蝦魂

营业中

休息中

每次經過這裏都聞到好腥嘅味道，心諗點解會有咁多好評。有次好奇入咗去試吓，點咗個蝦面，十分驚喜，湯底濃而唔咸，面爽，其次服務及時，環境乾淨闊落，而且位置非常近地鐵站，值得推薦。

已經食過幾次，次次影完相都唔記得寫食評。今次個麵跟埋一少碟前菜，係麻油海帶絲，都唔錯。個蠔湯勁香蠔味，真係想叫多湯飲多啲。有兩隻廣島蠔，一塊豬腩肉，3隻好細隻既蜆，半隻温泉蛋，兩塊紫菜，有啲海帶同竹筍。麵係中麵，硬度適中，不過我鐘意幼麵多啲。塊豬腩肉炙燒過唔會覺得好肥膩，厚度都適中。另外加左$2要個辣蝦醬，勁香勁濃蝦味，不過會食到少少蝦殼。不過因為個蠔湯太香，加左辣蝦醬會俾蝦味蓋過左，好似嘥咗個湯。同埋有一啖仔蛋糕做甜品。

話說朋友住寶琳，想去新都城食，但係就唔知新都城有咩食，因為大部份都係連鎖餐廳上網搵吓，見到呢間餐廳係新開嘅，又有我最鍾意食嘅蝦，所以就諗住試吓三個人買咗兩碗麵，兩碟小食，食到超級超級飽(我飽到第二日直接skip咗個早餐)，埋單都只係人均$150!!!! 如果唔買小食會更加平，因為一碗麵大概都只係$10X佢哋唔收加一服務費，好抵！講返啲麵先如果你同我一樣，超級鍾意食海鮮，尤其是蝦，你一定要去試個湯底係用蝦汁熬製出嚟，非常濃郁我朋友好飽，兩碗麵嘅湯底都係我包晒啲料又多！每碗麵仲會有埋小玉子同小蛋糕個人建議加購佢兩蚊嘅蝦醬，加左蝦醬係另一個level！好好笑，我未食完，已經諗定下次去試咩餐(佢有飯亦都有麵~)係寶琳難得一遇好食嘅餐廳🥹🥹🥹

將軍澳隱世日本拉麵料理「蝦魂」開喺寶琳，係一間用心經營嘅隱世小店，店員十分友善。蝦湯底拉麵及濃蝦汁飯係必試菜式，店家不時更新menu，客人重來時可有不同選擇。慢煮豚肉叉燒&慢煮雞胸雞白湯拉麵兩片豚肉叉燒薄切，慢煮雞胸肉質嫩滑，無用油煎過，相對健康。雞白湯濃得嚟唔咸，麵條見到麥粒，質感煙韌。蒜蓉牛油烤大蝦滑蛋飯特濃蝦汁擺盤靚，兩隻大蝦新鮮有蝦膏，以牛油蒜蓉煎香。濃蝦汁用蝦、龍蝦等配料熬製，濃郁美味。花雕酒漬新鮮鮑魚 ｜香煎和牛餃子兩個小食平時比較少見，花雕鮑魚爽滑彈牙，和牛餃子饀料突出。冰糖雪梨茶｜茉莉綠茶｜中華沙律｜紫薯主食配飲品、前菜同甜品，仲無加一架👍🏻🛎️必試指數：9/10🔆

蒜蓉牛油烤大蝦滑蛋飯上面有兩隻原隻大蝦 食落好鮮甜 而且蝦肉彈牙 滑蛋配櫻花蝦 食落有口感 而且滑蛋非常滑 配飯一流 平衡返咸味同鮮甜味慢煮豚肉叉燒拉麵雞肉嫩滑 叉燒調味適中 拉面湯底咸淡適中 而且食落唔會口乾 湯上面嘅油份飲到係雞油 拉面比較彈牙 和風單骨雞翼 單骨雞翼配上酸酸甜甜嘅醬汁 好開胃 而且單骨食落好方便 日式炒野菜咸淡適中 食落唔會太過分調味滑蛋飯嘅份量唔少 兩個女仔share都無問題 拉麵一個人都可以食飽星期五晚飯時間食都需要等位 店內位置唔算多 但等候時間唔會太奈 所以都可以排隊試一試

午市同同事過嚟食拉麵我就嗌咗最熱門嘅紅湯拉麵湯味濃郁 有幾款唔同嘅海鮮有蝦青口，帆立貝蟹柳 紫菜都好香脆另外叫咗個和牛餃子 餃子味真係有和牛嘅油脂感不過另外個朋友叫咗一個午飯呢度啲飯比較林 試咗一啖味亦都係偏淡另外佢嗌咗個炸蝦餅 亦都係粉漿比較多

