UG Elements 有機農場.餐廳.市場

营业中

休息中

最近興食得健康D，上網就找到呢間有機餐廳。初時諗住有機餐都係比較清淡，味道一般，點知睇完食評竟然有驚喜，好多菜色望落都好吸引。去到店內坐左７—８成，好好彩唔洗等位都有位，應該係平日關係。門面好多綠色，夾番佢個主題——有機睇下本ＭＥＮＵ有乜好食，已經俾個魚鍋深深地吸引，好多野都想食，但係我地得２個人，食唔到咁多。最後就叫左個麻辣烤魚鍋同埋一碟肥牛（火鍋唔可以唔食肥牛）。賣相都唔錯，但可能炸耐左少少，條尾燶左少少。但條尾都唔會食，就唔緊要啦，味道黎講都幾有魚味，正所謂食魚有魚味。心諗這就是有機的味道？！問左店長，佢話魚係佢地大陸魚場養殖，水質好又用有機飼料，所以同出面Ｄ魚唔同。辣辣地就惹味，帶出左魚味，又唔腥。。。肥牛夾埋辣湯都唔錯值得再來，下次要試埋走地雞（都係有機）

係新蒲崗附迎探完朋友，諗住去搵野食。初時諗住新蒲崗冇乜好野食之際，就上OPEN RICE俾我地搵到呢間餐廳。由於我地冇辣不歡，見到有間菜當然唔會放過佢，要會一會佢。一坐低睇下個menu，原來仲係一間有機餐廳，店主話Ｄ雞係出自佢地自家農場。講多冇謂，一口氣叫左個麻辣魚鍋同口水雞，仲叫左兩碗涼伴，冇錯全部都係辣首先，魚鍋真係冇得頂，麻同辣的比例剛剛好，又唔會蓋左魚的鮮味。先炸再放湯打邊爐，條魚有鮮味得黎Ｄ肉又唔會散。另外魚肉比較結實，唔知係咪有機魚關係。另一重點口水雞，果然係唔同出面的雞，食得出係走地雞，Ｄ肉比較結實同有雞味。值得再去。總括黎講，Ｄ食物係比較新鮮，又鮮又辣，別出心裁的食店。出面的川菜都唔多會用新鮮食材，會用好重既調味，香料去掩蓋食材的味道不足。

午餐，食呢間有機餐廳，有lunch set,叫左個奇趣雞有碟菜跟，有跟湯或汽水。雞滑，食落口令我口腔麻麻地，吾太辣，吾錯，不過set lunch 都貴，份量少，吾好吾記得呢間係「有機」，試下，我朋友好鍾意呢間，因為她食素，又係「有機」

話說本人係口水雞超級fans，食親飯有口水雞我絕對唔會揀第二樣。朋友話中環中心附近有間叫UG既餐廳口水雞好好食，話身為口水雞狂魔既我一定要試下。但係呢，我返東九，都住九龍，幾時先漂洋過海去中環呀。 But我無啦啦手痕openrice左朋友口中既餐廳，哇，竟然新蒲崗都有呀正。於是我二話不說沖左去食。重點黎啦，呢度既雞係走地雞！！重要的事講三次，走地雞！走地雞！走地雞！係肉質緊實，皮薄脂肪少果隻雞，唔係平時街果隻食飼料長大既大肥雞。每一啖都有雞肉的鮮甜同川椒的香辣，配白飯一流。在唸起都忍不住流口水既口水雞，大力推薦！見到menu仲有雞煲（都係走地雞呀！），搵日再試下先：P中意口水雞既朋友唔好錯過啦。

呢間餐廳都開左一排但都未試過。今朝起身想去食早餐，見到呢度有早餐，就走入去試下。平時星期１至５都食得幾雜，今日就食個粥清清腸胃。坐底睇下個餐牌，選擇唔多。見到有個什豆粥，問左服務員，原來佢地個什豆粥係用十種唔同既豆黎煲，好有營養咁，就一於試下。個粥真係有好多料，好多豆豆，好杰好棉好足料。清清地唔錯又夠飽肚，食完唔會覺得好膩。因為初時驚唔夠飽，仲叫左個撈米粉，又係好足料。本來店主話免費送個有機蕃薯我試下，但係因為太飽，下次再食過。下次可以試下佢地既午餐，晚餐。呢間餐廳話好多食材都係源自佢地自己農場，保證健康。

