大中華飯店 (已搬遷) 新店位置

今日同朋友庆祝生日，见四五年冇嚟过，挂住佢个猪手就嚟食嘢，叫咗个猪手，咁耐冇食都仲系好食嘅，然后我哋嘅恶梦就开始了。呢度呀洗碟碟𩠌都$100起跳，叫咗个蒜蓉节瓜虾干炒粉丝，佢放个碟落嚟嘅时候，我哋全台人系O咗嘴，好似一Pat垃圾🤢，食落去，都系一Pat嘢咁，剩系得盐味同埋节瓜味。再叫咗个蒜蓉西兰花，直头就系用水滚熟咗个西兰花仲要滚过龙，再加啲蒜蓉落去🫣。至于$110嘅小炒王，系十分之普通有普通嘅完全冇镬气，但系好在啲虾干同埋腰果系有味嘅。豉椒炒田鸡，落到嚟一边系田鸡一边系配菜，完全系好似太极盘咁样分开晒，见到个样已经冇乜期望，咬落去系好重腥味嘅。墨鱼饼食得出佢个墨鱼系好有口感，但系佢连基本煎嘅感觉都冇，更加唔好讲有少少㶶嘅感觉。避风塘鸡翼算系咁多个𩠌之中比较好食嘅。椒盐九肚鱼到不过不失。有嚟过都知道呢间嘢系冇乜服务嘅，而家闲闲哋一碟菜都要$100，再加上佢咁嘅食物质素，本人觉得佢十分之冇诚意。