祥香茶餐廳 (已結業)

📷11月底就要歇业了，只剩下了怀旧的味道🍞营业20年有余的茶餐厅，因为老板要移民了，终究落下了时代的帷幕。❤️惭愧时至今日才有机会来一睹它的风采，或许过高的期待在现在普遍挑剔的口味当中，只能给这家店一个勉强及格的分数。大排长龙的外卖队伍，只为新鲜出炉的面包和蛋挞，尝试了一下鸡尾包，确实蓬松的同时也颇具口感。夹心是莲蓉，沙沙的口感令人难忘，甜度适中，不会让人有特别腻的感觉。😄其余的餐单就是普通的茶餐厅例牌，点了一杯鸳鸯，搭配午餐肉，煎蛋，和肠仔车仔面，分量比较小，价格也算实惠，40蚊带着情怀尝试一下还是不错的。

「西環三寶」之一祥香茶餐廳 屹立逾半世紀 又一老店敵不過時代巨輪 2022年11月30日 迎來最後一天營業在它宣布結業之前 餐廳乏人問津宣布之後 日日人龍湧現說真的 食物的味道不怎麼讓人回味蛋撻是唯一值得回味的沙嗲牛肉麵 火腿炒蛋西多士 都沒有什麼特別我想 大家回味的 是那老香港情懷但我們總是一次又一次 快將失去才懂得珍惜讓我們學會 好好珍惜那些謹存的 回憶的味道 好嗎?

自細在西環長大的我，兒時已經在【祥香】這老店買蛋撻及麵飽了。當時最出名下午三點鐘就有新鮮出爐蛋撻，熱辣辣香噴噴若果買不到蛋撻，就會選擇蛋糕或者麵飽了。蛋糕方面多數會揀紙包雞，勝在夠軟熟👌而麵飽方面，有錢便買叉燒餐飽，勝在夠熱，有足夠蠔油味和口感，但餡料不算太多，其次就是旱有的蓮蓉雞尾飽及出爐菠蘿飽了，也是熱賣品之一。因為本人搬離西環已經十幾年了，上次去【祥香】食嘢，眨眼間已經七年了。上個月據聞這老店將會在今年十一月尾結業，所以，上個月下午茶時段到來，迫滿了街坊及客人，同時，食物在三點半時已經估清一空了，只有被迫離開啦今朝為趕【祥香】在結業前幫襯多一次，趕早坐港鐵到來堅尼地城，今日很幸運地不算太多人，可以舒舒服服地獨自享受呢一餐啦今次我點咗一個特餐。包括餐肉煎蛋、沙嗲牛肉公仔麵再配上凍好茶，只是等了短短數分鐘，這個特餐便到齊了以前特餐有跟方飽🍞或者餐飽仔🥯，但今次所有餐都減省了餐肉煎蛋味道普普通通啦沙嗲牛肉不是放在公仔麵上面，而是相反在公仔麵上面，底是沙嗲牛肉🤔公仔麵煮得不會太焾很挺身而凍奶茶也很夠茶味十分夠冰凍一面食嘢，一面睇懷舊的裝修價錢方面只是普通啦👌食飽飽後，便要講句Bye By

祥香茶餐廳 🉐身為幾乎個個堅尼地城街坊都識嘅茶餐廳 - 唯一僅存嘅「西環三寶」，以新鮮出爐嘅蛋撻、蓮蓉餡雞尾包、菠蘿包同「茶走」而係呢區屹立超過半個世紀🍞 但都就嚟消失喇😢踢對拖鞋🩴 落樓買個菠蘿油，吃個蛋撻，飲杯奶茶，坐低睇下報紙📰 同老闆伙記傾下計，就係上一代香港人嘅日常🌞菠蘿油🧈祥香王牌之一嘅菠蘿油，雖然嚟到嘅時候唔係岩岩出爐，但暖笠笠嘅菠蘿包，加埋凍冰冰嘅牛油，香甜不膩，冷暖交融🍍$10一個嚟講算幾抵食，不過味道就冇話好驚喜，行過買個下午茶都不錯，但如果專程過海過嚟食就可能會失望了🙈餐廳為左維持新鮮製作同熱辣辣嘅口感，即使成本係膠袋嘅十倍，外賣仲係用雞皮紙袋🛍 雖然紙袋會滲油，而比較容易沾污雙手或者其他物品，但同時因為比較「疏氣」，所以可以防止倒汗水焗係袋入面，而沾濕麵包💧一份堅持係承傳文化，亦係環保♻️

