發興茶檔 (已結業)

又去尖沙咀，是夜去天香樓，又剛好抱恙，口淡淡的，想飲杯茶檔奶茶，就鑽左入海防道熟食中心。點知這裡選擇多，人更多，我在北京道入口行入，已經好「塞人」，見有位，就唯有就在門口這一檔茶檔拿拿聲坐低。又依希記起，這裡的馬來豬扒好似係招牌菜，就叫了馬來豬扒米，加杯奶茶。米粉份量不多，好在我亦無咩胃口。茶檔豬扒，不用說是雪藏貨。吃一口，所謂「馬來」，相信是那淡淡的沙爹味，不太夠味又油身，不好吃。其實要數好吃的豬扒，我幾時都話上環科記，當然如果新鮮及雪藏豬扒也吃不出的話，便沒話可說。米粉還有一陣「嗡」味，冷河過不清，可能是生意太好的關係。這個馬來豬扒，不用試。米粉麻麻，不過杯奶茶就幾好，茶味香濃又夠滑。另這裡的奶茶是店方落埋糖的，如果要飲少甜的話，要早揚聲。茶檔服務，當以效率為主，不見怪。埋單27蚊，其實行埋一檔就有即炒粉麵，再行入去又大把野食，可以試下其他。

自從上次食過正宗新野之後,一路都好回味...襯住近排天氣涼涼地,就同屋企人一行4人去食下午茶叫左2件豬扒包,1件正宗新野,4杯凍奶茶豬扒包黎到先知係用白方包,唔係用豬仔包,口感即刻無咁好,都係鍾意勝香園既豬扒蛋脆脆正宗新野唔駛講都係咁好味,我最鍾意食面包皮嫁啦~烘完脆脆地,咁埋咖吔,花生醬同一大塊鮮牛油,正,不過最好2個人share,因為都幾"流"呢到d凍奶茶唔好飲,太甜啦~4分係比正宗新野既~

流汗牛丸過後，當然要飲杯凍茶走，再試它所謂「馳名咖央西多」。當叫食物時，叫凍茶走，它以提醒的語氣說：「唔甜架喎！」我知，想飲嘛，已經有咖央，仲飲咁甜？食物上場，熱辣辣，西多中間有黃色咖央，上面仲有，一吃下去，甜得很，本人嗜咸味食物多過甜，再加上之前牛丸米，真的不能夠再完成，唯有剩下甜的部份。何以餐牌有食物，但沒有價錢，即使茶檔不算太貴，但點解唔加上價目，打上去又唔難者，莫非是茶檔文化，但又唔係間間係咁？奇怪？

已有一段日子沒有來了，星期日中午，辣椒女忽然想起這裏，便立刻再來食。我想都是叫回馬來豬扒米、馬來豬扒出前一丁、熱奶茶和正宗新。馬來豬扒出前一丁- 馬來豬扒的汁好好味，肉質唔會韌，還好有肉味；出前一丁新鮮煮起，當然係最好食的。熱奶茶- 很有茶味，奶味又唔會太濃，真係想不到都唔錯喎。正宗新- 可能當日唔算多人，老闆娘和我們談了很久，忽然看見這味名字很奇怪的食物，很好奇的問問老闆娘；原來係用麵包皮烘過，上面搽上咖吔、花生醬和一大件鮮牛油；因為烘過的麵包皮比較硬點，所以搽上這麼多醬料，也不會軟綿綿沒有力。味道很好，凍冰冰的牛油，加上熱辣辣的麵包皮，實在係太好味了，真係食完還想再食。下次來一定要再叫來食！可惜環境唔多好，夏天就更加唔好打算來，相信都幾熱。

o係橋底大排檔食野其實都幾有格調，而且d野仲好好食添！(1)蒜香吉烈豬扒麵：豬扒皮脆肉香，個麵轉出前一丁(加$2)仲正。(2)雞翼麵：雞翼大大隻，炸到金黃色，皮脆肉滑，記得叫佢雞翼同麵分開上。(3)豬扒包：唔用豬仔包，而用白方包，不過塊方包成吋厚，軟綿綿，夾埋豬扒，美味。(4)新o野：個名就係叫「新o野」，其實係烘麵包皮，上面搽咖吔，加大大塊鮮牛油。雖然好肥，但係熱辣辣既多士上面有凍冰冰既鮮牛油，咬一啖，令你交纏於冷靜與熱情之間，不愧為鎮店之寶。

聽左人地介紹, 講到好似好好味咁, 所以做完運動就即刻走黎食. 上次去錯隔離o個檔, 今次一定要試.叫左個馬來豬扒麵, 冇轉出前一丁呀(因屋企都有得食), 就食下出面o的公仔麵. 頭幾啖食o的豬扒覺得o的味好得意, 有o的似沙茶醬咁.唔知你地又覺得係咩味呢? 頭幾塊都唔un, 好軟, 不過之後就un 喇, 5 點幾去又見唔到有茶餐, 一個麵要HK$18. o的野飲成HK$10 柸, 所以我都係冇叫野飲. 隔離o個檔好抵, 十幾廿蚊一個餐(lunch, 茶餐仲平), 人地個吉列豬扒好好食, 成大塊都唔un, 炸得又好食, 又有野飲. 正呀.Anyway, 我見人地叫西多士, 或者我下次試下叫呢個食下都好, 應該幾特別, 加央西多士.

朋友告知在這裡的熟食檔幾好,不久前便和辣椒女來這裡試試.由海防道一路行入去也沒有多少人,心想這樣的地點,相信也唔會太多人去吧!當入到去才發現很多人在等位,真是嚇了一跳.我們叫了一個馬來豬排公仔麵- 豬排口感很好,好唔un,好好味.公仔麵就一般d,也不差.一個馬來豬排米- 當然也是一樣好味.兩杯茶走- 茶味唔多夠,可能奶落得太多了,但還算好味.價錢也唔算貴,值得再來.下次要問問它的電話和營業時間先.當然熟食檔的環境唔多好,這是要有心理預備的.