特盛海鮮蝦紅湯拉麵呢個拉麵係蝦魂嘅王牌 我見好多人都係食呢個拉麵 入邊有豐富嘅海鮮 蝦湯勁濃 仲有櫻花蝦乾 拉麵底偏硬身 係我鍾意食嘅拉麵🤤蒜蓉牛油烤大蝦滑蛋飯配特濃蝦汁而家新餐牌入邊有啲飯餐 蒜蓉包大蝦有兩隻大大隻嘅蝦 蝦汁都好好送飯 不過個人就鍾意拉麵多啲😋全部午市都會跟餐配是日前菜 精選甜品及飲品 我哋就叫咗熱嘅烏桂花烏龍同凍嘅茉莉綠茶😚另外我哋仲叫咗兩個小食香煎和牛餃子呢個和牛餃子真係好推薦大家食 可以一啖一隻 和牛味好重 仲要係新鮮煎起嘅😚炸蝦餅但蝦餅都係熱辣辣嘅 好煙韌彈牙 熱到爭啲焫親個嘴仔啊🤭

呢間拉麵店喺新都城一樓近接駁天橋位，第一次幫襯可能下午茶時間關係，餐廳無咩人，今次係第二次幫襯，雖然唔係排晒隊，但都要等一兩枱先到。麵湯好濃郁，麵對我嚟講份量就少晒啲，味道唔錯。第一次嚟嗰陣影，閒日下午比較靜。小食：自家制阿根廷紅蝦雞肉餃子(3隻)，皮有啲乾，蝦有少少調味會好啲。午巿套餐：醬油牛骨清湯拉麵(澳洲prime牛肉)，湯好味，牛肉質幾好，我覺得套餐嘅餃子好食啲。虎蝦乾海味炊飯配雞湯/蝦湯，個飯好香口。廣島蠔×鮮蜆鮮魚蠔湯拉麵，個湯同拉麵有啲唔夾。

🔹️和牛雲吞、燒干貝、叉燒牛骨湯拉麵 （期間限定）喺香港好少食到好味的牛骨湯拉麵🐄，依間我好滿意！和牛雲吞🐄、燒干貝、叉燒好有質量，仲有幾塊好滑的慢煮雞胸🐥！🔹️蝦紅湯拉麵 呢度嘅蝦紅湯底好鮮甜好正，用左好多蝦去淆🦐，有4隻蝦咁多，都幾彈牙！麵條彈牙掛汁，仲有好多櫻花蝦，同埋流心蛋。我加咗個辣蝦醬，用來點蝦和麵都幾惹味，注意唔好一次過哂落去。🔹️自家製阿根廷紅蝦雞肉餃子 每隻大餃子，都用咗原隻大紅蝦🦐，加埋免治雞肉包🐥，可以說是世一餃子😍🔹️花雕酒漬新鮮鮑魚 鮑魚爽口彈牙，幾有酒味

平日夜晚去到唔太多人，唔需要等位。鋪頭採取開放式設計，地方闊落，坐得都舒服。我地總共叫左蝦紅湯拉麵🍜，和牛餃子同埋自家製阿根廷紅蝦雞肉餃子🥟蝦紅湯拉麵 3.5/5湯底濃但少腥，食落都有多種唔同蝦熬製既味道，誠意十足😊 不過有因濃蝦湯既些少苦澀味，可以再有多d蝦油香味。麵底有嚼勁👍🏻份量足夠但蝦既size較細。感覺拉麵風格比較似fusion日式拉麵再加d港式元素，食既時候好似有種去左大澳既感覺🤣 不過overall都係一個好既嘗試，配料的確可以再豐富d。阿根廷紅蝦雞肉餃子 4/5呢個餃子係餃子皮包住雞肉同蝦既餡料，皮薄多餡👍🏻口感豐富。食到淡淡雞肉味，不過味道可以再豐富d，唔係太食到蝦味。和牛餃子 3.5/5有淡淡和牛味，味道中上。服務不錯，nice同有禮貌。味道有改善空間但有十足誠意，如下次經過都有興趣試其他拉麵👍🏻

上次嚟試咗佢哋嘅蝦湯，非常之好好味，今日又再過嚟食拉麵。今次佢哋多咗款期間限定嘅拉麵。全名都幾長。和牛雲吞、燒干貝、叉燒、牛骨湯拉麵🍜佢哋除咗雞白湯同埋蝦湯，本身有一款牛骨湯底嘅拉麵。今次呢款限定就加入咗和牛雲吞同埋燒帶子，仲有一片叉燒同埋兩塊雞胸，最特別係有一隻冬菇喺面。送到嚟就聞到好香牛油香。湯底係好純好細緻嘅牛味，裏面仲有啲煙肉粒調味，有啲偏油嘅。拉麵入邊加咗麥粒，有小麥香又夠煙靭，紋身本身都掛湯啊，所以食落都好暢順夠味道。嗰粒和牛餛飩有幾特別嘅裏便啲肉餡就似和牛漢堡。其餘配料都幾出色。另外我冇試過雞白湯啊，所以就叫咗一碗雞湯蘿蔔做小食。雞湯都有啲乾，所以個雞湯係好濃味蘿蔔就煮到腍晒，作為一個小食青青地係幾好嘅。

