餃燃串

营业中

休息中

旺角咁多嘢食，有時真係唔知揀邊間好不過，而家我諗我搵到我嘅飯堂啦！食過呢間，真心推介！🍚黯然銷魂丼飯 - 雖然個名係gimmick咗啲，但佢絕對唔係只賣gimmick。呢個黯然銷魂丼飯溉手叉燒肉質夠滑又燒得啱啱好，醬汁又濃又入味，仲有隻溫泉蛋，可以同啲飯撈埋一齊食，啲飯吸咗所有精華，勁好味。呢個飯真係對得住個名有餘🤩🐮日式牛舌溫泉蛋丼 - 牛舌燒得啱啱好又夠嫩滑，咬落去仲有種肉汁四溢嘅感覺。呢碗飯都有搭配隻溫泉蛋，連埋流心嘅蛋黃，同碗飯撈埋一齊食，都好好食。如果想食牛多過叉燒，一定要揀呢個！🥟東坡冰花餃 - 餃子夠大隻，皮薄多餡，又夠IG-able，好啱叫黎打咭同一齊share 🍧紅豆爆珠冰荳花 - 必食甜品，豆腐花夠香，爆珠紅荳勁有咬口，加埋個靚靚嘅器皿，又係又好食又好睇嘅一個甜品🥤嘢飲叫咗旺角黑牛同白桃梳打，如果身體有朋友唔知咩係黑牛，真係要叫黎試下😆因為已經唔多餐廳有得叫呢個傳統茶餐廳嘅飲品得飲，有得叫的話，真係要試下😆最重要係除咗食物好食又新舊兼容，staff都好nice，態度又好，呢間真係要一黎再黎！

✨間唔時同朋友黎開旺角，都會去通菜街搵野食，今日去間叫「餃撚串」，食完又幾有驚喜喎😋✨餐廳入面唔算大，但佈置以日式風格為主。點餐係用QR code落單，非常方便。✨皮蛋：切成細細件，用醋、蔥花同辣油做汁食落唔會好滯。✨生薑燒豚肉丼：無諗過豚肉咁多片，仲大大塊，放滿哂成碗丼飯，燒汁味濃，而且唔肥，有一定既水準👍🏼✨燒汁牛肉丼：一上枱已經聞到好香既牛肉味，牛肉稍為煎過，加埋燒汁真係一流，好香口😋牛肉都幾大塊，鋪滿成碗丼飯，個人認為味道好過出面好多日式餐廳整既。✨餐飲🍹：跟餐都係加$12或者$15。荔枝梳打甜甜地，食完丼飯飲返杯超爽；龍眼冬瓜茶夠哂潤，又消滯。✨餐廳仲有其他特色小食、串燒、餃子、甜品等等，有機會再黎試其他。

喺度嗌咗個照燒雞扒飯，點知個雞係生嘅，如圖，都唔使講啲咩啦嘛。其實間嘢其他嘢好似好吸引，不過冇機會食到。員工嘅態度就一般啦，冇咩問題只係反應有啲慢。其實如果間舖頭有個餃子，我應該係叫餃子安全啲嘅唔知點解要挑戰佢呢個不知名嘅雞扒飯仲要生不過呢間舖頭應該係Sell串燒，所以嗰個雞係燒出嚟咁應該係燒得唔夠耐所以唔熟。本身諗住住喺旺角，睇吓可唔可以搞掂晚飯，點知冇啖好食，我叫佢唔使換俾我啦，我自己出去食魚蛋燒賣算啦。

好多KOL推介，試咗佢哋最出名嘅牛舌同埋餃子，仲有見到佢哋有個特色甜品，開心果糊，抱住試一試無妨，係幾特別，但有啲漏，如果有朋友仔一齊去食，可以share，另外牛舌定食性價比幾高，不過其他就麻麻哋了

好多KOL介紹，好似好吸引咁，所以就去左，結果呢...🙉牛舌真心好韌，咬左好耐先勉強吞到，飯對我呢講有點硬（本身唔鍾意食淋飯嘅人），唯一覺得個溫泉蛋幾好食推薦指數：3/10明太子蟹柳調味幾好，有微微辣得黎又唔會好鹹，芝士都有少少拉絲，夾埋一齊食係幾惹味，但係飯真係有點兒硬推薦指數：6/10東波肉煎餃，雪花煎得幾好，脆卜卜幾香口，餃子皮煙煙韌韌覺得幾好食，但係內餡唔似記憶中嘅東波肉，反而似甜甜哋嘅滷肉推薦指數：5/10

