花朝軒 (已結業)

终于等到星期六，相约几位好友去西贡呼呼一下新鲜空气，顺便凑凑周日市集的热闹。大家未食晏，所以谂住食得饱饱再行，想去饮茶，但大街入面的中式餐厅都迫满人，所以拣左系大街转角的花朝轩医肚。与一般餐馆无异，花朝轩不算大，但装修都几古色古香。摆左唔少中国风摆设，天花上啲灯都好有特色。 星期日都好热闹，我地被安排坐2楼，点左个$398，4位用的商务午餐，有3款冷盘3款小菜，自己再外加几款点心。呢个餐其实好抵食！商务午餐仲每人奉送醉蟹脚！冷盘云耳小青瓜、脆皮素鹅仲有蒜泥白肉粉皮都十分不错，份量都几多，个粉皮捞自家制甜酸酱好惹味。小菜我最钟意个菠萝咕噜肉，因为炸得香口，够甜又够酸，送饭好正。松子鱼都好食，不过我地影相耐左，令到个鱼无新鲜出炉咁脆。葱爆羊肉一啲都唔膻，加左洋葱炒，令酱汁多左一份甜味，好食。花雕醉蟹脚大大只，都算肉厚，花雕酒香，加入左话梅调味。呢度啲点心即叫即蒸，真材实料，好食。我钟意咸水角，外皮好香脆。黑松露烧卖亦有淡淡松露香。跟餐仲有中式靓汤同埋甜品送，每人百零蚊的价钱，食到咁多野，真系好抵食。去开西贡，不妨一试！