Erawan Thai Premium (已結業)

禮拜五同朋友食飯但係又唔知食咩好，講講下大家都想泰國菜，於是就上網搵泰國餐廳，見好多人都讚呢間餐廳幾好，又係樓上舖，博下佢無咁多人，唔駛等咁耐，於是就決定去一試~~可能因為大家都幾餓，所以三扒两撥已經叫咗唔同嘅野食，包括︰黃咖喱雞配蒽油餅、冬蔭公湯、煎蠔餅同埋泰式海南雞飯。啲野食都黎得好快，仲要係好好食果種，黃咖喱固然好食，估唔到連蒽油餅都超好食，直頭就咁食都無得頂~~冬蔭公湯係我最鐘意嘅泰菜之一，平時喺香港飲開嘅冬蔭公都係以辣為主，呢度就酸辣得宜一向對煎蠔餅都情有獨鐘，我仲以為潮州菜先有煎蠔餅，原來煎蠔餅都係泰國嘅著名小食，不過老老實實我又真係分唔出潮州同泰式嘅分別海南雞飯都好好食，直頭好食到唔記得影低><狂風葉落式咁掃晒枱面嘅餸之後，終於都飽晒，原本仲想叫個芒果糯米飯，不過最後實在太飽，唯有留返下次先試!

本身自己都好鐘意食泰國菜，每隔個靚兩個月就一定一定要食番餐先得。 而依一間泰菜餐廳係一次誤打誤撞上左去食，之後到依家我會話去尖沙咀食泰國野instead of去九龍城食泰國野，佢已經變左my favorite(之一)💕其中一個原因就係依度嘅Cocktail好好飲，每次去到一定叫一杯Ocean Wave💕依杯係呢度嘅招牌之一，個個都會叫番杯㗎因為當日就得兩個人食，所以只係嗌左三樣菜😢第一樣就係呢個南乳虎蝦，嗰陣就做緊promotion，本身唔係好好海鮮嘅我都覺得唔錯，隻蝦真係好大有成隻手掌咁大。第二樣菜就係生菜包。最後就係冬陰公炒飯。係尖沙咀嘅鬧市樓上有一間質素好高嘅太菜，又唔太多人去。飲住杯酒食泰菜真係好Chill~

無意中發現此餐廳，抱住一試無妨嘅心態去食一餐家常便飯。點知食出驚喜！！！ 首先喺餐廳環境舒適， 服務員細心(尤其係戴眼鏡Henry哥哥)。之後到戲肉，新鮮生蝦好味跟住係咖哩蟹，分量多又抵食，仲超多蟹膏另外就係甜品拼盤， 一次曬滿足所有人希望仲要係經某程式平台訂位有折，真係好滿足嘅一餐

好朋友為我慶祝生日，他選了這間泰國菜菜館，據他說也是同事推薦他選這一間。大家都係第一次來，所以都要揾咗一陣先揾到，這店是位於大廈嘅4樓，所以不容易從街上可以看到。菜式全都是朋友所選，第一道是蒜香炒蜆，平常好少食蜆，怕會有沙，不過這裡嘅蜆就非常乾淨，而且蒜香味適中，唔會蓋過蜆嘅鲜味，蒜汁原全滲透每一隻蜆內。食蜆之餘，我哋仲用蒜汁嚟送泰式薄餅，一啲都冇浪費整碟餸！再嚟一碟串燒雞肉，雖然已經凍咗，但係一啲都唔乾硬，雞肉依然有汁，不錯。這個青咖哩牛腩，係我第一次食，我之前食都會選雞肉，不過這個牛腩都唔錯，咖哩香，牛腩滑。另外一碟係炸蝦餅，呢道係我至愛嘅泰菜，不過呢度做嘅蝦餅就麻麻地啦，裏面好乾，好似翻炸，所以沒有清碟，係全晚唯一冇清碟嘅菜。最後係冬蔭公湯，好奈冇飲過咁正嘅冬蔭公，酸辣適中，其他配料好新鮮，我連飲兩碗。綜合嚟講，呢間餐廳嘅環境唔錯；地方大，分室內及室外兩部份，客人可選擇係室外或室內用餐，坐得又舒服，香港好難有這樣嘅餐廳。

