Me Time Cafe

营业中

休息中

晚上搵食，行過見餐牌食物啱食，價錢相宜，所以就試試佢。原本想點一豬一牛，但豬無貨，所以唯有一牛一雞。餐湯先上，粟米忌廉湯，好一般的貨式，沒有驚喜，可以話純忌亷湯加上粟米而已。開始對主菜有點存疑。渴過湯後等了超級之耐的時間，最後發現漏單，十分氣憤，在不多食客之環境下仍然漏單，漏單後竟然只說sorry, 自行入返單，都唔問食客會否繼續等或是取消或是立刻送上其他可以食的再補飛！總之又係等…. 幸好上台的主菜質素及份量都比預期好！所以選擇原諒！牛及雞大大件，雞肉嫩滑，牛排煎到中間粉紅色，意粉夠熱！餐飲也有薏米水選擇！如果唔係漏單，係可以比高分的！

以前舊鋪想食要準時lunch去排隊，估唔到長鋪都係，不過唔知係咪客太多，今次有少少失色，茄汁豆酸咗，不過其他整體都好好👍！今次叫咗: Me Time 全日早餐 $88包餐湯同熱飲，仲可以揀熱薏米水，唔洗加錢！一嚟到發現好大份，炒蛋、窩夫🧇、煙三文魚、煙肉⋯都好齊料吓，美中不足只係茄汁豆酸咗，不過同佢講完都有換返比我哋。另外叫咗： 慢煮槍燒雞脾便當 $65一樣包餐湯同熱飲☕️呢個價錢嚟講有湯有嘢飲，便當🍱有成隻髀之外，仲有餃子🥟同煙三文魚+沙律，算係超值！飯仲要有飯素係上面，難怪次次lunch要排隊～

7-1-2023 今日突然要返工，難得可以唔洗同人掙位食飯既情況下，即刻去咗一直以嚟都好想試嘅餐廳-Me time cafe黎朝聖. 點解用朝聖黎形容😂因為平日lunch你見到佢門口堆人等位就驚，難得今日見唔洗排，緊係把握機會試一試. 一睇餐牌，真係好驚喜，竟然有生酮料理食，其實我唔係酮學仔，不過都有睇過陳倩揚減肥法，好似有啲相似，所以決定試依個，飲品我揀咗紅棗茶小甜 嘢食嚟到，再一次驚喜，份量大大份，有兩塊豬柳，入口好淋又多汁，唔似出邊嗰啲乾爭爭又難趙，炒蛋好滑，最驚喜係沙律菜竟然有一半咁多，岩曬唔想食澱粉質嘅我👍🏼 總結，係一間高質嘅餐廳，價錢算平民，野食大大份夠曬飽，座位寬敞，唔似茶餐廳咁咁逼夾，平日都會考慮再黎試一次睇lunch time夠唔夠時間食先🤭

2022.12.09 lunch 有同事發現呢度開咗間新嘢，望一望，應該係之前個間我哋都買過外賣嘅，搬咗嚟呢度。 呢一日過咗嚟幫襯，不過蠢左，見內外都咁多人，應該唔好買，下次先，點知一等就等咗差半個鐘🥱呢度啲嘢都好抵食，又算多款揀，成個餐有湯有飲品，飲品仲有薏米水揀😃 由$58起，又唔加一，又冇收外賣袋錢等等⋯⋯👍🏼👍🏼揀咗紅酒燴牛肉丼飯，秘制香濃薯仔咖哩焗牛肉飯，到有得拎時，服務員都好好，講咗唔好意思👍🏼 嘩！都好重下，都幾有份量👍🏼 份量都唔少⋯⋯牛肉丼飯味道唔錯，但對我嚟講，最怕沙律放埋一齊😵‍💫 下次我一定走沙律！個咖哩飯都好味㗎，係我張相影得衰啲，黑咗😅 因為咖哩分開裝，所以沙律都係分開咗😏 至於個湯同飲品味道就一般啦，但$60左右一個full set，都值得再叫😁

本身目的地係MegaBox,但在九龍灣工作的朋友介紹我嚟試吓呢間Cafe,反正MegaBox都無咩食，就過來一試吧叫左肉眼牛扒配黑椒汁配薯菜，先嚟一碗餐湯，粟米忌廉湯👍（聽服務員講日日唔同的，希望下次嚟試到羅宋湯😜）牛扒一落枱好驚喜🤪好大份，牛扒煎得恰到好處，唔會太熟，黑椒汁好香另外值得一讚的是杯凍奶茶，好少可Cafe杯奶茶係好飲的👍👍最後埋單$76😲😲😲講真！呢個價錢真係有啲嚇親，通常都要過佰先食到，CP值超高

之前舊鋪食開，有段時間好高質下，但後來質素下降就少食左。搬左去新鋪，見到都有唔少粉絲排隊等位，就決心試多次啦。由於已接近晚餐時間，唔洗等位，而且又未餓住，就叫左個雞扒沙律🥗試吓。已經冇咩客人，但等餐時間都幾耐，要等差唔多成15分鐘。雞扒冇以前咁厚身多汁，好薄身而且冇咩味。沙律份量正常，算新鮮。紫薯冇乜味，麵包粒有d硬，其實都少少失望，跟住睇一睇張單，要收加一服務費，就覺得唔值得啦，因為連落單都要自助🤦🏻‍♀️🤦🏻‍♀️🤦🏻‍♀️。