Yay! 尋香雞 (已結業)

今日放工经过九龙城，见到呢间餐厅门口干净企理又光鲜，相信应该似系新开无耐，钟意食嘢嘅我当然唔会放过呢个机会。之后望望门口个餐牌，原来系食丼饭、炒面、大阪烧等等嘅日本嘢，所以对呢间餐厅就更加有兴趣。餐牌都有几多选择，最后拣咗比较抵食嘅二人餐 😋 虽然有客人都等紧外卖，但系餐厅出餐速度都好快，所以唔驶等好耐 🥰 二人套餐 ($168) : 一款大阪烧、一款饭/炒面、两款小食、两款饮品。🍥 大阪烧就拣咗餐厅推介嘅明太子章鱼大阪烧，卖相唔错又超级足料，食到大大粒嘅章鱼肉，而且口感松软。蟹肉蟹膏炒面真心无得顶，劲多蟹膏之余又劲多料 🤤 而且份量都唔少。🍤 小食就拣咗芝士汉堡扒同香煎薄饼，芝士汉堡扒比预期中出色，超级邪恶嘅流心芝士。