冒喜 (柏廷坊)

营业中

休息中

今日同同事喺上环开完会之后揾食，佢介绍咗我嚟呢一间上环嘅上楼川菜馆，餐厅嘅格调相当高雅，以咁嘅价钱享受到咁嘅环境，未食都已经赢咗一半。吉祥套餐，拣咗个吉祥套餐，68 蚊碗面可以拣六个𩠌，认真超值。山楂苹果洛神花 / 乌龙茶酸梅青柠，两支都系好丰富嘅配搭，全部材料都好啱一阵解辣。凉拌土豆丝，土豆丝酸酸辣辣，非常开胃，难得嘅系佢真系喺雪柜度攞出嚟，系少有嘅凉拌温度，比起坊间大部分嘅室温凉拌优胜。秘制香辣汤粟米面线，材料拣咗潮汕蒜香墨鱼丸、美国肥牛、冰豆腐、豆腐串、娃娃菜同芫茜，蒜香墨鱼丸爽口弹牙，带有微微嘅大蒜味道，仲食到细粒嘅墨鱼粒喺入面，非常出色；粟米面线嘅口感有啲似上海粗面，芫茜山就满足哂同行嘅茜朋友。黄金酸菜汤土豆粉，材料拣咗潮汕手打牛丸、潮汕蒜香墨鱼丸、鱼腐、金菇、萝卜片、贵州丁家脆哨，土豆粉有少少似米线，不过就再弹牙少少；黄金酸菜汤嘅麻度、辣度同酸道都相当平衡，极富层次，手打牛丸牛味极浓，贵州丁家脆哨风味独特，有少少似猪油渣，但系就无咗𠮶阵酥味同油益味，加上炸得够脆，𩠌面一流。桂花蜜乌梅冰粉，经过一轮辣椒冲击之后食番一个冰粉，桂花蜜同乌梅嘅味道同个辣味嘅余韵互相抗衡，真系爽歪。