鍋呵呵 (已結業)

朋友成日話深水埗好多平野買，特登搵佢帶路尋寶，行下行下就兩大袋戰利品，先醒起原來未食lunch ，但已經差不多六點啦...唔想去酒樓又唔想大排檔坐得唔舒服，朋友建議去北河街鍋呵呵火鍋餐廳。原來就係地鐵站附近，非常就腳。可能時間尚早，加上係平日，人唔算多。餐廳裝修開揚企理，一大排落地玻璃望到街外風景，木枱木椅感覺溫暖，枱與枱之間空間足夠，每張枱旁邊都有個三層架用黎放火鍋配料。湯底揀左清湯蘿蔔鍋，味道清甜，同豆卜金菇好夾，啱晒我呢d鍾意食菇菜既人。所有菇菜都洗得好乾淨，呢樣真係加分。羊肉片夠薄片，肉質嫩滑，烚耐左都唔會鞋，最重要唔會好蘇，入口好易接受。肥牛切得厚薄適中，充滿雪花，入口即融，牛味香濃，真係好有水準。新鮮蝦滑，又香又鮮，仲好彈牙。朋友鍾情魚皮餃，話皮薄多汁又唔腥。打到尾聲，紅薯粉出場，而家成煲湯底都充滿精華，紅薯粉粗幼適中，索埋d湯汁，滋味彈牙，正！望望點菜紙，原來有刺身拼盤，仲做緊特價，朋友忍唔住想叫，我只好奉陪啦。本身都唔敢抱太高期望，估唔到賣相精美，質素都唔錯，全部都頗新鮮，三文魚香滑夠油脂，北寄貝同帶子都非常鮮甜。餐廳上菜快，又勤收碟，店員一叫即到，整體非常滿意。

今個星期天氣又涼涼地，最適合莫過於去打邊爐，今次揀左去一直都未試過既鍋呵呵，又有得雞煲又有得打埋邊爐，唔錯之選，但今次人少少就淨係揀左打邊爐，地方座位亦唔錯，價錢都算合理！叫左個芫茜皮蛋鍋，清清地得黎又可以下火又食到食物既真正鮮味，以下都值得推介既食物，薄片脆鯇魚片，大大片都幾新鮮，鮮甜中又好味，一碟得份量唔算太多，都唔係幾夠喉但真係幾好味既！ 爽口鮮鵝腸，唔係周圍都有得食同lee度事前清理功夫都得做得幾好，都好乾淨，食落好爽好彈牙，都唔錯！ 簡簡單單既豆卜，豆味都幾重，炸得口感唔錯，但最後食到中段或者尾段先開始食比較好，食起黎索晒d湯既精華，好味得多！

深水埗出名多好野食，天氣涼涼地，緊喺最適合打邊爐，第一次黎鍋呵呵食，食物質素唔錯呀，款式又夠晒多，我地都睇到花多眼亂，侍應服務亦唔差！我地先黎叫咗個雞煲，熱辣辣香噴噴，雞肉肉質都好嫩滑，加埋莞茜洋蔥既味道，辣辣地中帶點甜味好入味好惹味！ 之後就倒入清湯繼續打邊爐，墨丸大大粒之餘好彈牙爽口，味道亦唔錯！ 薄片肥牛一卷卷放上碟賣相吸引，色澤都好靚，食落好嫩滑，牛味好重！ 金菇洗得好乾淨企理，一碟份量都唔少，我地食都食得好放心！ 打邊爐不少的豆卜，食落好香豆味好新鮮既感覺，最正喺索晒湯既味道精華，特別惹味好味！ 其他食物都不過不失，加多幾支汽水，大家都大叫飽飽夠晒喉！

雖然最近天氣轉熱，但家姐話好耐無打邊爐，一講起，全家人既興致就黎拉。呢間餐廳有蒸氣火鍋，4款粥底睇落仲好養生添，有野生鮮淮生排骨粥、虫草花、同花膠瑤柱粥。由於我上星期先食過黎，所以今次都係食算普通既邊爐。爸爸見到有刺身食，即刻表現興奮，仲無問過我地意見，就自己係到寫紙仔。當然拉，我地一行三人又點會表示反對呢刺身賣相都幾好睇架，有帶子、鮮蝦、三文魚、北寄貝。帶子都幾大粒，不過就較為薄切，好在都幾甜。蝦一向係我最愛，特別既口感，令佢係一眾刺身當中特圍而出。三文魚色澤光亮，食落又有油脂香。北寄貝爽口，咬落唔會好難斷咁，都幾新鮮。火鍋既配料仲有豆卜同魚片。最後為左食飽飽，我地仲叫左烏冬。烏冬應該就唔係平價野，因為食落彈牙，與此同時，佢仲係家姐愛人，我只可以成功爭奪到幾條，還真是哭出來。有鑒於今餐既滿意程度，同佢距離我家既遠近，睇黎我都會幫襯佢，試埋個蒸氣火鍋，有興趣既大家就留名等我食評拉~

