烦。呢道意粉嘅带子真系好抢眼!! 扁意粉又挂满自家制海胆汁，双重鲜味劲吸引。
主菜 | Enchilada
Enchilada系地道墨西哥料理，墨西哥粟米皮包住鸡/牛肉馅料，入面仲有2种乾酪、生菜、番茄、豆蓉，最后淋上墨西哥三色酱烘焗至金黄酥脆，啖啖邪恶拉丝又惹味。
主菜 | Pork Loin Chop
加拿大保湿猪鞍出名软嫩湿润，食之前用刀一切到底嘅手感就知几嫩喇。食落猪味浓零羶味，配埋烤焗甜薯、特色阿根廷香草酱，有种温软甜蜜感觉，约会晚餐必食。
甜品 | Chocolate Tart
呢度嘅自家制甜品即叫即制，好似呢款流心朱古力挞上枱嗰阵仲好热㗎。切开流出浓浓朱古力浆好有仪式感，配埋草莓冰淇淋解腻啱啱好。
甜品 | Apple Crumble Tart
另一款自家制甜品就有苹果金宝挞，香甜苹果肉同脆脆已经有双重口感，今次放埋入挞皮仲多咗种松脆感好正。
旺角饮酒热点！
“REFLECT”嘅室内、户外座位都坐得好舒服，真系未试过喺户外望住旺角夜空饮酒。除咗有红白酒、啤酒等等，驻场调酒师亦设计多款IGable鸡尾酒。好似泡泡烟嘅Fruity Garden(水果花园)、超梦幻还原阿拉丁神灯嘅Aladin(阿拉丁)都好有惊喜。
Fruity Garden(水果花园)
Fruity Garden好唯美，一戳开透明泡泡即弥漫仙气，上枱前一定要准备好拍片呀。Fruity Garden有多种口味选择—草莓／黑莓／芒果，再混合伏特加、橙、菠萝、桃子调制。
Aladin(阿拉丁)
完美还原阿拉丁神灯，入面系Rum、椰子、菠萝、柑橘调配嘅神秘蓝色酒，酸酸甜甜，斟酒嗰刻仲好梦幻!!
Pirates Daily(海盗日常)
电影世界中，海盗都会豪迈拎住木桶大啖大啖饮酒，而家都可以试吓呢种畅快感觉喇。木桶杯入面系Dark Rum、花生、坚果、奶油、柑橘调配鸡尾酒，独特果仁味几惊喜。
Xipe Totec
充满神秘气氛嘅Xipe Totec，以杜松子酒、茉莉花茶、梨、薑组成，完美结合柔和香辛味道。
Espíritu
好少见用Espresso咖啡整嘅鸡尾酒，仲系撞上Jack Daniels威士忌、橙汁、菠萝汁。强烈威士忌酒味中，隐约渗出咖啡味几惊喜。
REFLECT Restaurant & Bar
地址: 旺角西洋菜南街74-84号旺角城市中心12楼
电话: 94029697