囍越 (屯門市廣場) (已結業)

今日下午我们喺油麻地同好朋友饮完茶之后，入咗去屯门做嘢，之后我们去咗好耐之前喺屯门市广场食过觉得几好嘅「囍越」食晚饭！我们叫咗生牛肉汤河粉嘅汤底味道相当鲜甜香浓，牛肉嘅肉质好松软，肉味亦好浓郁，而且份量都几多，而河粉嘅面质就好烟韧软滑！越式海南鸡「半只」嘅肉质鲜味嫩滑，就算鸡胸嘅位置都唔会「嚡」感觉，但配嘅饭唔系鸡油饭，而系白饭！香辣猪肉松粉皮生菜包喺落单𠮶阵我们问店员啲猪肉松可唔可以唔好咁辣？店员好亲切有礼咁话：「当然可以！我帮你安排整小辣！」结果出嚟嘅味道真系好微辣，猪肉松嘅肉质相当爽滑弹牙，肉汁都几多，唔会好干身，就算用清甜嘅生菜包或用烟韧软滑嘅粉皮包，又或者两样夹埋一齐包嚟食，都系咁惹味！香芒龙脷柳米纸卷外层嘅米纸卷质感好烟烟韧韧，入面包著有新鲜清甜嘅生菜、香甜嘅芒果同即炸嘅龙脷柳，肉质好软滑，炸粉亦唔会好厚身，卖相好色彩缤纷！香芒糯米饭嘅糯米饭卖相同餐牌上或以前食开嘅唔同，以前系一个心形，而家系一个半球形，店员亦都有喺落单𠮶阵同我们讲过，虽然卖相无以前咁精致，但糯米饭嘅质感就都系咁烟烟韧韧，芒果嘅味道酸酸甜甜，都几醒胃！