阿木台灣麵 (廣華街) (已結業)

成日听同事讲阿木，终于揾个星期六试左，睇左阿木社交平台十月头开始可以用手机应用程式theguluhk攞筹等位，好彩预早download左，实测过大约早半个钟攞筹，去到等冇几耐就有位。阿木除左台湾面，仲有便当、拌面、小食同台式饮料，全部几十蚊有交易，定价非常贴地亲民。另一样要赞嘅系枱上面嘅汤匙同竹筷都有用胶袋密封，食得更放心。红烧牛肉牛筋面($69) - 牛肉面价钱贴地，但份量比一般台湾面足料，里面牛筋同牛肉各两大旧。阿木嘅牛肉面积一块已经等于人地两块，仲要厚差唔多一倍，目测接近1cm厚，肉质亦好软腍。牛筋弹牙得黎唔会太韧。面质唔会太腍，我特别钟意佢地个汤底，好浓郁惹味。芝士玉松蛋饼($42) - 蛋饼质地软薄，里面有好多肉松，不过芝士就唔多。芝士岩盐奶盖炭烧乌龙茶(半价后$19) - 凡点牛肉面式者台式便当都可以有饮品半价。乌龙茶上面有白色嘅奶盖，但入口奶味比较淡，芝士同岩盐味亦唔太突出，比起野食黎讲，野饮就较为普通。总结，野食唔差，虽然未至于惊艳，但确系抵食嘅，而家可以喺apps攞筹真系方便好多，唔使早成个钟去排队。