芽莊越式料理 (新城市廣場) (已結業)

【沙田区】【芽庄越式料理】每一次喺沙田正正经经食个饭，都系同同一个人。我唔知系我就佢定系佢就我，总之我同佢食饭，好多时都系喺沙田食。同之前佢嘅状态比较，佢已经好咗好多，年月会将情感磨蚀，开心嘅同唔开心嘅都系，所以活在当下啦。朋友比较细食，佢就食碗 $80 嘅「河内手打牛丸粉」，里面写到系有「自家制牛丸」、「鹅芥」、「香叶」、「牛汤」。讲到朋友系细食嘅，自然就有分到啲畀我食。我觉得啲牛丸都几正，配合埋牛汤河粉其实又唔错㖞。而我自己就食 $238 嘅「烧乳猪」，系四份一只嘅「越南乳猪」，配以「芥末蜂蜜酱」咁嘅。食落个皮好脆口，正！而个乳猪都算多肉，而且几香猪味，估唔到几好。不过朋友唔食，我自己一个人食晒略嫌有啲腻，哈哈。跟住仲叫咗 $42 嘅「蒜蓉包」，okay 嘅系份量上争少少蒜蓉咁。饮品我叫咗杯 $48 嘅「青柠薄荷叶梳打」，喺青柠梳打上面加薄荷味又几清新，唔错。成功喺 75 分钟限时内完成晒成餐饭，加埋一，成张单 $449，大部份都系我嘅。。。（地址：沙田沙田正街18号新城市广场一期7楼708号舖）#1amfoodie #foodie #hkfoodie #thatfoodiethi