東海薈 · 拉斐特 (The ONE) (已結業)

在这个多事之秋的日子，需然早两日食了一次大闸蟹自助餐，都要约另一班朋友食大闸蟹治疗一下，今次就拣呢度嘅套餐。如果叫4人套餐包茶芥加一大约$380/位，价格未算最抵但系都可以接受，2人套餐少一个菜而未包茶芥加一。东海两小碟（百味豆腐，干扁四季豆），四季豆都系煮得偏咸咗，空口吃会更觉太咸；百味豆腐炸得唔错，但豆腐嘅豆味唔算浓，质素刚刚合格。东瀛花菇炖螺头汤十分热及烫口，但汤面见到一片油，感觉肥腻，分数打折。主菜大闸蟹睇落大约四至五两重左右，质素都唔错，好多肥膏，肥膏亦黐牙，但不够香，蟹醋质素一般，唔够香。上第二转大闸蟹时间控制得好，唔会食得好赶时间。鲜味蟹粉小笼包皮薄蟹味浓郁，只系包内的汤汁少咗D，但都有80分。生拆蟹粉蒜蓉包嘅包唔够香脆，蒜蓉味唔够，蟹粉分量感觉上比较少，我哋10个人只系得一小碗，每人只可以分到一小汤匙嘅蟹粉放在包上面。蚝皇花胶扣玉掌嘅花胶腥味好重，唔知花胶系咪浸洗同埋出水嘅时候处理得唔够耐，花胶口感还可以。脆皮酱油鸡系今晚另一个出色嘅小菜之一，皮脆肉嫩，鸡肉好鲜及入味，皮好薄。姜茶汤圆嘅汤圆又系普普通通，而姜茶辣到足够。