表姐紅薯粉

营业中

休息中

前排喺呢附近工作，同事介紹街市裏便有間薯粉好好食，心諗街市咁污糟聽到都唔太想食😳但午市時間超級多人，好多學生哥會買外賣食。第一次坐落去食嘅時候，望住對面有籠最驚嘅田雞好恐怖😵‍💫😵‍💫😵‍💫唯有坐到最入，最角落頭位置背住佢當冇事發生😂😂😂每次去到都係食魷魚+豬肚+豬大腸水晶粉多酸小辣湯底要濃D要芽菜😝老闆同姐姐都好好人🥰事隔兩個月，又再喺附近出現，專登返去買外賣同屋企人share🥳今次買咗豬肚+滷水雞翼+三份魷魚+兩份大腸我同姐姐講買返去會煮，啲薯粉冇幫我煮用袋袋住，啲辣又幫我分開👍🏻👍🏻好多地方都唔會咁做返到屋企我自己煮返熱，加咗菜，豬紅同豆卜添😂😂😂另外叫咗麻辣豬耳同泡椒鳳爪，麻辣豬耳我自己覺得好多毛同埋太厚，食落冇咩味。泡椒鳳爪好好味，泡椒好夠辣。👍🏻👍🏻 有機會路過都一定再去食👍🏻

今日去彩雲邨朋友屋企我哋食外賣朋友介紹依間薯粉幾好食就一於試下今次揀咗雞翼尖豬腸幼薯粉少辣試朋友真係冇介紹錯雞翼尖同豬腸，夠入味豬腸洗得好乾淨冇臭味小辣好惹味值得推薦俾其他朋友食

一直聽講呢間屋邨米線鋪可以，又即管試下，睇下係咪真係咁可以。叫左個麻辣米線大辣加魚皮餃。魚皮餃都係來貨嘢，味道算可以接受，唔係太劣質，但算不上好食；湯底本身麻辣味足夠，但略嫌太過油，有少少扣分；米線爽口彈牙唔會太淋，唔錯。服務方面就無乜服務嘅，坐低揀好叫佢落單等碗粉到，都真係十分屋邨式，唔好有乜service standard嘅期望。環境就真係普普通通啦，始終係街市入面，值得讚嘅係枱面唔油筷子都乾淨。整體而言，如果湯底可以唔好咁油，以呢個價錢嚟講，就真係perfec池啦。

佢呢有好多个粉底可以揀既，我自己最中意3號的薯粉，真係好好食唔係講笑，佢一個粉27蚊入面仲有一堆芽菜丶肉碎丶酸菜等等配料，超正！！！大推！！想外賣送到屋企(你住係附近)既話夠40蚊就可以啦～真心覺得好抵😭再遠d就唔知喇！加餸就好似譚仔咁，我自己就鐘意加海帶~4蚊有5個大海帶，仲好入味！不過堂食幾細，但係嗰d非繁忙時間可以直入坐，不過真係可以買一次外賣拎走試下，份量同堂食一樣大，反正真係值得一試。

呢間米線位於彩雲街市內，座位不多，大慨十多個。今日叫了撈幼薯粉，中麻辣，配豬紅/蘿蔔/豬潤/牛栢葉。薯粉煮得夠彈牙，蘿蔔/豬紅好入味，豬潤/牛栢葉有咬口，美中不足是不夠麻，辣度就十足，食後不覺口渴。

屋企人樓下都有間食辣粉既小店，每次放假返屋企都會叫碗豬紅麻辣大辣薯粉外賣食，哩間餐廳會送外賣上附近既樓宇，只要一碗叫2個餸就送得外賣啦非繁忙時間大概10分鐘都送到屋企，我叫既2餸薯粉$33炸，抵食哩間餐廳我覺得最好味係豬紅，每次都叫2份豬紅食，豬紅滑嘟嘟一D都唔散，2份豬紅有成10粒呢，太足料啦實在；至於湯底都算正宗，不過就唔算好辣，大辣都唔太辣；配菜都好多好足料，有大量酸菜、芽菜，食極都仲有岩哂鐘意食配菜既我；薯粉係用扭紋薯粉，彈牙有咬口之前都有試過食其他餸，丸類得2粒感覺唔太抵食，蘿白都偏硬身煮唔淋唔夠入味，所以極度推薦食豬紅，真心好味呀總結：一個字-正，同埋足料抵食，哩碗豬紅大辣薯粉除咗湯底唔太辣外，味道、餸、配菜、薯粉都好好味，真係值得支持樓邨小店