叫左半隻燒雞，青㗎喱雞同菠蘿炒飯，燒雞同炒飯都唔錯。青㗎喱跟油酥餅，熱辣辣脆脆地。但係埋單果陣就要睇下張單先，尤其是冇叫啤酒，唔好離開餐廳先睇單。或者第二枱叫左Asahi同青島，入左我張單，我冇睇單就比多百蚊，總之埋單果陣都對下單先啦。

傳聞嘅米芝蓮餐廳🤩一定要試～夜晚都較full booking，講明位置會比較親密但聽電話嘅哥哥仔亦盡量安排到滿意黎到泰式餐廳必叫生蝦，哩道特別在配搭苦瓜，跟足佢所有配料咁食，有另一番味道～叫左一個6款小食嘅拼盤，自己就較覺得蝦餅，豬頸肉同春卷值得推介泰式有煎蠔餅喎緊係要試下～不過略嫌唔夠平日打冷鋪咁香口～炒芥蘭不過不失，海南雞飯反而有驚喜喎😋😋蜆啖啖肉，無花假之後就係我至愛嘅粉絲煲，兩個字：美味😍😍餐廳氣氛好好，令人食得開懷，侍應有禮同人情味，令人想再光顧難怪座無虛席

朋友推介下到了這間泰國餐廳，地點方便易找。樓上舖地方寬敞，有室外的位置。是晚點的菜不多，而每樣也很精彩。冬陰功酸辣平衡。生蝦調味夠入味，連蒜頭一起吃十分開胃 。 沙嗲串燒，泰式燒雞賣相一流，十分惹味，配合生啤不知不覺就全吃完。服務生態度殷勤，滿意的一次用餐，會推介給朋友。

今日老細請食飯， 成班同事搵咗這間食評唔錯的泰國餐廳一試。 餐廳環境裝修都唔錯好有泰國feel， 有室外室內 但因當晚下雨關係室外沒有開放。 餐牌內食物選擇豐富。 上facebook打卡 仲有蝦片送 冬陰功咖哩炒蟹， 店員推介 汁醬很惹味送飯送薄餅一絕 炸蝦餅。 泰式拼盤味道和外觀都很好， 只係可惜我們十個人唔夠分 生菜肉碎包，清新香辣夠野味。 泰式豬頸肉。 燒得夠香，個汁調教得好味。 鐵板蠔仔煎蛋 我的最愛 夠鮮味。 菠蘿炒飯， 雖然冇個菠蘿， 但味道和配搭都炒得唔錯。最後叫埋個 芒果鴛鴦糯米飯 做完結 perfect 不過唔記得咗影相 雖然價錢較一般泰國餐廳貴， 但食物水準和餐廳環境真係唔錯。

作為尖沙咀打工仔，食飯除左m記，真係唔會平得去邊。Lee間泰菜唔算平，但絕對係舒服食飯之選，而且仲係午餐係半自助，即時抵食番。海南雞飯$88必食之選。飯可選雞油飯/白飯。雞肉相當嫩滑。唔係有番生血腥味。配海南雞點嘅醬汁，帶微微酸辣，相當開胃好味。通菜炒豬頸肉飯 $88相對氣場無海南雞飯咁勁，但都係好好味。豬頸肉彈牙夠入味。通菜炒得翠綠，唔會老，咸咸地送白飯非常好。半自助方面包括湯：冬陰功湯，豆腐肉碎湯沙律：肉碎生菜包，雜菜沙律（之前一次是雜果沙律，不是肉碎生菜包，看來是隨機）糖水：粟米西米露 （次次唔同）甜品：泰式蘭香子糕點（次次唔同）小食：春卷 （次次唔同）附咖啡/茶，泰式特飲+$8次次都食得飽飽又好味~食滿100元仲可以有一個印，滿4個送下午茶一份，8個送午餐一份。抵食又好食。