由於而家d雞實在太多激素，攪到明明好鍾意食都唔敢食，但有時實在真係好想食，唯有睇下有冇有機餐廳可以過下雞癮，於是就搵到黎新蒲崗，呢度鋪頭唔算大，但乾乾淨淨感覺幾舒服，睇見d餐牌見到竟然有機餐廳會有雞煲，水煮魚，口水雞等，仲以為有機通常配西式煮去添，於是乎order咗個奇味雞煲一於大飽雞癮，以為有機店d雞煲一定冇出面嗰d咁惹味，點知味道又好好喎，好夠味有機走地雞肉質比平時食個dd肉比較實感覺有彈性d，因為睇緊中醫所以要戒辣，否則麻辣雞煲應該仲美味吧，食完雞煲仲可以打埋邊爐，兩個人叫咗個有機菜籃，雜錦丸同埋肥牛，黎到嘅份量都嚇一跳，菜籃內有唔同種類嘅菜，蕃茄，生菜，油陌菜，唐蒿，金針菜，大菇等等等等⋯感覺上d菜比平時個d甜d,d菇又特別有菇味（好似好廢話，但呢個社會菇有菇味似乎都唔係必然咁）d 丸都好新鮮彈牙，最最最有驚喜係肥牛，好靚好新鮮份量又多，仲只係一百六十幾一碟，真係好抵由於兩個人食咁多實在食唔晒，老闆仲好好人咁幫我地打包走，臨走仲送咗兩棵有機菜俾我地，真係好感動，呢度除咗老闆好好人，連另一個侍應生都勁友善勤快，以後一定會成日黎幫襯架

昨日係新蒲崗做到11點幾，未食飯見到有間餐廳做到兩點，就走入去試下。一入到去坐低見間餐廳標榜有機，個心都離一離，因為認識的有機餐廳都係食菜多，冇乜味。坐低左就辜且一試，打開個餐牌，原來同想像中好唔同，仲有川菜食添。辣辣地岩哂個天氣。因為好肚餓，叫左個魚鍋同口水雞，仲有啲涼拌。經理話魚同雞都係佢地個農場度養，食落真係同出面的好大分別。叫左過麻辣魚鍋，好大盤。條魚炸過再做魚鍋，啲肉冇咁散，辣辣地口水雞都好正，佢地話係冇激素走地雞。一試真係與別不同，肉質好有口感，食埋雞皮都唔會肥，香港少有的雞原來有機都可以咁惹味，可以再黎試其他小菜。

中午行過見有位便入去睇睇， 老闆很好客不停介紹佢地既雞同魚都係自家養殖， 見價錢唔貴便試下。 座位很乾淨舒適， 點了的豬手飯配檸水($44) 很快便送來，據說米飯及檸檬還有豬手中的冬菇都是有機的。 米飯粒粒分明，軟硬適中，豬手煮得超軟嫩， 一咬便離骨， 無牙都食得。醬汁有少少酒味， 香氣十足。 整體好有家常菜既感覺， 不會太咸亦沒有油膩感。有機檸檬水飲落唔覺好特別， 但老闆拿出有機檸檬俾我地睇， 檸檬好大個與平常檸檬有好大分別， 飲完仲可以請職員加熱水， 相當抵飲。餐廳還有酸菜條供應客人自取， 酸酸辣辣的很開胃， 菜條非常脆嫩， 當然也是用有機菜做的。臨走見有下午茶餐， 揾日要黎試試。

今天叫左個奇香雞午餐，D鷄夠滑，味道啱啱好，好啱胃口，同平時吃的雞很不同，平時我食鷄例會去雞皮，但今次我連鷄皮都食埋，一些肥膩感都冇！ 隨餐附上的醃籮蔔好爽脆，正！

餐廳標榜有機材料，所有食材皆由自家農場養殖，並且有機。菜好有甜味，雞不含激素並養足130日，所以雞皮沒有一層肥膏，很爽脆，而雞是走地雞，食落去好有甜味，實肉，有雞味。來這裡吃雞最放心。

開左一段時間, 但前排去到原來仲未營業, 到前幾日先開始真係有野食. 依間鋪嘅模式比較少見, 店鋪分前後兩部份, 前鋪部份就如超級市場, 有賣他自己農場生產的蔬菜肉類等. 後鋪部份則是餐廳, 也是標榜用其自家農場的食材來做菜. 然而, 可能是試業, 所以人手極不足, 同時也不熟手, 所以落單後, 等了頗長一段時間才有野食. 四人, 叫了一個奇味雞煲餐. 雞煲的味道不能說是十分惹味, 但雞件的雞味的確較一般市面為濃. 配料加了芽菜和寬粉, 芽菜比一般來得有咬口, 寬粉則不見特別. 由於是試業期間做特價, 所以四人的人均消費只是60元左右, 也算是幾抵.  以這樣的食物質素來講, 食得過. 

