到此一遊 (總店) (已結業)

岩岩落船，本打算去乐满堂食饭，点知去到话系弟兄日，所以唔开，唯有揾过间食饭。一入到呢间铺头，个环境都唔错，可以静静地咁食住黎倾计。但系，打开个menu，发现都几少选择，冇乜岩自己。最后，男朋友就点左个日式照烧豉油汁牛扒意粉，餐饮系芒果绿茶；我点左咖哩鸡扒饭，餐饮系苹果红茶。大约等左五分钟，就已经上枱，员工手脚好快！杯芒果绿茶好重绿茶味，冇乜芒果味，有啲失望。而杯苹果红茶反而出奇地好饮，果味比较重，味道甜甜但带点苦涩味，味甘而香，唯一失色既系两杯饮品都好多泡。日式照烧豉油汁牛扒意粉：个汁做得好好，好够味，又唔会太咸。牛扒就好一般，冇乜特别，呢个意粉只可以话系一般，真系冇乜特别。咖哩鸡扒饭：咖哩汁冇咖哩味，我净系食到好重辣味，唔食得辣真系唔好食呢个汁。而啲饭煮既时候，可能放得多水，饭既口感好核突，好似食紧淋晒既野咁，但饭既份量多到食唔晒，好浪费。整体黎讲，都系一般，比大排档逊色。如果下次再去长洲，我唔会拣呢间铺，佢唔系我既开饭心水。