兒時在西環長大的老公，爸爸會帶著他來到祥香吃東西☕️🍰🥪這裡有很多他和爸爸的回憶👦屹立在西環近半世紀的老店，宣布了本月尾便結業😔今天專程到來，除了懷緬過去，還來過集體回憶👌🏻店舖門前有個餅櫃賣自家製的港式麵包及蛋糕🧁，每天出爐兩次，由於供應有限，故有限購令添🤣⁡大部分客人都會吃蓮蓉雞尾包、菠蘿油和蛋撻。今天我也豁出去🤣不計卡路里、亦不理會健不健康的問題，點了一個雞尾包及一個椰絲奶油包😘⁡雞尾包中間內餡是配以蓮蓉餡，這不是隨處可吃到喔😃⁡椰絲奶油包非常鬆軟，奶油香滑😋⁡只可惜過了這個月，便沒有機會再品嚐了😔😔⁡⁡

🔸️ 祥香茶餐廳 🌍 茶餐廳📍 西環堅尼地城卑路乍街107號香港得番幾間有閣樓既茶記，呢個係其中一間，但今年十一月尾要結業，大家應該又會去瘋狂打給一番。今次有幸座樓上雅座既卡位，慢慢座，唔洗迫。🗨️ 常餐沙嗲牛肉麵牛肉量足夠，但唔鍾意食佢個沙嗲汁，咸得黎無沙嗲味🗨️ 新鮮出焗蛋撻等到2點9先有蛋撻出爐，樓下已經有好多人排緊隊，好在我地都仲有。佢地只賣餅皮蛋撻，個餅皮鬆化，唔算太重牛油香，蛋漿甜度合適，滑溜，但本人鍾意甜多少少，出爐蛋撻永無後悔既🗨️ 蓮蓉雞尾包雞尾包入面加蓮蓉，比較獨有但唔覺好左☕️ 熱奶茶好飲呀🤩 奶茶掛杯，色澤茶啡，靚呀好鍾意。大家飲奶茶一定要落糖，甘先帶得出個茶香味，更好飲架

真正浪費了上兩代人的心血，食物質素完全唔得，消耗大家的集體回憶。 既然都決定結業，就努力做好餘下日子，當尊重家業，尊重支持的客人，失望失望😮‍💨👋🏻👋🏻👋🏻👋🏻

經過堅尼地城，見到一間充滿懷舊風味的本土茶餐廳，毫不猶豫決定入去幫襯，只係嗌咗一個蛋撻及一杯茶走小糖少奶，已經回味無窮。心想：下次有機會一定要再幫襯。蛋撻應該是新鮮出爐不久，但已經買咗一大半，剩返的茶數量已經不多。好彩的我，可以能夠食到一個。蛋撻蛋漿依然非常之熱辣辣，店員上枱時亦吩咐小心焫親咀。但他是曲奇皮，曲奇皮做得很薄而且平均，可見師傅嘅功力應該相當深厚。蛋撻口感唔錯，試吓佢杯奶茶，我叫了一杯茶走少糖少奶，呷一口，已經感覺到茶之香、醇、滑。我對茶走的滿意程度，比蛋撻更高。下次的要預留quota，比一杯正常茶走。見到其他人食下午茶餐的公仔麵，見到麫質QQ，不會浸得太淋，心想：再要留一些quota比公仔麵。

大學住宿舍時成日會去祥香食下午茶，估唔到十幾年後佢竟然就快光榮結業😭。呢度嘅奶茶、蛋撻及港式麵包都是全港數一數二的好食。今日難得順路去堅尼地城食lunch，即刻決定要要去祥香食飯，希望喺佢執之前點都要食一次。一個簡單的常餐、一個菠蘿油、一杯凍奶茶，都充滿著傳統的味道。而樓上雅座的閣樓亦非常有傳統特色，呀姐落單時大叫食物簡稱尤其親切☺️。最初坐低未有蛋撻，食到最後突然呀姐話蛋撻出爐，仲要係我至愛嘅曲奇皮，即叫一個！熱辣辣的蛋撻皮脆餡滑蛋香豐富，邊有得輸！輸在時代巨輪下，傳統老店被迫結業😢。希望祥香會喺第二個地方再續，延續這傳統的香港味道。