天氣涼涼地，最好就是約埋一班豬朋好友吃麻辣魚鍋丶羊腩煲！但是吃過很多間都覺得麻麻地，正在煩惱之際豬朋友說新蒲崗有間新開的有機餐廳有新鮮魚鍋吃，即叫即劏，而且還有我喜歡吃的麻辣口水雞我們三人沒有訂位來到差點都沒枱了，原來正在做優惠！幸好經理(可能是老闆)說剛剛有一張枱可給我們我們點了招牌金鯛魚鍋丶麻辣走地口水雞丶滋補鮮黑草羊腩煲丶椰皇丶洛神花茶等等。經理落單後還送了三碗老火湯給我們，今天的老火湯好像是薯仔煲魚，很鮮甜然後先來了麻辣走地口水雞，走地雞果然是與別不同，皮下脂肪少，雞味濃郁，四川麻辣口味頗正宗，既麻而不過辣，又不會蓋過雞的鮮味招牌金鯛魚鍋，很大一個鍋，金鯛魚果然是新鮮劏的，很鮮味又足料！酸菜份量也多，還有我超喜歡的紅薯粉！吃完忍不住encore了一份！吃完魚我們點了很多有機菜來打邊爐，菜吸收了魚湯的鮮味超級鮮甜最後來了滋補鮮黑草羊腩煲，幸好叫了一個小的，因為吃完魚鍋已經鮑了八成！鮮黑草羊果然有別於一般羊腩，脂肪少一點，一點也不酥，大大一塊羊肉炆得很入味，配上腐乳更好美味豬朋友果然沒介紹錯，下次一定再來幫襯

邊OT邊揾食, 近近地食香辣烤活魚煱, 唔知關唔關心理影响, 落單前仲睇住條魚係缸嬉水緊, 轉頭就睇住廚師即捉即劏, 總係覺得條魚特別鮮, 食得特別爽! 店開張唔太耐, 雖然人手有點緊張, 但無損出品, 足料出色莫非真係...唔係好野唔使等....

今晚走去新浦崗找食，入到這間有機餐廳，食品質素好好，價錢適中，食落肚當然㨂番D有機食物，我最喜歡就是走地雞，真係有🐔味！個老細話D食材來自自家的農場，所以D味道真係自然D！值得推介👍🏼

早幾日同啲朋友去試下呢間新野，感覺裝修得幾好，食物都幾好食，但係坐位都幾逼，以佢夜晚係食雞煲個類較大食品真係好細、好逼夾，行到既位置都細，見住啲員工拎住一個個鍋真係有啲驚，不過啲野食都幾好食。另外，就係成日漏單🙄，唔止我地個枱，連隔離個啲枱都係咁，個鍋雖然都幾快有，但係啲配菜就漏，見到啲員工都幾忙咁，吹咗一次都唔好意思再吹佢地，可能係人手不足問題。此外，舖頭細既好處係人少啲都無咁嘈，可以靜啲咁同朋友眾下，但係有個處員工係廖啲客傾計😑，説話大聲，其實個日都幾多人下，我見到其他員工都忙緊唔明點解佢有時間吹水，可能佢係老細？總之就嘈到我有啲燥😡，不過見啲野食好食我無出聲😤。仲有，同一個員工又唔識落單、又唔識收錢，擾攘咗好耐我先食到同埋單🙄，希望下次再食唔會再遇到呢啲問題。最後，環境雖然幾好，但係唔係太乾淨，我見啲爐放係地下，希望會放上枱既野都唔好放係地下，好唔衛生，由其個地下都幾污糟，有油有骨，我見到幾次啲員工差啲滑倒😨，環境衛生有待改善🤔。拋開以上問題，值得一讚既真係啲野食，啲魚即叫即劏、好新鮮，雞煲都好好食，下次希望試到羊腩煲☺️