桔梗 (已結業)

今日天气好热，行完朗豪坊冇地方好去，经过砵兰街见到一间叫做桔梗嘅西餐厅，之前行过好多次都冇入去试，今日决定喺呢度食晚餐。一入到去地方好宽敞，满满嘅木系装修，比人感觉好舒服，最紧要座位好大唔需要同隔篱左右逼住咁坐。咁热坐低梗系要叫杯啤酒饮吓，happy hr 大大杯都系$40. order 左个二人餐。前菜两款 主菜两款 甜品一款。首先上嘅系慢煮鸡肉沙律，慢煮鸡肉好嫩滑沙律酱超级好味。水牛城鸡翼香香辣辣非常惹味。黑松露野菌带子意大利饭好香，啲饭唔会好硬好啱香港人口味。上面仲有只温泉蛋用嚟捞饭一流。红咖喱牛柳意大利饭好特别，带少少fusion嘅感觉。呢碟一样有一只温泉蛋，非常加分。食完前面四样嘢已经好饱，不过甜品系另一个胃，最后梗系要来返个朱古力心太软，配上提子冧酒雪糕又冻又热冰火交融，简直一绝。第一次嚟桔梗食嘢俾我感觉好好，店员感觉亲切有礼，食物卖相质素中上，绝对可以值得一试再试。