終於等到sem break lar !!! 辛苦咗咁耐，一於落旺角唱K食飯喂林下溫咗書咁耐嘅自己😏主食就揀咗呢個泰式烤牛扒溫泉蛋丼，侍應一放落枱面我哋已經嘩嘩聲，第一個感覺就係全部都係牛扒鋪滿晒成個碗，仲要啲牛扒係好大件，好耐冇食過份量咁充足嘅牛扒丼喇！啲牛扒一啲都唔柴口，充滿着好香嘅牛味，肉質都軟腍，幾十蚊有呢個質素真係好抵食！ 跟手我哋仲叫咗個串燒拼盤同埋明太子芝士粟米餃。個拼盤份量又係好大，自己最鍾意食嘅就係釀明太子雞翼，明太子配埋啲雞肉食，真係好夾，啖啖肉啱晒我！ 🤭另外呢個明太子芝士粟米餃又係必選，煎餃上面會鋪滿住明太子，而且煎得好好，個火候控制得好好，一啲都唔會覺得好油膩！最緊要呢個真係好平，$48 已經有六隻啦！ 抵！ 呢間真係好啱鍾意食明太子嘅我😍🤭

好有驚喜喎！作為餃子控，不嬲都好鍾意食呢間，佢哋最近搬咗舖頭，門面好靚，裝修好好，感覺好典雅，一如既往食物質素有保證，而家仲加咗好多新嘅菜式，錦上添花😍😍😍我哋兩個人，總共點咗以：🥟冰花煎餃🥟翡翠墨魚餃🍵開心果糊呢個冰花煎餃真係好出色！好大份，最欣賞係佢哋煎得好脆口，完全唔覺得好油膩，點埋醬汁，淡淡入口，秒速就已經清晒😆翡翠墨魚餃就係健康100%之選！ 每一粒都好大粒，個湯又好清甜，淡淡都係滋補養生😍😍😍甜品嘆埋呢個開心果糊，好出色好有驚喜，上面鋪晒開心果碎，好清新，唔會得個甜字，好味！ 新店水準依然可以keep到！ 仲要加多咗好多創新嘅元素，抵讚

無意中係openrice搵到呢間鋪頭。原來已經搬過新鋪位，見到店名，原本以為都係啲一般香港小店，無咩特別期望😂好彩啲食物味道不錯，店員服務態度都好好，唔會好似出面個啲串串貢甘，可以考慮encore再光顧。叫左一個丼飯、一個set同開心果糊，set包野飲、餃子同串燒。丼飯都推薦大家試下，因為啲肉好軟。但餃子就一般，可能煮得太耐，啲皮全部穿晒😂😂不過個開心果糊幾特別，其他地方好少見，開始之前驚會太甜，點知又ok喎~

食物質素差。叫咗個鰻魚飯，一上菜已經同門口張相大不同，睇真啲飯上面鋪咗啲沙律菜，完全唔夾，以為食落去有驚喜，點知有驚無喜，啲飯一粒一粒非常硬，完全冇珍珠米嘅煙韌感覺，鰻魚非常之少，做丼飯嘅餐廳，竟然連最基本嘅米飯都做得唔好，極差評。

人生第一個OpenRice 嘅食評就奉獻咗呢度，因為呢間餐廳真係太差！我哋兩個人係喺星期六午飯時間去呢間餐廳食1. 好明顯呢間餐廳完全零注重食客體驗。除非你一個袋都唔拎，否則你入去坐，無論你男定女、高矮肥瘦，食飯時間去一定係迫到你覺得冇空間坐，好似練緊leg day咁，你一分鐘都唔會想坐耐啲2. 明知食飯時間係會將四人枱分為兩邊，餐具就好心放兩邊啦。都係「零注重食客體驗」問題，我哋要飛象過河去另一邊拎餐具3. 食物方面，我叫咗個咖哩牛舌飯。我知呢個唔係主打菜，但都冇理由咁差。成個飯我只可以講係唔凍、係暖，但完全唔係一間餐廳出餐應有嘅熱度4. 咖哩同牛舌完全係分離，即係只係將一啲啱啱煮熟咗嘅牛舌上面淋咖哩汁，所以食落一啲都唔入味5. 我哋叫咗兩個飯，兩個上面都會加沙律喺上面。沙律味道本身ok冇問題，但同個飯係完全唔夾。如果店主有自己食過，冇理由唔發現有呢個問題既然係咁，唔理解點解唔分開兩碗上，飯還飯、沙律還沙律。我淨係諗到一個原因，就係為咗洗少啲碗。即係又係「唔重視食客體驗」問題6. 另一個叫嘅飯係牛舌溫泉蛋飯。冇咖哩飯咁惡劣，但你會感受到佢完全係靠一啲現成嘅汁令到成個飯易入口啲。即係完