蝦魂拉麵店位於新都城商場天橋入口的必經位置，之前有時候經過仲未開舖，今日星期四午餐終於有幸可以嘗試 午市套餐有四款，$88 起，包括拉麵、餃子兩隻和汽水，唔使加一服務費，好抵食 我好鍾意食蠔，這個廣島蠔拉麵令我非常驚喜，蠔/蜆/鮮魚湯底好香濃，又唔會太鹹或者太油膩，廣島蠔好肥美，竟然有三隻咁多，蜆都算好大隻，味道幾鮮甜，拉麵是用日本麵粉新鮮製作，見到一粒粒小麥，感覺幾健康，又有咬口 下次過來都會再encore另外我哋叫咗叉燒雞白湯拉麵，雞湯味道都係非常濃郁，但亦唔會太鹹或者太油膩，叉燒肉質都好彈牙，值得一試 套餐的汽水和餃子正常發揮，唔算好特別，所以冇影相記錄，整體來說，餐廳的食物質素和CP值都好高，下次一定會再來試試其他招牌菜

今日去寶琳食拉麵。老婆食貴嘢，叫咗個期間限定；老公就食平啲、轉咗個午市套餐嘅醬油牛骨清湯拉麵🍜 不過兩個拉麵嘅牛骨湯底都一樣出色👍🏻 牛骨的味道香濃。所以套餐有杯茶飲係好重要‼️這是佢地嘅 Jasmine Greentea , 雖然用 dimah 品牌非日系、但都好飲拉麵配料係期間限定的果一款都幾豐富：有和牛雲吞、有帶子、有慢煮雞胸肉，一塊叉燒。另一碗醬油牛就配有竹荀、澳洲Prime 牛肉。我覺得幾正的嘅係兩碗麵都有冬菇、冬菇係鮮味再加埋牛骨湯底，咬開juicy tasty。帶子厚、新鮮。麵條軟硬適中、唔錯錯。

餐廳在新都城一期商場，寶琳火車站一出行幾分鐘就會見到，座位不算多但感覺舒適，店員按顧客需要有提供凍水或暖水。蝦紅湯拉麵睇餐牌介紹湯底使用了龍蝦、虎蝦、阿根廷紅蝦、日本櫻花蝦等多種不同蝦種經過焗炒煮熬多重工序每日新鮮熬煮4小時，再配上自家秘製的蝦油醬，令湯底味道細緻和層次更為豐富，達到濃而不濁。大家如果黎必叫首選。澳洲頂級肉眼醬油牛骨清湯拉麵湯底睇介紹係大量使用帶有肉、筋膜和油脂既牛肋骨經24小時慢火熬製，所以飲落清澈同時醇厚而不膩，湯頭再加上秘製昆布醬油，額外令整體味道鮮甜甘醇。肉眼肉質鮮嫩，入口順骨，適合食肉獸人士。自家製阿根廷红蝦雞肉餃子有提供柚子醋沾點食用，紅蝦和雞肉既配搭味道上意外和諧，食落十分滿足，上面灑滿了櫻花蝦，增加了咬口。和牛煎餃子餃子就試得多，和牛餃子就比較少見，一上桌就熱滾滾，似係即叫即煎，餃子皮煎得香脆可口，和牛牛味濃郁，一咬牛肉汁在口內爆發。

又係將軍澳覓食喇～💨 將軍澳寶琳可以話係最多餐廳美食選擇嘅地方，新都城呢一間日式拉麵都開左一段時間🍜 終於有機會食到😉睇餐廳名就知佢哋主打蝦拉麵🍤我哋分別叫咗蝦紅湯拉麵同埋另一款牛嘅拉麵，仲有佢哋既小食都幾吸引！ 特別要一讚既係，一入到去餐廳店員非常有禮貌，好體貼貼心地向每位客人問要暖水定係凍水☺️𖡼 蝦紅湯拉麵有別於出面嘅蝦湯拉麵，本身以為會係好濃稠嘅湯底，但佢哋既蝦湯好特別✨係非常之清甜既鮮蝦湯底，好清新既感覺🌿 唔會覺得勁重口味，會想一啖接一啖連湯都飲埋，有大量櫻花蝦乾🍤🍤🍤 蝦肉仲要貼心到已經搣咗殼，成碗拉麵食到最尾都唔會覺得膩，讚！𖡼 澳洲頂級肉眼醬油 牛骨清湯拉麵 見到隔籬枱點咗呢碗牛嘅拉麵，覺得好吸引，有三塊勁大塊嘅肉眼牛肉🥩 果然係澳洲頂級牛肉，非常嫩滑，牛味都好夠，大大塊食落塊好滿足！湯底方面，亦都係好清甜既牛骨湯底，我個人好推薦呢款拉麵 👍👍👍𖡼 自家製阿根廷紅蝦雞肉餃子（三隻）睇得出呢款自家製餃子都好有心機，好味！好少拉麵店會有自家製餃子，值得加點～🥟🥟🥟𖡼 鰹魚昆布漬廣島蠔 廣島蠔漬得好入味，而且都幾大隻 🦪