冒喜 (柏廷坊)

营业中

休息中

港岛区嘅野食俾我嘅感觉都偏贵，但呢间冒菜喺上环呢个地段， 竟然可以做到晚市都只系几十蚊一大碗面，环境仲要坐得好舒服，食完即刻忍唔到分享呢间餐厅俾身边嘅人知。我地各自都嗌咗吉祥套餐，$66 就有6𩠌，我个碗嗌咗潮汕手搥牛肉丸、潮汕蒜香墨鱼丸、滑牛肉、贵州丁家脆哨、鸭血、芫荽配生椰蕃茄汤，嚟到就率先饮啖汤试下味，无谂过椰子同蕃茄味可以咁夹，系清新开胃，就算份量好多都忍唔住食哂成碗面！本身对于啲𩠌都唔抱太大期望，话哂都只系 $66， 点知佢竟然全部𩠌都好出色，私心推荐潮汕手搥牛肉丸、潮汕蒜香墨鱼丸同贵州丁家脆哨。啲丸真系同我以前喺潮洲食嘅一样咁好味，唔同出面间间都系入货返黎，间间都一样味。而贵州丁家脆哨呢样野，menu 竟有介绍话系贵州非遗美食，佢系一粒粒脆脆。我会形容系有啲似猪油渣，但唔会feel 到肥膏，超脆口，一啖面夹几粒𩠌竟然好夹。另外随餐仲有个沾酱，唔辣，所有𩠌点落去都好夹。好难形容嘅味道，大家真系要食咗先明！朋友嗌左差唔多嘅𩠌，但配黄金酸菜汤，辣得好过瘾，呢啲秋冬嘅天气食面好适合。另外我地都有加个藤椒鱼皮，$48 一大碟，食得好过瘾。野饮方面，我就希望可以少啲甜，会更加好饮。