開花結果

营业中

休息中

叫外賣，因為大厦唔俾外賣上樓，所以要叫樓下幫手收住先，我立即九衝落去俾錢！點知一落嚟俾錢，條外賣佬已經俾曬說話我聽，問番樓下，叫佢放枱面，但個外賣佬就咁幾袋外賣放地下！有冇啲衛生意識㗎？我收到你電話已經九衝落嚟啦！唔通我要下下企定定係樓下等你！一係你預早打嚟話就行到，咁我咪識早啲落嚟等囉！你趕時間又唔想等，咪唔好接外賣單囉！叫份外賣都要叫到一肚氣！大家叫呢間外賣，記住一落完單好跑落樓下企定定係度等啦，人地外賣佬好忙嫁！

男友之前同同事去過荔枝角分店食，覺得生果新鮮又抵食，一路都想帶我去試下⋯終於趁星期六去開附近一試😉今次去觀塘分店⋯位置真係比較遠，夏天行過去出曬汗😂諗住星期六1點唔會好多人，點知離遠已經見到有6-7個人排緊隊，好在好快有檯❤️啲野食上得好快，叫左是日餐湯-南瓜蜆湯 & 全日套餐-煙三文魚牛角包+吞拿魚粟米沙律+開花結果鮮果沙律☺️價錢唔貴⋯份量又多👍🏻生果好鮮甜⋯下次有機會去試埋荔枝角分店先，好似鋪頭近地鐵站啲～方便少少

真係忍唔住寫食評 廢事咁多人中伏見間野裝修幾靚 又多人排隊就同fd入去食一入到去坐低左一分鐘 就比人叫落單成個節奏都好快野食都好快就黎左 應該一早整定一邊食 一邊勁多蚊螆嬲住我地已經覺得好嘔心 食食下仲要見到隻不知名識飛既昆蟲 同個職員講 佢竟然比紙巾我叫我自己捉你間餐廳有昆蟲 竟然要食客捉嚇到我同地急住食 有個fd食左半個飯又走左未試過食餐飯食到咁提心掉膽野食質素都一般 焗豬無炒底唔明點解咁多人食呢間野 除左快真係無樣好

觀塘區終於有分店，正！我之前係荔枝角做嘢時嘅飯堂，一直都好欣賞佢哋嘅食物同服務態度，價錢唔貴，呢間環境好過以前好多，多咗好多坐位，我以後食午餐又多一個選擇😋。

平時去開觀塘海濱都係去野餐多，點知朋友推介嘅餐廳正正就係開喺海濱附近，於是星期六就去試下，餐廳名夠晒特別，入面十分闊落，有成三千呎，所以坐得舒服，唔會有壓迫感🤪❣️皇牌經典套餐$56 配飲品/湯可以自選一款包同兩款沙律，今次就揀咗煙三文魚牛角酥配吞拿魚沙律同埋菠蘿粟米蛋沙律，牛角酥十分脆口，配埋千島醬同煙三文魚食好滋味，兩款沙律份量十足，兩個女仔食都食唔完🤩❣️是日精選套餐$56 配飲品/湯星期一至六都有精選嘅套餐，今次揀咗佢嘅龍蝦汁軟殼蟹意粉，軟殼蟹份量好多，而且炸完唔油膩，反而個意粉汁比較清淡，唔係好夠味🌚好味度：8（10分滿分）食物質素唔錯，每一份嘅份量都好大，而且選擇十分多，等你自由揀自己鍾意嘅配搭😋最重要係環境舒適，啱晒放假Chill下同relax下👍🏻

計上星期試咗宏利金融中心地下新開cafe, 簡直難食到一個點，我地未試過完全唔想影相、亦唔想寫食評，連最基本嘅咖啡都做得唔好睇嚟應該又係時候轉手雖然裝修有點特別，絕對係一次都不能試！所以今次就過咗對面街，喺振萬地下開咗一間新茶餐廳，裝修比較時尚，服務員態度非常有禮，每位侍應也好有禮貌但係如果你食午餐就一定記得訂位，佢哋每次大排長龍起碼十幾廿人同埋每日嘅午餐，選擇唔多，不過勝在重點，我哋試咗星期一嘅鰻魚飯斧頭豬扒意粉同埋黑椒雞扒意粉，最令我哋驚喜係斧頭豬扒，肉質鮮嫩分量十足，所以價錢絕對係性價比高雖然有時想食常餐，可惜佢哋只係得早餐先有另外見到有其他人叫沙律餐,份量好大而且牛角包好吸引！下次會再嚟試

今日試試午餐排長龍既店，睇睇周圍，全部都叫沙律，就試下個自選。點左生果，薯仔沙律加牛肉麥包。生果有西瓜，火龍果，菠蘿、木瓜，蜜瓜、哈蜜瓜，生果切片夠晒fresh 同多汁。薯仔沙律太多沙律醬，薯仔切到細細粒，份量好多，好飽 同行友人都食唔晒。黑椒牛肉併麥包，真係人如其名，兩片包夾住薄薄燒牛肉同揸左蛋黃醬，入口就係酸乾凍😅。下次我會食份生果算。

