撈撈雞 (已結業)

星期六下午，难得奶奶帮我地凑三只小妖，同老公二人蛇出黎去行下，扫下街。临走前老公话想买野返去比三只小妖食，我地谂左一阵，又周围行下睇下有咩系啱小朋友食，行下行下就兜左入有一大堆食店嘅位置（我都唔识形容啦，好似一大个圈咁，入面全部都系小食店），行到入去见到有台式盐水鸡买，就去睇下啦。我地决定叫2份，1份系鸡胸肉，1份系鸡脾肉，佢每份肉都配3款配菜嘅。鸡脾肉配粟米芯，车厘茄，青瓜，盐水汁。本身有辣汁嘅但我地要比小朋友食所以就叫左盐水汁啦，鸡脾肉好滑，个盐水汁好惹味，又唔会话太咸，咁当然唔够台湾嘅香，但都唔错架啦，青瓜爽脆，车厘茄都新鲜。鸡胸肉配芭乐，粟米芯，西兰花。鸡胸肉都煮得出奇地滑，唔系想像中嘅鞋烚烚，但当然比起鸡脾就梗系鸡脾再滑d啦。芭乐好香，完全令我谂起系台湾夜市扫街嘅感觉。西兰花又唔会话烚到太淋，都仲有d咬口。估唔到呢间野又真系几正，不过美中不足系呢度实在太迫啦，系等紧嘅时候比好多人推撞，不过都明白香港嘅土地问题，特别系葵涌广场想做到美食商场咁。