咖啡韓食 (已結業)

星期六晚上嘅咖啡韩食比平日嘅晚市时间更多人，员工显得相当忙碌，我地挥手扬声几次都未有人得闲帮我地落单。不过韩国人老板见到员工做得唔好个阵都会向我地道歉，有啲窝心。首先上左紫菜饭卷。都明白餐厅人手唔够，忙中有错，本来系叫左芝士紫菜饭卷，最后上左传统紫菜饭卷，所以有少少失望。饭卷份量足够，黄萝卜好好味，不过有一两件饭卷比较易散开。牛肋骨汤饭嘅牛肉肉质好好，不过今日汤比较淡，捞饭个阵都系冇咩味。蜜糖芥末炸鸡半份当小食刚刚好，酱汁十分惹味。虽然同行友人食左鸡胸觉得麻麻，我食到鸡翼又觉得唔错。泡菜饼嘅份量好似比以前大份，里面嘅泡菜好爽口好食，不过今日似乎比较多粉，食完觉得好饱肚。饮品叫左蓝色柠檬梳打 同 苹果柚子梳打。两杯都几甜吓，蓝色柠檬梳打比较似平时外面嘅梳打饮品，苹果柚子梳打嘅苹果味好特别。今日嘅水准比以前差咗啲，但都明白假日晚市比较多人所以难兼顾。希望佢地之后有多返啲人手，令到水准可以去返之前咁啦。