大隻仔今次覓食嘅店舖就係💥 祥香茶餐廳 💥 又一間老店結業，係西環超過50年歷史嘅「祥香茶餐廳」宣布做到2022年11月30日，店員話老闆退休移民，所以結業。🥲🥲大隻仔今朝一大清早跑到去香港島最西邊堅尼地城，趁未結業之前，食全港獨家嘅蓮蓉雞尾包。 ⋯⋯⋯⋯⋯⋯⋯⋯⋯⋯⋯⋯⋯⋯⋯5⭐️ 超班3⭐️ 一般1⭐️ 差味道 ⭐️⭐️⭐️抵食 ⭐️⭐️⭐️⭐️服務 ⭐️⭐️⭐️環境 ⭐️⭐️⭐️⋯⋯⋯⋯⋯⋯⋯⋯⋯⋯⋯⋯⋯⋯⋯⋯🔥 特餐 （沙嗲牛麵+火腿煎蛋+茶走） $39沙嗲牛肉麵欣賞祥香嘅執着，咁多年都係將沙嗲牛肉放喺公仔麵下面，可以使麵質唔會過冧，而且湯底會浸滿沙嗲牛肉汁嘅味道，沙嗲牛肉汁香濃，但牛肉不夠滑，少少韌。火腿煎蛋味道正常。茶走茶香濃帶少少苦澀，奶夠香滑。🔥 蓮蓉雞尾包 $6全港唯一獨家蓮蓉餡雞尾包，麵包剛出爐，新鮮熱辣，麵包鬆軟，蓮蓉餡少不均勻，唔會過甜。溫馨提示：因為結業關係，人流太多，今個月不供應飯餐，早餐特餐都不供應餐包。祥香茶餐廳以味道來講，好好食就唔講得上，食既係一份情懷同歷史，人情味，兩層嘅茶餐廳設計喺香港真係10間都數得出。

摸門釘兩次，明明話左唔會再黎，點知姣婆守唔到寡（其實成日都係咁）😉今日去覆診，研究我今日既行程，點知就係夾到時間可以食個快早餐（都係唸住食個包飲杯奶茶）誰不知一早第一轉啲出爐既面包已經賣晒，要等下一轉1230😱🤪好彩重有旦撻，重有少少熱😋之後我plan好左去附近睇番場戲，時間啱啱好完場再過黎買我最想買既蓮蓉雞尾包（特別啲丫嘛）重要啱啱出爐熱辣辣，忍唔住即刻要食咗佢😝）見住佢成盤包熱辣辣拎出黎，感覺好正。如果師傅肯教我點樣整就好。不過始終我都係比較鍾意普通椰絲餡，縱然佢啲蓮蓉唔太甜真係唔係好明幾蚊一個包都可以好好食丫。點解coffee shop 果啲要賣到咁鬼😅我真係好鍾意茶餐廳架。

僅有香港懷舊茶餐廳知道11月30號結業 所以突登拜訪😆去到餐廳門口已經有兩條隊 一條就等麵包蛋撻出爐 另一條隊就等位堂食因為卡位會搭枱既關係 所以都好快有位 不過人齊先入得座啊！個日星期日14:00就賣哂所有麵包🥲🥲諗住食最出名既雞尾包蓮容餡🥺仲有沙嗲牛都賣哂😩不過唔緊要 常餐都好好食 配煎蛋火腿 雪菜肉絲米粉 唔似一般茶餐廳 係有調配過既西多士好邪惡🤪蛋漿炸得岩岩好 唔會太淋 配花生🥜醬同埋糖漿 好味道雞翼米粉 （呢個係不跟餐）雞翼炸得岩岩好 又唔會好乾 不過雞翼唔算太咸同入味 （個塊火腿係朋友比我埋 唔係跟餐架😆）呢度既奶茶好出名😚我就叫左茶走 加煉奶感覺係甜d又滑d果然係好香好滑🥹唔怪得好多都外賣奶茶蛋撻曲奇皮 本人鍾情酥皮多d 不過曲奇皮都鬆化香口 但蛋味唔係太夠🥹🥹茶餐廳係最代表到香港本土既文化 好多舊客都會緬懷以往既回憶 飲杯茶 食件撻 或者唔係著重食物味道 而係獨有既人情味！希望會再二訪食到雞尾包+沙嗲牛😛😛

