永康甜品店

营业中

休息中

食完晚飯到附近的永康食糖水。價錢唔貴，質素都ok。點了一客綠豆麥米粥，綠豆沙味較濃，用料都幾足，可以一試。

見倒有人話老闆娘好好人,唔知果位人兄有冇將個店員當左係老闆娘,或者個老闆娘係對熟人至好吧!無可否認,食物既質數係ok,但老闆娘既態度真係令人不敢恭維。可能佢認為香港仔無乜對手, 對d客衰d都冇所謂卦,不過近來開左大佳b相信佢冇咁得戚了。講左咁耐究竟佢有幾衰?我見過有人客要求什果涼粉加花奶,佢既回應係一路加奶一路講: 我知, 你d人方蝕底之嘛!你小心落花奶食到你肚柯(唔通佢自覺自己d食物唔乾淨?) 大家有冇見過人咁做生意?所以我而家都見佢0向店我都唔會幫趁, 不過大家可以放心佢多數都唔落鋪。(本來評分有中, 不過食到肚柯緊係喊啦)

紅豆糕稔稔的，不太甜，幾好！

食過呢度d腐竹糖水幾次...幾好味..甜度適中，但好似豆漿啊

昨晚與友人來試了1)腐竹白果+湯丸-非稀埸貨,以顏色+velocity來看,是足料貨,多白果。食第1啖,口感唔差-滑,甜度剛好,少甜。不過湯丸就好一般因皮厚嫌外層有小小/輕微硬,但內皮都是軟的。2)蕃薯糖水-試了1件蕃薯,好腍,聽說好夠"薑"舖面不大,在短短吃1碗糖水的時間已不停有客來,真坐無虛席

一直幫襯左都有幾年，由最初只係幫襯佢門口果檔美味咖哩魚旦開始，果陣買魚旦、豬皮蘿蔔都要排隊，而且幾夜都有人幫襯直至賣清光為止。唔知咩原因又突然冇左？都失落左一段時間先可以平服返！不過，後來發現原來佢d 糖水都好出色(個人唔喜歡食太甜既野)，不過冬天既時候食佢d 蕃薯糖水同埋腐竹雞蛋糖水真係very good 架，甜味適中，又夠熱辣辣喎，食完成身暖晒~~ 而且我平時都見好多人食其他如芝麻糊、麥米粥、紅/ 綠豆沙及桑寄生蛋茶等。雖然款式唔夠同區其他2 間糖水舖多，但個人覺得比佢地好味，而且價錢平！舖頭較其他2 間糖水舖少煙味！另外一提既係佢夏天先至賣既冰冰糖水(老闆娘堅持要等夏天先賣)，即係d 生果西米撈/ 涼粉撈....，一杯好味既菠蘿紅豆冰只賣$12，真係好鬼正！d 紅豆又好味，冰冰又凍！最貴果隻什果涼粉冰(多數人叫$16)都真係賣$16咋，而且仲係即叫即整，不過就要有小小耐性等。我地一班朋友成日打完波都一齊去食冰，因為食完真係成個人都涼晒，而且老闆娘又好人，而d 伙計成日同我地吹水。

吃完泰菜之後情緒依然十分高漲, 不願回家.橫掂有friend係附近住, 不如睇下有冇得一齊吃甜品, 朋友推介便來到這裏.此店是我見咁多間最細既舖之一, 只有兩張檯.聽聞芝麻糊,和腐竹糖水呢度幾出名的, 牆上有好多張小朋友既相.十一時多, 大部份的甜品都售罄, 還有芝麻糊, 就咁決定.芝麻糊不知是否賣剩尾的關係, 有點燶味, 滑也不是十分滑, 好的是唔甜.但論口感覺得一品齋的較好.一邊吃一邊和友人談論工作, 總算是訴點苦.$10一碗, 附近街坊可以一試.

每一次過香港仔都會黎依到外買一兜花生麥米粥, 因為鍾意食依款糖水, 但樓下車仔檔又冇.材料都幾足好多花生好多麥米, 所以成碗野都好有口感, 岩哂鍾意食渣既我. 不過就太甜.

幾個月前和朋友行經附近~想食糖水~因為未食過這間便試下~味道幾好~雖然地方淺窄~但服務幾好~我和朋友想不到食什麼~店員還推介給我們~

這間甜品店都開左好幾年,之前門口位曾經租俾其他人賣淥串串小食,如魷魚,豬紅等,所以地方較為淺窄,亦因此而無留意到呢度的甜品水準如何.近來,自己因被家中所發生的事煩身(恕不能相告),要經常去避難,幾乎流落街頭,對於前景的不明朗,弄致情緒異常波動(可能患上了情緒病),幸好還有長頸鹿來安慰我,令我不致太孤單無助.上星期某晚,自己又要逃難,找了傻鹿來聽我訴苦,邊行邊講,最後我們倆黎左呢度,我只係飲左杯雞骨草,而佢就食左碗紅黑(紅豆沙溝芝麻糊),期間我都不知怎算,正想著可能要在街上睡一晚,愈想愈擔心,除了聲量大之外,情緒都控制不住,要男友又哄又笑,我才能稍稍平復.講真那句,若無佢在我身邊,我真不知自己會做出甚麼樣的傻事來! p.s.呢度d 糖水都幾平,堂食$9起,外賣都只係$11起,除左平時常吃到的之外,仲有腐竹雞蛋糖水,桑寄生蛋茶,花生麥米粥,最正都係什果涼粉同什果西米撈,同樣係$15,用上新鮮生果,更有火龍果在其中!