金加利餐廳 (已結業)

好耐無去牛頭角淘大呢間金加利餐廳，今晚專程再嚟食多餐，估5到居然失望而回，極之失望，真係從未試過一間咁差既茶餐廰，飲品5掂、湯似水、鐡板5熱，服務態度又差，真係5知佢點做餐廳，各位千萬5好去試、否則後悔莫及

想近近地係屋企附近揾食，同區類似餐廳印象只有茜X及金巴利，但2者都類似快餐店水準，但前者收費較貴，所以今晚落腳點就選了這間。是晚我們分別order 了⋯餐湯例牌紅/白湯 + 餐包（只供order鐵板餐)～忌廉味淡淡的，粉量較重~喜歡的傳統餐包，但如果可以叮番熱更好味主菜1） 什扒鐵板餐～最啱愛吃肉的朋友，分量夠多，醃料味較重無乜肉味（個人覺得偏鹹）2） 雞肉咖哩麵包配薯條～ 外皮麵包係即叫即焗，外皮夠脆，雞肉份量充滿了整個麵包內，但薯仔只有一粒咁多。味道為中辣，好野味。餐飲咖啡/茶或同價飲品轉紅豆冰要補錢

見睇戲前仲有少少時間，就求其入左間茶餐廳，叫左個西多士下午茶餐。睇落好普通點知食落有驚喜，佢係即整架，火喉剛剛好，如果太耐麵包會吸哂d油。最正係花生醬剛剛好，唔多唔少，最勁係裡面層次分明

今日路過淘大商場行行下肚餓 又唔想幫襯連鎖餐廳結果大約3pm左右 選擇左依間有卡位 又唔洗等既餐廳入到去 友人揀左個焗飯 我揀左西多士侍應仲好友善咁問 「西多想要糖漿定煉奶」等左3分鐘焗飯就黎左 仲快過d野飲 質素麻麻點解咁講?? 因為焗飯明顯預先焗定 熱度不足 唔夠汁 有點失望飲品反而唔錯 感覺上仲幾大杯添西多士 大約10分鐘反先黎到 超大份 又厚 勁抵食落枱之前已經落埋煉奶 而且仲好重手 正!!!!賣相超吸引 食一啖 已經feel到系新鮮即整既感覺超超超超超好味 (同時亦代表超超超超超邪惡too orz)為左份煉奶西多 我下次都會再黎既^_^

十點零五分行入去，入去之前見到淨返一枱客都心知有伏，臨坐低都問咗收銀阿姐收未，佢答我未，但就要快點菜同埋單先，ok無問題，叫左兩個餐，分別係“雞扒豬扒葡汁焗公仔麵”+“豬頸肉龍脷柳芝士汁焗意”。先評個所謂餐湯，一紅一白，紅嘅都算正常，但個白嘅。。。好明顯係放入微波爐翻熱，一上枱有層“依”咁嘅嘢，我唔係食緊雙皮奶呀。。。之後再講個焗公仔麵，焗出嚟嘅同湯麵無異，只係無湯浸住，濕到呢。。。算，我當維持生命，食。至於服務，真係好到呢。。。兩個換好衫嘅阿姐坐咗喺前面卡位吹水，之後收銀就連冷氣都熄埋，喂呀，當時係十點二十分，個“焗意”上枱唔夠五分鐘，你即係趕客？咁我入座時你就咪話未收啦。。。成餐飯我用咗廿分鐘完成。。。其實，我明收工的確好緊要，但真係唔應該咁囉。。。

金加利是我和男朋友每週都必去的餐廳, 大大話話都已經吃好幾年。記得我頭一年到這家餐廳, 當時的裝潢是燈光比較黃黃暗暗, 環境昏昏沈沈有點像扒房的形式。確實在外表上看起來是高級一點, 可能正因為這樣當時的餐廳不論是員工還是食物質素都好像比現在更好。  這幾年來基本上每週都會至少去一次該餐廳, 見證著員工與食物的改變, 早兩年一把餐廳裝修後, 立即由平民版扒房變為茶餐廳的感覺, 但是餐牌上的食物都是大同小異,沒有太大變化。   先看看環境, 由以前的昏沈店面變成了光線充足的風格, 更有不少裝飾品襯托著, 光線足夠對餐廳即時提起了整潔的觀感, 以茶餐廳來說金加利可說是環境及座位都比較乾淨整齊的。 新年過後, 更加有新的餐牌推出, 例如"男神餐、女神餐" 估計要慕求達到追上潮流的目的。由於我和我男朋友都是熟客, 大數我們來這裡都是吃下午茶, 甚少都來吃晚餐, 我們對於下午茶的餐牌可說是倒背如流, 因此基本上一入坐, 我們就可以馬上下單了。我最喜歡的茶餐就是公仔面配腸仔煎蛋, 這裡的公仔面比以前煮淋了 個人比較喜歡吃硬身的點有彈性的面質, 不過五香肉丁的份量很足夠, 撈入公仔面吃在很香因此就算了