我並不是一個食家，只是想分享一點點。以上就是今天5個人，1600元的份量。仲有呢碟約兩舊幾嘅本地牛，唔算差，但不能叫好！為什麼會到此店幫襯，只因食評網有很多讚，但原來有點「伏」。5個人人均340左右，打邊爐應該的一般價錢，我們除了點餸還加多兩罐可樂，同九枝青島。湯底係椰子雞，可能係想清淡點，他們就得很好，若果不加點檸檬汁，絶對做到淡如水的效果。上面碟嘢係連湯計，份量足夠，料就普通。來貨的響領，差。桶蠔，夠大隻，但唔鮮甜。潮州丸類呢到又唔太差。其實呢間上樓舖，估計租金會平過地舖，若果材料上梗加加點心機，好評一定會多，但食後感到『評價』原來有點假，又或者是今天比較差。

涼涼地，放工就即興約同事去深水埗打邊爐，鍋呵呵係門外望落環境價錢，都ok，就入去試下啦！侍應服務都好好，冇吹我地，等我地坐底慢慢諗，叫完食物好快就黎，又由我地慢慢食慢慢傾，完全冇趕客既感覺！湯底我地揀左原味椰子雞，份量十足，又多料，都係$398兩位，仲有限時優惠，九時後入席9折！日本帶子鮮味大大隻啖啖肉，日本黑豚肉十足肥牛口感，嬾滑好味唔食牛既朋友可以揀lee款食，安格斯肥牛真材實料，牛味濃烈好味！ 青邊鮑片煙韌好口感，生蝦雖然唔係好大隻但非常鮮甜彈牙，象拔蚌仔爽口新鮮有咬口，名貴到花膠都有，質地好有口感，骨膠原十足，仲要份量都唔少，四寶丸乜都有d，時菜，雜菌好多都有，岩晒兩個人每樣可以食少少，配埋醬料蒜蓉，蔥花，辣椒，豉油，青檸都有，真係唔錯，下次一定會再幫襯！

老實說我見到呢間火鍋店好評如潮.. 朋友就提議食下呢間.. 應該轉手無耐因爲之前嗰間都係食雞煲.. 我都食過一次.. 決定再去試下.. 有一個海鮮雞煲餐.. 🙄$398 套餐兩個人食都算合理.. 雞煲都係冰鮮雞唔夠滑.. 不過勝在洋蔥炒得好香搭夠.. 而且上到去只有幾枱客人不用訂座都可.. 海鮮拼盤連瓜菜籃賣相確實很不錯.. 而且食落每樣都係新鮮的.. 睇得出質素compare任食係有分別的.. 蝦同帶子係最好味的.. 不過略嫌豆腐唔夠滑.. 每樣海鮮都有少少最啱情侶打邊爐架喇..

話就話足二位用，但我地三個女仔照叫一個套餐，$398除番條數真係好抵⋯鋪頭不算大，但坐得舒服乾淨~ 有廁所~ 醬料要自己出去整⋯ 另外重有沙爹醬.. fd 話幾好味~ 另外重有送青檸.. 記憶中我地都無用過D雞好嫰滑，份量都好多⋯ 好香椰子味個湯底~ 清清地，好似無錦熱氣( 心理上.. haha )拼盤黎拿..... 大家邊食邊傾計，真係三人都夠食飽⋯

又係時候打邊爐，深水埗出名多好野食，今次我地就揀左去深水埗個邊朋友介紹既鍋呵呵都食，港鐵站附近地點都方便，環境都幾舒適，最緊要價錢又合理，款式選擇多，值得推介！我地叫左個椰子雞煲，雞既份量好多，新鮮原個椰青水同椰子肉都放晒落去，椰子既清香味，淨係聞到香噴噴既椰香味，都已經流晒口水，仲要椰青水完全滲入晒落d雞到，雞肉食落更嬾滑好味，濃郁湯底真係又食得又飲得！ 墨魚片切得厚薄適中，新鮮又爽口！ 肥牛師傅切得厚薄適中，雪花又多又靚，肥瘦比例岩岩好，一啖一片食落又新鮮又嬾滑，份量又多，成碟滿晒！ 大大隻象拔蚌，色澤均勻，鮮甜爽口！ 牛丸，豬肉丸十足十足自家製大粒又彈牙！ 豆腐好滑漏，蔬菜菇類都洗得好乾淨！ 師傅用心將食物都切得靚靚，排得整整齊齊，真係令我地更加開胃，食極都唔夠飽！