跟老朋友聚舊，首選尖沙咀，貪其方便就腳！朋友強烈推薦來這裡食泰國菜，坐得舒服食物又美味！位於尖沙咀美食區的亞士里道，地方果然十分便利，很快就找到目標～～可惜忘記影餐廳內裡的環境，餐廳裝潢是走泰式風格，坐得舒服又唔會感到壓迫～～先來泰式鳯爪酸酸地挺開胃，份量For 3人都十分足夠～～小食拼盤一上枱真的有點驚訝居然份量如此多，絕對適合朋友一齊Share ～～而每款小食都具水準，特別是豬頸肉，炸蝦餅都十分出色～～紅咖哩雞，賣相一般，但味道加分～～配埋薄餅點咖哩汁的精華，好吃！就算沒有點粉麵飯食都夠飽肚～！泰式炸蠔餅，蠔的份量都不少，幾乎每口都有蠔仔肉，口感豐富！我最滿意的芒果沙冰！果然夏天芒果當造，特別甜！當然最後要食埋個泰式甜品盤先滿足！尖沙咀都有高質的泰國菜，下次又多一個好選擇！

平時食泰國菜都會去九龍城, 真係第一次黎尖沙咀食泰國野, 估唔到都有驚喜泰式燒豬頸肉呢個豬頸肉切得好厚肉, 而且燒得好香, 不過我覺得個汁再辣d會更好味泰式生蝦食泰國菜點可以唔叫生蝦呢呢度既生蝦都好肥美, 本身想叫多碟, 不過價錢有d貴就放棄左豬肉生菜包平時我都好少食生菜包, 朋友想試就陪佢地食啦, 估唔到個豬肉碎炒得辣辣地又幾好味馬拉盞炒通菜去到邊都要叫既通菜呢間既通菜份量都幾多, 而且炒得好香, 好抵食呀濕炒海鮮河好耐冇食過濕炒河, 呢間d汁好好味, 而且海鮮又多, 有魚青口蝦魷魚, 仲有d菇同菜, 河粉都炒到入哂味

泰國菜不是我熱衷的菜式，但也不是不喜歡，只是每當在想吃什麼，總會被西餐或日本菜"沖昏頭腦"，所以總是與它擦身而過，然而每當真的下定決心吃泰國菜，這裡近乎是我的不二之選。餐廳位於商業大廈之內，佔地全層，室內面積說很大倒沒有，難得是商業大廈內設有露天座位，但又遺憾因牌照問題現在暫不開放，希望日後可以在露天石屎森林中享用美食。室內裝潢走簡約風，重點在牆上與窗台的擺設及吊燈加入泰國元素打造氣氛。這裡不只食物選擇多，就連飲料選擇也多得自成一本。先來指定動作的泰式生蝦，生蝦鮮甜，每一隻蝦上有一大片生蒜片，這是畫龍點精的靈魂所在，現在連女士們化妝都愛用放大瞳片，這塊蒜片不可不大片。生蝦用上苦瓜伴碟，這是我少遇到的做法，苦瓜苦味不重又爽口，配上酸酸甜甜的辣汁能使人把伴碟菜也吃光。泰式燒豬頸肉不肥膩，肉質爽口，配上酸甜的汁更開胃。燒肉炒椰菜苗綠油油，椰菜苗很新鮮，帶點爽脆口感。雖然燒肉沒什麼特點，只是一般燒肉的重咸味，但它使椰菜苗的味道不會太寡，我平常又很少機會吃到椰菜苗，下次來大概會再吃這個。濕炒豬肉河很足料，我下單的時候特意要求多河少肉，否則肉會多得像是不要錢的猛放😅這個河粉我差不多每次來都點，喜歡

