茶皇殿

营业中

休息中

星期日訂左晚飯一張14人大枱，去到同你講沒大枱，叫你分開2張枱坐，我立即話咁大間酒樓冇大枱？之後經理又安排到一張大枱坐，坐底左因為未齊人，我們叫留定片皮鴨2食+一條班魚和其他餸一供十樣，十全十美，到人齊後叫上菜，服務員又話忙記幫我們留片皮鴨，又話賣完，之後我們叫了乳豬全體，上到來原本來乳豬全體，得20零件，只有2隻腳，我問服務員，這是乳豬全體嗎？點解得咁小和2隻腳？服務員話係咁樣，之後走左，因為食物份量太小，之後我們想加餸叫服務員，服務員又扮睇我們不到，以後都唔想去服務這樣差的酒樓食飯。

大年初一，緊係同屋企人一齊飲個靚茶啦，嘩！勁多人！同行6個人叫咗14個點心+1個小菜+1碟炒粉麵，有冇真係咁餓😂。我哋叫咗以下點心，大部分都好食❤️蜜汁叉燒包👉🏻餡料juice❤️墨魚汁脆皮腸粉👉🏻仲好脆❤️黃金流沙包👉🏻流沙就比較稀❤️蟹籽燒賣皇👉🏻彈牙！❤️鮮竹牛肉球👉🏻正常❤️四寶滑雞扎👉🏻正常❤️蝦餃👉🏻好食❤️咸水角👉🏻香脆，仲熱辣辣添❤️燒腩仔👉🏻皮脆好食❤️小炒皇👉🏻好食，韮菜花部分有少少老❤️鮮蝦腐皮卷👉🏻香脆，熱辣辣，好食😋❤️一口葡撻👉🏻好食，但唔似葡撻🤣💛️鮮蝦腸粉👉🏻皮比較厚💛遮仔啫喱糖👉🏻正常💛菜苗餃👉🏻正常💚咕嚕蝦球炒麵👉🏻勁古怪，好唔夾，又甜又酸又咸😂整體來講：大部分都好食，會再食，因為有老闆請客，所以唔知幾錢，不過應該唔平🤣

最差ge 餐廳送錯野食，打去問佢職員一個職員話原本ge 食物無哂，所以俾其他 （ 可以咁樣？😓）另一個職員又係唔係無哂，係有人搞錯叫我自己去酒樓拎返話佢地酒樓好忙如果我自己唔去拎， 佢地就無野做到😓送黎ge 野食又凍又難食😓

前幾日早上同老公去了住天水圍的姑仔家打麻雀，她先同我們在天水圍天耀廣場一樓的茶皇殿酒樓飲茶。 因重係早茶時間 ，我們四人叫了抵食的孖寶餐;1個醒神孖寶($33.8) :鳳爪排骨飯，鮮竹牛肉球 ，另外3個至尊孖寶($46.8一個):蟹籽燒賣皇，斑蘭雪山叉燒包，四寶滑雞扎，養生藥膳豬手， 墨魚汁脆皮腸粉，車打芝士海老春卷。 八個點心中除了墨魚汁脆皮腸粉， 班蘭雪山叉燒包和車打芝士海老春卷， 比較有特色及好味外，其餘的點心味道都是一般 ，但與價錢嚟講，都是抵食的。

避風塘炒蟹夠香又惹味，一碟有兩隻，蟹蚶好大隻。原本叫了蠔但剛好賣哂，改了菠蘿咕嚕肉也不錯，酸甜開胃有水準，晚飯優惠可以一元叫一碟乳豬，味道很好，皮脆肉嫩有脂肪，去骨方便易入口，今餐味道很滿意。

個個樓面、部長都黑口黑面！好似欠咗佢咁！嘢食又唔係特別好食！2歲都話要收茶位錢！哩間嘢，中伏一次就夠！一定唔會有第二次！如果想幫襯，請三思！行多幾步 隔離商場就有其他酒樓！唔好懶嗰幾步路！對自己唔住呀！

昨天第三次去飲下午茶，員工由知客到收錢都一樣差劣服務態度，冇下次。1. 知客令在場等位一位女仕忍不住問知客有必要眼神那麼兇嗎？真的問得好！ 2. 個待應女人，你問佢什麼都沒有，態度給我感覺是不要煩我. 3. 個收錢員祇告訴我要付多少錢，我問單呢？才不情願攞出黎，尼班人到底有冇受過在職培訓？

今日去食點心😍 平時都係同屋企人飲茶先會食 好耐冇食過啦 呢一間點心幾足料 👍 平時叫牛柏葉有半碟都係南瓜 呢間係俾真材實料嘅今次試咗以下幾道菜:1. 足料牛柏葉 2. 山竹牛肉球 3. 豉椒蒸排骨 4. 鵪鶉蛋蝦餃 5. 避風塘蝦餃 (可以唔試😅 純粹拎左粒蝦餃去炸 同避風塘完全冇~關~係~) 6. 南翔小籠包