生平第一次出食評，佢真係好難食，午餐時間，基本上只得午餐4款及蕃茄或魚湯麵，就係叫咗呢兩款，蕃茄湯底夾到一pat pat，加埋啲米粉成Pat 泥漿咁，我叫咗番茄米粉日式餃子，4隻餃直接放喺泥漿上面，淋晒又油味超伏！

今天放假，約了友人去嘆下午茶。自幼已很喜歡吃沙律，『開花結果』的沙律一點也不欺場，如果你也喜歡吃沙律，是不容錯過的。我點了一份豬柳漢堡包拼沙律，只需$35連飲品。 沙律的款式甚多，有雜果沙律，鮮果沙律，菠蘿蛋沙律，呑拿魚沙律等，任君選擇。如果不太餓的，可以選擇蔬菜春卷或迷你咖哩角拼沙律，即製的蔬菜春卷和咖哩角，十分香脆可口，很喜歡吃起來那種crispy的口感。 想飽肚些，可以選擇豬柳漢堡包或美式熱狗拼沙律，也很迎合大家心意。如果想吃得豐富些，就要選擇皇牌經典套餐了，份量夠皇牌，口味夠經典，吃落夠滋味，價錢夠實惠。 餐廳的環境夠舒適寬敞，明窗几淨，令人坐得吃得舒服，最適合不趕時間的你們。 正所謂『偷得浮生半日閒，逍遙自在下午茶。』

星期六去試試觀塘碼頭附近新開的食店(開花結果）環境舒適，人流很多，地方大，待應服務好，上餐快。我叫左個皇牌經典餐超值得推介係蜜桃火雞牛角酥加吞拿魚沙律同雜果沙律，沙律份量夠大份，牛角酥好脆😋😋真心好食過x月堂呢朋友order 左豬脾骨同蕃茄濃湯拉麵，我都試左味，非常出色。價錢合理大約50，60蚊左右。但營業時間只係星期一至六，如果星期日都開，就更加好了。離開門口已經好想再去試其他😍😍。

一日之計在於晨，一份令人吃得既豐腴又健康的早餐，對上班一族來說，是一不容錯過的美饌。 味道濃郁清新的蕃茄湯底，配以鮮甜可口的黍米，令人垂涎。其他茶餐廳的蕃茄湯我已嚐過不少，但以『開花結果』的較鮮味，又來得健康，賣相也吸引。加上爽滑彈牙的公仔麵，令人『趙』得起勁! 配菜方便，選擇真的不少，有煙肉、炒蛋、榨菜肉絲、腸仔...再加上時下流行的丹麥吐司，鬆軟香脆，令這份早餐錦上添花。 飲品方面，除了傳統的茶餐廳奶茶咖啡外，還可選擇即磨咖啡，鮮果汁或台式特飲等，各式其式，悉隨君便。 最後，價錢真的很大眾化，只需$33便可大快朶頤了。

公司對面新開嘅餐廳。眼見裝修幾靚咪去試下。叫咗個是日午餐鴨胸日式咖喱飯。咖哩飯個汁理應係個靈魂，但點知係一個加咗勁多芡變咗一pat鼻涕質地嘅黃色汁。睇到已經無晒胃口。鴨胸就正常，凍檸茶正常。但唔會再嚟食囉。仲有落單前，隔離位小姐仲好好心地同我哋講，千祈唔好叫A餐焗飯，因為個焗飯係凍ga。不過服務唔差嘅，同個同事一路吹水吹足一粒鐘都無趕我哋走。走嗰陣時門口排晒隊。不過咁嘅質素應該好快執。希望會改善。不過我都唔會再試

話說今日時間關係就隨便在觀塘樓下叫左個外賣送上office，等左成半個鐘時間我搞掂d野野食都未送過黎，打電話過去吹完又吹白白浪費時間喺度等呢個外賣，結果係要成九個字送一個餐上黎，真係等到佛都有火😡😡😡🤬🤬🤬🤬

見到餐廳岩岩新開冇耐，就同一班同事去食個lunch 。我地就簡左是日午餐，我就叫左斧頭豬扒伴青檸燒汁。我開頭食第一啖都冇野，味道普通，點知食落去，啲肉越嚟越紅。我地總共叫左3份斧頭豬扒，竟然係全部都唔熟，令到我地極之失望。我真係食唔到落去。同事跟餐叫左個焗薯，點知是一個凍焗薯，連翻熱都冇。另外，同事叫左杯朱古力珍珠，啲粉太多令到杯野飲好似泥漿咁，珍珠口感正常，但整體味道一般。總括嚟講，餐廳環境不錯，但食物質素有待改善。

昨天去了開花結果觀塘新店試吃午餐，點了溫泉蛋伴照燒雞飯，蛋煮得剛剛好，啲蛋漿軟滑可口，慢慢的溶在口中，十分滋味。照燒雞香脆嫩滑，配以蜀米和菜，既美味又健康，令人回味。 餐廳的環境也很舒適，地方寬敞，設計簡約得來也很時尚，令人吃得甚舒服。 餐廳的客服也很到位，職員的效率甚高，有問必答，行動也很快速，不用兩分鐘，食物和飲品已放在桌面了，值得一讚! 只需$50多便有此美食連飲品，加上良好的客服，價錢也很經濟實惠，值得翻尋味啊!