漢城美食 (已結業)

韩式美食瘾又起,要又平又正,去尖咀金巴利街就最好~上次食左亚之妈,今次就试对面既汉城~btw,首尔都改左名咁耐,点解仲要叫做汉城呢???呢度菜式选择都几多,由粉面饭,去到地道小吃都有,价钱方面算系中价位~先来两碟前菜~虽然腌萝卜同泡辣白菜感觉好行货,不过又系我最钟意既前菜㖞~当然味道唔会有咩惊喜,但亦保证唔会难食~好多款韩菜我都钟意食,其中一样竟然系韩式炸酱面~佢当然唔系中式炸酱面做法,味道亦唔系咸同辣,而系甜甜地,啱晒唔食得辣既人~材料好简单,只得洋葱,薯仔粒同埋少少肉柆,加埋d甜甜地既酱,真系好啱我之前病病地食,哈哈~面条几烟韧弹牙,分量都唔少~整体来说,做法同味道算几正宗~呢个系烤牛肉+白饭~个餐牌真系咁写,咁都好,起码唔会好似上次亚之妈咁,根本都唔知个菜式跟唔跟饭~叫做烤牛肉,其实d牛肉好似牛肉碎咁,碎湿湿的~还好,调味都做得唔错,送饭一流~姣婆始终守唔到寡,叫左两个清淡唔辣既𩠌,结果都系忍唔住,叫多个辣炒年糕拉面~唔知系咪当时仲病紧,喉咙特别敏感,呢碟野几鬼辣(可能正常状态下会好d)~年糕略嫌未够腍,好彩有我好钟意食既鱼片帮补下~