何文田廣場分店 每次食完收錢嗰刻嗰兩個阿姐都黑口黑面唔知以為係老細有時唔識講total幾多錢唔比單你對淨係直接收完錢之後 我比支付寶我身為客人唔會知佢係咪已經收完錢我企喺度等佢個樣好愕然 問係咪要單？大嬸啊 我點知收錢手續完成咗未咩 都未彈個收款完成嘅訊息出嚟個阿姐嗰邊快咗少少見我係到等 就即時變啤我 你都要講一聲OK啦 多謝晒乜都唔講 你都要示意返俾個客知收款完成稼我點知收錢手續完成咗未咩仲有其他問題我都費事講好心嗰兩個阿姐唔想做冇喺度獻世啦塊面西到乜咁 多謝晒對單乜都唔識講淨係請來收錢對數 依家咁嘅時勢駛請佢哋

其實都差唔多係一年前去食，原本佢實在太難食，係完全冇心機打食評！因為連相都冇影！但係最近行過，諗諗吓難食係咪更加應該要寫食評比更多人知道唔好中伏？雖然食完已經過咗一段時間，但係令我非常深刻，佢竟然可以做到成餐飯冇一樣嘢好食！😱😱😱😱 呢個難度都幾高😂最記得係食普通煎腸粉，問佢拎花生醬/麻醬，佢竟然話冇！！ 喂大佬咁大間酒樓食腸粉竟然冇麻醬呢樣必須品？？我去街市小食檔買幾蚊一條都有啦！🤷🏻‍♀️仲有就係食鳳爪排骨飯，個飯竟然係生米！超硬 完全未煮熟🤮 食咗兩啖我都唔知點食落去⋯⋯⋯⋯再者，好似標榜係招牌嘅流心奶黃包？無可否認佢個樣真係做到好靚，黑色包皮 + 金色素點綴✨ OK呢個外貌係唯一好評😅 但係一搣開，Sorry 係一啲流心都冇嘅！唔係誇張，呢個真係人生食過最難食嘅茶樓！咁都開到有人食，真係顛覆晒我嘅認知🤢 不可一不可再！貼錢我都要考慮吓～❌

整體都算係普通既一餐茶 其他點心都正正常常但十蚊一個既小籠包 一打開個籠已經見到三件好似發育不良既嘢 同想像中好大出入 賣相已經唔好 但食落去更災難 一咬落去層皮勁厚 湯好似比佢蒸乾左一半咁 最頂層皮入面竟然可以仲有粉價錢貴但不能接受既水準

我係外賣平台 叫左外賣，轉左3個外賣員，以為又係外賣平台 出事啦，打去你間野問情況，劈頭第一句叫我唔好再叫人黎，話夜晚無點心，大佬！咁你又開住部機，又接我單！你無野下嘛！掉左部機佢啦！

天水圍難得有一間幾高質又平靚正嘅茶樓🫖🫖☕️，梗係要多啲去幫襯下啦😋😋黑金流沙包 -7.5/10一啖咬落去，熱辣辣嘅流沙餡料好似熔岩咁呼之欲出😍😍蛋散 - 7/10金黃酥脆，如果用桂花蜜就更好了😂😂鵪鶉蛋燒賣 - 7/10食得出用料唔馬虎，調味簡單但又原汁原味鮮蝦腸粉 - 4/10裏面嘅翠玉瓜蒸唔熟，味道一般豬腳薑 - 6/10原籠馬拉糕 - 6/10

老媽子表示冬大過年，一年一次當然要慶祝一下啦！既然出不了去吃飯，也要在家好好做節！這次就去了家附近的酒樓買燒味加餸！古法豉油雞一隻節日慶祝沒有雞總感覺好像差一點，所以家裡每次都會買一隻雞回來吃的！這次就買了古法豉油雞，雞很大的一隻，份量挺足的，從雞皮就可以看到這個豉油雞很入味了，雞肉也挺嫩滑！還有的是這裡的雞沒有血，是浸得比較熟的，所以怕血的人也可以接受！燒腩仔一斤這個媽媽比較喜歡吃的，豬皮燒得鬆脆，腩仔多汁，而這次買的不會太肥，所以罪惡感沒那麼大！最重要的是臨近節日也沒有加價，這個不錯！

今日11月1星期日，一早同小朋友去飲茶，3個人等位等左45分鐘，等位期間我見到6個人一枱的就一泥就有位，期他2人4人的就等餐死，喱樣我覺得要改善。入座時，服務就認真一般，我5會期望距好好招呼，但起碼指條明路話我知張枱係邊😆。叫左6碟點心，上枱時間正常，5會等太耐，燒賣（肥猪肉多，好肥膩），小龍包（個皮好厚，硬)，鳳爪排骨飯(普通)，蘿蔔糕(好易散)，炒米粉(普通，仲好細碟)，炸雲吞(算係甘多樣入面最好，始終剛炸起，脆)總括然而，好普通一簡酒樓，試過5會特別想再食。