平時多數係九龍城食泰菜，今次就為左方便大家所以係尖沙咀食。一早就book好檯，原來生日前後幾日book有免費一客既南瓜布丁，但個時朋友冇提及所以miss左了.....環境很好，有bb櫈提供，份量都算大份，係價錢有點兒貴。生蝦刺身，有９隻，價錢好似超過一百，如果可以多d汁會好d泰式拼盤，乾左d冬蔭公(3-4人份量)，蝦係幾彈牙，唔係梅既係個係每日既優惠，鐵板蠔仔蛋，半價就食到，好似6x蚊，但係蠔仔好少咖哩大蝦，另叫薄餅，如果叫佢推介米之蓮咖哩蟹就包薄餅。都幾多蝦，而且蝦算新鮮，唔係梅，有彈牙。薄餅都ｏｋ蝦醬通菜，正常，唔會炒老左，仲翠綠泰式甜品拼盤(1-2人份量)，好彩叫細份，都已經好夠食。每人平均2百幾蚊，野食都ｏｋ既，不過俾我會揀返去九龍城食。

好耐未試過成十幾個人一齊食飯，諗咗好耐先決定食泰菜，但又嫌九龍城冇咁方便，最終揀咗呢間食過幾次，係尖咀既泰國菜。由於待應搞錯咗，原先安排咗圓枱俾我地，但安排咗俾其他人，變咗我地要坐長枱，好難傾計。。。呢點扣分了！至於食物方面，水準係保持到既～～泰式鳳爪酸酸辣辣，好醒胃~小食拼盤份量好大呀，最喜歡春卷，好鬆脆，饀料好好味！～牛肉。雞肉串燒，燒到剛剛好，唔會太乾，一定要配個汁一齊食，好香花生味！！～炒蜆食頭嗰幾隻時，完全唔覺有辣味，要食多幾隻先慢慢感覺到微微既辣，對於好辣既我黎講略嫌唔夠 😆～蠔餅雞蛋同蠔仔既組合永遠都會吸引到我😄 滿滿既蠔仔夾係香脆既蛋皮入面……😋～生菜包呢道菜最啱我口味，夠辣！用生菜包住肉碎食，完全冇油膩既感覺 👍～青咖喱雞肉+紅咖喱牛肉薄餅配咖喱是常識吧 😊 未食之前以為紅咖喱會比青咖喱辣，結果竟係相反。。好可惜既係當晚得原味薄餅，冇其他選擇 😔～燒肉炒椰菜苗每次黎都會點既菜，燒肉炒完依然脆卜卜，菜苗又青甜，很喜歡 😋

在尖沙咀吃飯，價錢不免會偏向中上，這亦令我錯判了食物份量的多少。冬蔭功（細）侍應會幫你從大兜分湯至湯碗再端上，大概有3碗的份量（雖則餐牌上是1-2人份）材料不少，有6隻海蝦及一些秀珍菇，整體是鮮辣的味道，作為開胃是不錯的。肉碎生菜包。是周四特價菜式，本以為份量頂多是一個湯碗的大小，怎料是一大碟...它是咸香的，肉碎搭上生菜則能解肥膩之感。檸檬香茅黃金蝦。是6隻脆炸虎蝦配上特制他他醬，大大隻虎蝦鮮甜彈牙，配上酸酸的醬就是一流。蟹肉炒飯。它足足有5個飯碗的份量，飯炒得粒粒分明，不會有油淋淋的情況，蟹肉亦份量足，但整體來說沒有特別。豆醬炒通菜。個人很喜歡豆醬，但它只用了很少豆醬，所以味道不出，亦沒下足夠鹽，所以偏淡。甜品拼盤（細）在吃罷正餐後，示意可以上甜品，足足坐了45分鐘才上碟。甜品整體平平冇奇，跟平時吃到的泰式糕點差不多。總的來說，2人吃了這麼多東西實在太過份，侍應亦未有提醒食物的份量是如此的大，不過食物的質素不俗，也就罷了。