終於都考完晒試，交晒所有project，係時候要對自己好啲，揀咗好評如潮呢間舖頭，喺旺角市中心地點夠晒就腳👍我哋兩個個女仔嗌咗泰式烤牛扒溫泉蛋丼飯share 食，牛扒好大塊，加埋特色醬汁加芝麻，肉味好香，夠晒腍，再跟埋溫泉蛋嘅蛋汁，成個飯嘅份量都好夠！我哋兩個人share食都已經有七成飽😂不過未夠喉，因為見到佢個餐單太豐富啦，我哋再嗌多咗個串燒拼盤同埋燒扇貝！ 價錢一啲都唔貴，串燒拼盤好足料，自己最鍾意食係明太子雞翼，好欣賞佢哋個心思，入面釀滿明太子，兩者嘅味道好夾，其他串燒同埋翠玉瓜等等都好好味👍燒扇貝都係好大份，扁頭鋪滿晒蒜蓉同埋香蔥芝麻，份量好大，味道又好惹味，食完好滿足👏😆

12月天氣好好，好心情，最啱就係去行街買嘢，感受吓節日氣氛。 呢日我哋去旺角行街，周圍都好多人，見到有間新開嘅餐廳，感覺幾乾淨企理，餐單嘅選擇亦都好豐富，唔怪得新開小店都多人幫襯！ 揀咗以下嘢食：🌟黯然銷魂丼飯配溫泉蛋🌟紅豆爆珠冰荳花過飯好有驚喜！ 物價性價比一流，啲肉係鋪滿晒面，仲有大大隻嘅流心蛋，我不嬲最鍾意食流心蛋，呢度嘅質素都好好，充滿着蛋香，撈埋秘製豉油，味道滿分！ 個甜品賣相都好靚，面頭啲紅豆係燈光下好似粒粒發光嘅寶石咁，好靚！ 同埋佢真係爆珠，口感一流，個甜品賣相都好靚，好中式！ 感覺佢哋嘅食物質素同埋賣相包裝都好用心設計！ 值得反兜🤣❤️

開始要入冬季嘅衫喇，行完街之後最啱就係喺旺角道搵好嘢食，見到通菜街呢度新開咗間正野，環境裝修門面得好靚，吸引到我！ 😆話明餃子店，梗係要試吓餃子啦，我就點咗呢個火焰明太子芝士粟米餃 $48 有六隻，好大粒！煎得好香口，每一粒上面都鋪油明太子醬，入面亦都係好足餡，有好多粟米同豬肉，配埋美太子醬食，好食呀！ 另外仲嗌咗個小食同埋甜品，揀咗呢個燒茄子$36，好大條，大過我隻手掌呀🤣 上面仲鋪滿晒芝麻，蒜蓉同埋蔥，好香，又夠晒熱辣辣！ 另外再試埋佢哋嘅甜品，開心果糊 $42， 面頭好多開心果碎，開心果糊亦都係唔會偏死甜，好似感覺食多多都唔會肥😆 正呢間小店整體都幾高質，推介俾大家❤️

今日旺角做完嘢，喺通菜街見到有間新開嘅餐廳喎，見到門面裝修幾典雅呀，咁就試試先。 我哋一行二人，每人嗌咗個丼飯： 日式牛舌溫泉蛋丼飯同埋黯然銷魂丼飯跟溫泉蛋，上枱好有驚喜喎，價錢好大眾化，幾十蚊有交易，但係食物嘅份量好大份😍牛舌同埋叉燒啲份量好多，真係鋪滿晒成個碗，上面仲會有晒留心溫泉蛋，啲秘製醬汁跟埋溫泉蛋連埋啲牛肉一齊食，真係好好味！跟住我哋仲一人叫咗一碗甜品，個賣相好靚😍 用咗中式瓦碗去盛載，揭開好有驚喜，自己最鍾意就係呢個紅豆爆珠冰荳花，啲爆珠鋪面好靚，閃閃發光㗎😍 味道都好好味，唔會偏甜，價錢都好抵$38 咋！ 溫馨提示，佢哋係每日限量供應架！ 另外開心果糊都好抵$42， 個味道亦都唔會偏甜，面頭鋪滿晒一粒粒開心果碎，好味又啱晒打卡！ 好高質嘅小店，值得再幫襯👍

啲餃好細粒，食起嚟有啲失望，餡料少得可憐，仲要有骨，咬落去牙都崩。至於啲串燒，無寫明係辣，但食落去之後先發現原來勁多辣粉，辣到完全食唔到，再加上啲串燒本身已經好鹹，食完之後成個口都覺得好唔舒服feel 到隻眼唔知係味對啲香料敏感眼都腫埋，碗湯就更加令人失望，味道重重嘅味精味，完全冇任何鮮味可言，根本唔想再飲落去。整體嚟講，呢次用餐體驗好差，無論係餃子、串燒定碗湯，全部都係0分，實在有啲失落直接放棄食唔落。希望下次可以有更好嘅選擇。