吳記汕頭腸粉麵店

营业中

休息中

去到土瓜灣唔知食乜好，行吓行吓見到一間門面細細馬路邊嘅麵店。見到食汕頭嘢，又有吊龍呀咁，儘管試下。叫咗鮮牛肉乾撈粿粉，味道特別，起碼香港其他地方食唔到，肥肥嘅老板好nice,會續樣介紹啲嘢食，老闆話呢款乾撈面响汕頭每戶都識整，但每家嘅口味都唔同，撈麵個醬係用麻醬，沙茶醬，花生醬溝出嚟。牛肉係鮮牛肉，但因為為咗迎合香港人，啲牛肉用咗蘇打粉醃，無咗鮮牛嘅煙韌，但都畀出面其他嘅好味。仲叫咗個牛肉雞蛋腸粉，個粉漿係老闆自己調教，布拉即蒸，腸粉裡面有蕃茄，都幾鮮味，唔錯。老闆另外推介魚冊菜湯，未聽過咩叫魚冊，就試下，味道同魚皮鮫一樣，但外面包嘅係用海魚肉做，外皮薄，相比一般魚皮鮫口感好啲。下次經過可以再食。

住在土瓜灣四十年，第一次品嚐到由汕頭新鮮到港嘅吊龍，配上米粉已經都十分滿足。口感QQ軟軟綿綿，配上牛肉清湯非常滋味。食得出係冇點落味精，食完唔會後悔花118蚊食番自己家鄉嘅地道菜。難得有一間咁好味同高質嘅汕頭粉面店，我一定會再嚟呢間鋪頭試下其他嘢食。佢地好勤力，由朝早十點半開到晚黑十點半都未打烊，呢一區嚟講好食嘅餐廳唔多，講真一到十點幾想搵間有質素同好味嘅食店真係難過登天，我唔介意多花幾十蚊食番啲有特式同好味對得起價錢嘅中價食物。佢哋服務真係好好，有禮貌笑容仲同我講家鄉話，雖然識聽唔識講，但係好有親切感。希望佢哋可以好好經營落去。