茶餐廳2.0 (已結業)

今日放假约咗两老食午餐，平时行过见到呢间食店都好多人，而且食物都几吸引。咁就带两老去试吓。我地大约晏就十二点半入座，被安排坐近窗口嘅卡位。先望吓餐牌有咩食先。午餐都几多选择。我地叫咗茶胆贵妃鸡饭，银鱼仔咸蛋蒸肉饼配白饭同一个铁板西冷。饮品叫咗热柠水，Mocha同芒椰派对。三个餐都奉送餐汤。先讲肉饼饭，肉饼唔会话全部都系肥肉。银鱼仔数量都几多。而且咸蛋唔会话得个死咸。配白饭一流。然后就系贵妃鸡饭。贵妃鸡肉质幼滑。清清地几好食。到铁板西冷扒。首先会有配有面包。然后就系大大份牛扒同薯条。西冷肉汁丰富，绝对唔会话将货就价，而且唔多肥肉，啱晒食肉兽。饮品方面，mocha劲大杯。而且唔会太甜。最意想不到嘅系，竟然有埋拉花。好有心思。至于芒椰派对，家母表示芒果味浓，而且仲好香椰味。最后值得一提系侍应嘅态度，即使餐厅坐满食客，但佢地不时会照顾食客嘅需要，例如会劲贴心比个碗仔我地装骨，见我倒晒啲汁落铁板又会主动问我够唔够。而且系我地选择困难嘅时候仲会同我地介绍餐牌添。食店无论系食物，环境，价钱同埋服务做到一流。好值得大家去帮衬。