上星期黎到深水步既鍋呵呵，其實一早已經有聽朋友講起過，見經開深水步，就同班老朋友會一會佢。店鋪係樓上鋪，上到去見到個裝飾都幾簡單，但睇落好舒服。黎到二話不説，即刻叫返一個雞煲，雞煲睇落幾足料，但可惜味道不夠濃。不足五分鐘，我們一班人便以把整個雞煲清理掉，然後當然是我們的重頭戲打邊爐。首先，我們朝響鈴以及豆腐等速食食物，先為我們充充饑。然後，身為食肉獸的我們當然要來幾道肥牛，那漂亮的雪花一看便知道是高級了，而且食落肉質幾滑，令我的食慾得以滿足。當然，來到火鍋店，肉類必是高消耗率之選。呢到既肉類都唔差，雖然未達高水準，但至少品質不會參差再來是那刺身拼盤，雖然比不上一流的日本料理刺身，但在火鍋店吃刺身而家絕對是一個嶄新的嘗試。再者，便是我非常非常喜歡的一道小食，牛柏葉，更是那沒有染色的牛柏葉，食落非常有口感，而且味道是白色牛柏葉絕不能相比的。

平時返工嘅時候都見到而今次終於有機會可以真正試吓。舖頭都幾乾淨，坐得都幾舒服。我哋就點左個椰子雞湯，椰子雞湯好足料，雞亦好滑。煲緊嘅時候已經聞到濃濃既椰子香，湯底亦好夠味。至於其他配料就出去自己拎，一般嘅配料都具備。肥牛油脂分布得好平均，厚薄岩岩好，而且肉味好濃，正！羊肉同黑豚肉都好好食，質素唔錯，冇半點雪藏嘅味道，羊肉都冇好重既羊羶味。響鈴當然係 打邊爐必點嘅食物，響鈴好脆卜卜，滾左一陣就食得！脆鯇魚片都算幾大夠，好新鮮食落好鮮甜，仲要食落好爽，好快就俾我地食曬。手打墨魚丸同蝦丸係我嘅推介，好新鮮啖啖肉，而且食落好彈牙，口感十足，證明係真材實料。

係深水埗買電腦，搵個地方坐下快遞個電腦食下野，托住電腦周圍走真係令個個身㷫烚烚，但係又好想食火鍋。。入到去就叫咗支天然純椰青水， 原來係杯裝既，不過都幾好飲，甜甜地好清涼。椰子雞煲有好多雞塊，仲有啲椰子香味，清甜又清熱，另外都叫咗好吸味既豆卜， 質素都唔錯，好鬆化。薯粉煮完之後依然有彈性，份量好多， 吸咗個椰子雞味，幾好。金菇又係一款吸味既食物，質素都唔錯，大大條好爽口。安格斯美國肥牛質素都非常唔錯，牛肉既花紋已經睇得出佢係好高質定低質！就算牛味未係非常香濃，但係口感一流，近乎入口即溶。羊肉有好香既羊so味，雖然脂肪與瘦肉的分布不算很平均，但係味道已經好香，而且咬落去，完全好滑，正。

見到有咁多好評，所以12月10日去開深水埗就試試，結果極失望...首先，明明有檯，都要畀張櫈都唔夠位放嘅檯客人。問過可唔可以換檯，話其他全部有人留左，但隔離張檯到我離開時(2小時後)仍然空無一人。兩位應該是中學生的侍應，其中一個還好，另一個有待訓練。基本禮貌似乎也不懂，說話語氣極差。最令人無言係新手侍應打開煲蓋時加雞件時，完全沒有安全意識，不會把蓋打則開，倒汗水隨處滴，弄到客人也不會道歉。較有經驗的小侍應問佢"你咁都得嘅"，新手竟然理直氣壯地答"唔得架咩？" 之後想叫侍應幫手，永遠都聽唔見。而老闆只會跟熟客傾計，其實客人全部當透明。說回食物質素，三百幾四百嘅椰子雞湯二人餐，量唔多不在話下，材料也不算好，絕對不值回票價。椰子雞湯尚可，但之後只加清水作湯底，會唔會太過分?埋單時找錢仲要畀張爛嘅10蚊紙人! 叫新手又係聽唔到，好彩另一位幫我換返。唔知係咪咁得罪老細同老闆娘，門口就在收銀處傍，但我離開時一句多謝或再見都無。到底係我唔好彩定我要求高? 明明一個負評都無，但點解我會咁失望?

天氣凍凍地，個同事話一起去食火鍋。記得上次係深水埗有間店名叫鍋呵呵火鍋店D雞煲幾好味，就帶同事上黎話叫個398二人餐，又見度有時令推薦（雙冬羊腩煲、胡椒豬筒骨煲）就喊份羊腩煲（💰188）試試，羊一D都無臊，老闆話係澳洲貨，所以唔騷。甜甜地，岩岩夠味！最鍾意食羊腩煲入面炸枝竹，個同事都話好味。仲有20蚊3支細藍妹，岩晒！

呢排我知道興起食椰子雞煲，所以今次呢就同朋友book咗深水埗呢間試下，我地叫咗個$398嘅椰子雞煲套餐，原來佢地係用新鮮椰青水做湯底，再加半隻鮮雞，等煲出啲雞味之後就先飲雞湯，湯底鮮甜可口而且仲可以加少少青檸加強鮮味，不過就咁原味唔任何調味已經好好飲，雞肉嫩滑鲜甜，之後就加入上湯繼續打邊爐，其他配料都算新鮮，有蝦，有蠔仲有北寄貝...其餘2個好姊妹都大讚美味