有野整要出去九龍灣！但淘大d餐廳長期都爆滿人 本人又好鬼肚餓，於是見到有餐廳唔爆滿我就衝左入去食啦呢間野都幾大，座位都幾舒服叫左個燒雞鐵板餐配漢堡扒個燒雞其實味道幾好！肉都幾滑，可以接受既！！漢堡扒幾重份量，味道都算唔錯，但就無貴價漢堡包入面果d漢堡肉咁好味囉薯條就無咩特別！！！！總體黎講----味道唔算差既，不過一定唔係好好味果d啦。不過呢個餐成$9x蚊就貴囉！！ 不過佢唔洗等位同d位幾舒服就算啦淘大真係太多人！

一直都有食開呢間店，早幾日去食發覺食物質素差左好多，魚柳淋嘅，個湯又杰……不點原來唔止食物質素，員工態度都差左，唉，以前真心覺得佢係良心小店……唔知係咪生意差，連員工脾氣都差埋。

今日係淘大食午餐，見到呢間午餐價錢都合理，50幾蚊包飲品同餐湯就入去試下。餐湯方面，羅宋湯味道十分淡，好似飲水。正餐咖喱牛腩飯，真係好難食。牛腩份量係好多，但完全無入味，無咖喱味，好似就咁用水煮熟D牛腩，再加返D咖喱汁。

叫咗個葡國咖喱雜菜飯，一上嚟個賣相已經好核突，啡色嘅水上面浮住幾舊嘢，分別係兩舊用水烚熟嘅薯仔，兩件西蘭花，一Pat椰菜，揭開底下係，竟然係芽菜，從來都未試過食咖喱竟然有芽菜，梗係多水啦。味道就係咖喱粉溝水再溝買啲菜，極度難食。食咗兩啖同阿姐反映下，我講左兩次阿姐都毫無反應，聾過聾耳陳，高!

岩岩去左依間食。之前去都還ok既。但係岩岩食真係好難食。個個雞扒一食好有美極味。個個忌廉場好‘傑’啦。個個鱼柳比d菜既水整到冧曬。d白汁完全吾好食。有一舊舊野係到。d人服務態度又差。

星期六晚同家人睇完戲，淘大每間餐廳都有不少人在等位，小妹較討厭浪費時間，見到有間餐廳冇人等位，於沖去食啦。見到個餐牌，好似好吸引，好多野食咁喎。。。我好中意食麵包，叫左個咖喱羊腩麵包，餐牌寫住外脆內軟，好期待好似禮物咁包住架，一開麵包係"林"架，已經失望左一大半，啲咖喱味道一般，反而個羊腩比較好食。家人食鐵板扒餐，佢地都話好難食，已經blacklist左呢間，唔會再幫襯

肚餓行過坐底試下，叫在個鐵板德國腸拼燒豬肶～ 一黎到賣相馬馬，德國腸原來係司華力腸，都唔緊要，但size 只大普通廚師腸小小，豬肶有三只，又係細細隻，都唔緊要，咬落全無肉味又乾，骨同肉切二下就自動分離，成個感覺好似煲完湯既豬骨再攞去煎一様！

週末中午諗住食個簡單午餐，見餐牌有Supreme curry, 點左。真係有啲期望架。點知由餐湯到餐飲到個咖哩都似隔夜。。個紅湯淡啡色，見到都唔多開胃，飲落去係鹽水，一個字，咸。個Supreme Curry 仲慘情，啲牛腩唔熱不單止，仲要有乾硬化既情況。唉，其實我明白牛腩一定預先煮好，但叮返熱都咁無heart, 真係唔知講乜好。

餐牌奇奇怪怪，又西餐、又茶餐廳嘢食、又米線，完全揀唔落手。2個人食，點左薯仔雞翼咖哩飯&腸仔煎蛋火腿餐肉飯，送湯，叫左忌簾湯。首先個湯明顯係用粉開出嚟嘅，'結撻撻'之餘又無味，飲左一半已經飲唔落。之後咖哩飯個賣相勁核突，嚟嘅時候真係呆左，個傳菜以為送錯，其實係核突到嚇親😞。可惜無影相，絕對無誇張。味道真係麻麻地，我淨係食菜同撈汁食飯...男朋友食個腸仔飯，賣相正常啲，但味道極奇古怪。個汁以為係豉油，但食落又唔係，甜甜地又有啲燒酒味，佢食一半已經唔再食，話食完好似唔多妥。整體真係好差！仲話唔知咩得獎，真係呃晒人！寫食評希望唔想再有人中招