我自出世起已經喺西環住，小時候成日拖住阿媽隻手去茶餐廳買奶茶，嗰陣媽媽已經話佢嗰度啲奶茶好好飲🤣直至電視話佢11月尾就結業，阿媽話想去緬懷一下，所以就特登由新界返去港島一轉我哋去到西環已經係下午茶時段，所以就嗌咗兩個茶餐我自己叫咗豬扒公仔麵，配熱朱古力本身我仲叫咗員工話碎上，點知睇過份量基本上都唔需要🤭因為都幾細塊下，我一啖可以擺晒落口。公仔麵一般啦，食得出唔太似係出前一丁，同埋個份量都幾細，對於我嘅食量來講，應該要食三個😛。唯一可以讚嘅係嗰個公仔麵煮得偏硬身，所以個咬感幾好，相對上比較煙靭。至於蛋同火腿就唔使多講🤣普通嘅味道好啦，之後講吓我阿媽嗌咗薯餅，加雞中翼配凍奶茶反而佢呢個嘅薯餅都真係炸得幾出色，冇咩千年油嘅味道，表面非常脆身，外脆內軟，同埋熱辣辣！入邊啲薯仔都幾香口反而炸雞中翼就炸得比較乾，入面啲肉基本上都冇咩味道同肉汁，但係雞皮幾好食🤣🤣阿媽都話佢其實係志在飲杯凍奶茶，真係要用佢嘅工具先可以拉得咁香滑嘅奶茶整體嚟講，只可以話做到普通茶餐廳嘅水準，冇咩特別好食或者唔好食，主要就係食佢個舊式茶餐廳嘅環境，同埋舊街坊嘅情懷，雖然老闆都已經唔認得我阿媽了😂😂但我哋自己就當係一個回憶

只不過係之前兩個禮拜嘅事，宣布呢間老牌茶餐廳11月30日就會結業，今日只不過係10月22日下晝2:30左右，已經大大張紙貼出嚟客人眾多，超出咗佢哋預算嘅食材供不應求提早閂門！😵‍💫我係專登由銅鑼灣搭叮叮過去，其實早兩日已經去過一次，不過當日知道自己真係遲咗（5:45先到達），佢閂咗門都情有可原！不過今次⋯⋯⋯以我嘅記憶我應該去過一次食過佢嘅菠蘿包奶茶，我係比較鍾情呢啲舊式嘅茶餐廳，佢仲有兩層，更加難能可貴，仲要有埋即製新鮮麵包喺門口賣）😍推介佢嘅獨創蓮蓉雞尾包，我諗想試都冇乜希望，可能要一早去到或者平日嘅時間？可以想像真係the last嗰日會發生咩情況，就好似九龍城嗰間。唔怪得啲店主咁樣講嘅「平時又唔見啲人嚟幫襯，一聽到話結業就蜂擁而至，有嘅時候又唔珍惜⋯」唏噓嘅係以後剩返嗰啲連鎖店無哂特色。

自小在西環長大，中學時期早上喜歡到祥香買新鮮出爐菠蘿包，趁包熱暖吃最是滋味。成年後偶然也來吃早餐和買包點，我承認吃的是一份情懷。近日得悉店舖即將結業，昨天（10月13日）路過，見門外只有2人排隊，就上前買2個菠蘿包，包是沉甸甸的，有一定重量，很開心是剛出爐的，所以仍然溫熱。帶回家後立即自己加片無鹽牛油和少許岩鹽製作「菠蘿油」，味道和感覺仍是中學時的味道（但中學時沒有加牛油的）。無論去哪一家店，菠蘿包和蛋撻必定是趁熱才好吃。祥香是第一家店，讓我當年認識何謂菠蘿包，能夠在它結業前再品嚐一次，而且美味依舊，很是感動！（雖然隨著店舖結業，不會再有人看到這篇文章，但就當作是個人對祥香的簡單告別和懷念吧！）