影片
以上资料只供参考，请与餐厅确认详情
有日問同事深水埗邊度可以買到粢飯做早餐，同事就推介咗呢間金豪粢飯豆漿店。今日終於心血來潮過到嚟買幾件粢飯返公司同同事開心share。呢間粢飯豆漿專門店係一間舊式老舖，主要係售賣中式早餐，開朝八晚八，星期日休息，好彩時間都啱晒我呢個上班族過嚟幫襯。櫃內放咗唔同嘅小食，其中當然包括咗我最想買到嘅粢飯。最後就買齊晒四款粢飯返公司。每件粢飯都非常飽滿而且紮實，見到都想即刻試。首先當然係試咗個原味先，裏面有油炸鬼、榨菜絲同肉鬆，攞到返公司仍然熱辣辣，香噴噴，味道正宗。另一私心推介就係紫米粢飯，餡料其實同原味係一樣，而佢就用紫米代替糯米，淡淡都充滿咗紫米香，呢個粢飯味道與別不同又好好食。另外亦都有紅米粢飯，不過紅米相對地就唔及紫米嘅咁芳香。最後就係素肉鬆粢飯，始終係素肉鬆，味道就比較清淡啲，屬於健康之選。其實呢間金豪仲有其他中式早餐可供選擇，而且又好近我返工，所以我會多啲過嚟買個豐富嘅早餐，為辛勞嘅一天打打氣！
继续阅读