華聯

营业中

休息中

朋友介紹呢度嘅沙爹牛麵唔錯，就去咗試吓，仲叫埋炸豬排、雞排和雞翼。沙爹味幾濃，牛肉唔靭，配公仔麵，整體味道唔錯。炸豬排好味，奶茶味道正常發揮。第一次去屋邨舊式茶記，原來呢度都有好多小炒食。

華聯係隱身喺華富邨入邊多年嘅茶記以前經常經過呢頭次次都會食佢嘅豬頸肉河粉 同埋粟米肉粒飯！佢哋嘅粟米肉粒飯係用煎過嘅豬扒醬汁啱啱好唔會太稀冇誇張 暫時係食過最好食嘅粟米肉粒久唔久都會想返華富邨再食💓（可能記憶中嘅情意結都有加分haha）-凍奶茶茶底唔會苦澀 我習慣飲開走甜，更加飲得出茶底好飲呢度嘅姨姨伙記 咁多年都冇點變落單快狠準！-一路食一路可以見到有麻雀飛過應該係呢度嘅獨特景色哈哈建議避開平日午膳時間因為附近有三間中學 會好多人

今天下午打電話叫外賣，係［打電話］落Order，點會知你地有咩午餐，問阿嬸有甚麼午餐，她已經發晒爛咁回覆，再問佢今天例湯是甚麼，阿嬸居然答 : [ 我地最低消費係$55］，仲勁惡，之後我講埋我嘅地址比阿嬸，佢先收聲，跟著收線。

今晚大伴兒慶祝聖誕，椒鹽鮮魷好彈牙，煲仔飯香噴噴，乳鴿皮脆多汁👍椒鹽九肚魚外脆內軟，口感一流，小妹周圍搵嘢食，呢間推介，食材新鮮味道滿分💯，食唔到味精。推介椒鹽九肚魚、椒鹽鮮魷、乳鴿

講真茶餐廳其實都唔會expect特別好食嘅，但係都唔會諗到咁難食。所謂肉醬煎蛋飯，大佬一pat冇味得個鹹字嘅芡汁，冇番茄最低限度都有番茄味啦下嘛，冇嘅，and then 你以為有肉醬啦，不過只係肉粒，成件事難食到一個點。然後所謂泰式船河，更加係垃圾，全味精湯，一d都唔泰式囉。泰式我唔expect有冬陰功，不過泰式就應該最少都有酸辣囉，佢完全得個鹹字，重度味精，一d都唔想d粉掂到d湯。$50幾蚊一個飯已經係貴，講緊唔係市區而係華富公屋屋邨入面，租又平食材又垃圾，煮出黎又難食。啊，食個陣仲會有陣陣煙味傳過黎。完全係貼錢買難受。

燈光係一個問題，唔同顔色既燈膽混雜，坐落，對眼已經唔多舒服。唔知係冷氣日久失修定“疫情下”慳返d冷氣，雖然尋晚轉涼、加上我唔中意吹冷氣，但都覺得好焗。而d枱，都有返咁上下年紀，傾斜左，放隻碗係枱面，佢都會自動移動。干炒牛河好油，無乜蔥，配菜唔夠搶眼，色水真係唔得，d河粉又炒到碎濕濕。雜燴炒面貴過牛河2蚊，個樣就肆正，睇落豐滿好多。夠味，但d配料醃得太犀利，太鹹。過去應該存在既豬雜，消失不見，反而有早餐常見既仿鮑片係入面。材料好豐富，但始終唔係好好食，對住兩碟野，心情好複雜。叫左野食之後，姐姐問我地飲唔飲湯。蓮藕雞腳湯。無乜湯料，但都有d雞腳味。好坦白講，好耐無係呢頭食野、食茶餐廳。食都寧願去香港仔。因為華富茶餐廳既水凖，心中有數。結果今次，都係食完就算，都係去香港仔好過，食完野，行下街都好。

打電話叫咗一盒飯外賣，佢話要收最低消費....好啦， 我再加杯野飲，跟著又話加杯野飲＄2，即係＄46都未送到，咁咪諗住加多杯正價汽水啦....最後叫咗一盒飯加2杯飲品，結果黎到成＄70幾蚊......再打電話返去問又話外賣要加＄2， 太遠又要加多＄1（同區），最好笑係盒飯加咗＄1，另外2杯飲品都要各加＄1， 即係無啦啦加多＄5....仲要1杯汽水收成＄17， 我去買一pack都得啦......出面間間餐廳都做緊外賣優惠，呢間竟然外賣仲不得掠你水

星期五非繁忙時間想叫個碟頭飯外賣 等左成個鐘都未黎 咁我就打去問下點解仲未到電話入面個呀叔就話送緊嫁啦行緊嫁啦 就即刻cut我線 咁我都算平時食開呢間就等多陣 再等多半個鐘都未黎 我就再打去追 仲要話我 無人應門 打我電話唔通 平時拍門拍到收數咁 你有拍門我會聽唔到 擺到明玩野啦 碟頭飯成個鐘都送唔到？ 多多藉口 唔會再食

因為想去看瀑布灣瀑布，所以就去了華富村附近的瀑布灣公園。因為天氣太熱了，就想到附近找個地方休息一下喝杯飲料。所以就找上了華聯，一家在華富村的茶餐廳。 很想說這裡真是一個大驚喜! 首先，地方清潔舒適，員工和藹可親，服務因勤! 最大驚喜是食物非常好味。西多士蛋香鬆脆，豉油皇雞翼很滑， 薯條非常香脆。牛奶麥皮很香滑，牛油多士和煎蛋很像家裡做的。最想大贊是涷檸檬茶。要知道檸檬茶的茶底有茶香，味道剛剛好是不容易的。真的太贊了!!!

通常星期六都會同屋企人落街食飯，有時係食日本餐，有時都會食下小菜，今次就黎左依間食小菜。照例都係三個餸，四碗飯。三個餸就例牌兩肉一菜，兩肉就叫左個霸王雞同個椒鹽鮮魷，菜就叫左個北菇鮑片扒時蔬。好老實講，唔覺得特別好食，只能算係正常水準。個霸王雞係最好食既，啲雞味十分之濃，雖然肉質唔是極嫩都可以接受。要知道係依個時代要出街食到有雞味既雞已經好困難。椒鹽鮮魷都係大路野，不過本身香口，外酥內彈，爽彈既魷魚肉從來都係我鍾意既，咁就加左唔少分。而個個菜，就正常，北菇同鮑片都唔係話好新鮮，反而個菜就幾新鮮，入口腍而清新好味，而且價錢並唔貴，值得既一餐。

打去叫外賣我:喂，叫外賣既唔該阿嬸: 講啦我:通菜炒牛肉，xxxx,xxxx(餸名阿嬸:椒絲腐乳通菜炒牛肉下話大佬，你有咩炒法我唔一定知，建議態度可唔可以好d?我:我會俾200蚊阿嬸:咩呀我:我會俾200蚊，到時麻煩找錢阿嬸:我地大把銀，逐蚊找俾你，唔洗提架wor, 我地公司一定會找錢架wor喂，大佬，我唔想你地同事行上黎發現我可能俾500蚊又得，俾200又得，找唔到錢又要行多轉黎乜野態度呀呢間野?野又細碟過人，錢就不停加除非想買氣受啦咪唔好去啦

有時候煩惱午餐選擇時，茶餐廳的碟頭飯往往是不俗的解決辦法。雞排腸仔火腿飯配上咖喱汁做法簡單，落單後五分鐘便新鮮熱辣的上枱。雞扒煮得恰到好處，煎過後皮脆肉嫩。咖喱汁只是微辣，很適合喜歡咖喱味但怕辣的食客。整碟碟頭飯內容看似平凡，但足夠為忙了一個上午的人充電。飯量不算多，反而夠飽時不會浪費食物。惟一美中不足之處為沒有菜蔬，感覺總有點偏食。隨餐的檸檬茶則不過不失，只稍偏甜。

今晚中秋團圓夜，大伙兒飯局當然不可少。為免外出與人擠迫，今次選來屋村的街坊小炒店華聯。小店位於屋村舊式商場內，環境與一般市政大樓熟食檔無異，就是上了鋪的大牌檔。我們一行十二人被安排在坐在店中央的大圓檯，位置略為擠迫，但有幸冷氣異常充足，大家也沒有吃得汗流浹背。 食物方面，這裡賣的是一般茶餐廳食品，但晚市也兼營碟頭飯及其他中式小炒，由於價錢大眾化，所以成了附近街坊的飯堂。 例湯：免費奉上，為粟米紅蘿蔔排骨湯，以快餐店常用的方形不鏽鋼盤盛著，感覺比較古怪。味道不見突出，但總比坊間淡而無味的「例水」較好。 霸王雞：賣相不錯，雖不夠肥美，但雞味頗濃，而且入味得來又不會太鹹，很好。 豉椒炒蟶子：蟶子算是肉厚，但不夠乾淨，上檯還帶沙泥。味道不見鮮甜，反而帶點尿餲味，有說應是沙爹味，但豉椒炒又何來沙爹呢？ 糖醋五柳魚：醬汁調得不錯，酸甜味道適中，但魚柳質素欠佳，外層炸得不夠鬆脆，內裡魚肉又霉又腍，肉質比一般炸魚柳更差。 椒鹽鮮魷：賣相及口感皆不錯，粉漿不會過多，但略嫌味道不夠惹味，椒鹽味不夠充足。 菠蘿咕嚕肉：咕嚕肉不夠鬆軟，但也不致太硬，味道還可，算是中規中矩吧。 沙拉肉排：肉排的肉質不算嫩

我通常去對面... 不過它的炸雞扒真係好好食... 尤其新鮮炸的.. 好脆...食過一次早餐, 不俗.. 喜出望外, 街坊不妨一試.

我自小幫襯的食店,但今日起不會了.我今日叫外賣,我比咗六十蚊我細佬,我叫咗兩杯熱飲同一個意粉,外賣到我細佬比咗六十蚊個阿姐,找番一蚊,即五十九蚊,後來我諗吓諗吓冇可能咁貴,於是打電話問,同送外賣個阿姐傾,佢死都話冇囉!冇嘅佢唔認我都冇符,覺得佢好唔誠實囉,所以決定以後唔會幫襯喇!我個個星期都幫襯一至兩次,由細幫襯到大,二十幾年喇,估唔到二十蚊就可以睇到華聯啲員工有幾誠實啦!